Qəzzaya atom bombası atıla bilər(?)...
Mehman İsmayılov: “Buna dünya imkan verməz”
Qəzza zolağına atom bombasının atılması münaqişənin inkişafının mümkün variantlarından biridir. Bunu İsrailin Qüds işləri və irs naziri Amihay Eliyahu “Kol Berama” radiostansiyasına müsahibəsində deyib.
Qəzza zolağına nüvə bombası atmağın variantlardan biri olduğunu deyən Otzma Yehudit (Yəhudi Gücü) partiyasından olan nazir bildirib ki, bölgədə yaşayan fələstinlilər ya İrlandiyaya, ya da səhraya köçürülməlidir.
Bundan başqa, Qəzzaya hər hansı bir humanitar yardımın çatdırılması ilə razılaşmadığını bildirən siyasətçi vurğulayıb ki, İsrail “nasistlərə” humanitar yardım verməyəcək və “Qəzzada hərbi əməliyyatlara cəlb olunmamış mülki şəxslər anlayışı yoxdur”.
İrs nazirinin qalmaqallı açıqlamasından sonra ölkənin Nazirlər Kabineti açıqlama yayaraq, baş nazir Benyamin Netanyahu tərəfindən Eliyahunun hökumətin iclaslarından müddətsiz uzaqlaşdırıldığı bildirilib. Hökumət bəyan edib ki, İsrail hərbi əməliyyatlarda iştirak etməyən şəxslərə dəyə biləcək zərərin qarşısını almaq üçün beynəlxalq hüquqa uyğun hərəkət edir.
İsrailin bir naziri Qəzzaya atom bombası atmağa çağırıb. Düzdü, onu kabinetdən çıxartdılar. Ancaq Qəzzaya qarşı atom bombasından istifadə edilə bilərmi, edilərsə nə baş verər?
“Belə bir vəziyyətdə atom silahından Qəzza sektoruna qarşı istifadə etməyə çağırış olduqca qeyri-ciddi bir məsələdir”
Politoloq Mehman İsmayılov “Bakı-Xəbər”ə şərhində “İsrailli nazirin “Qəzza sektoruna atom bombası atmaq lazımdır” fikri o qədər qeyri-ciddi, o qədər qeyri-professional bir çağırışdır ki, ümumiyyətlə onu müzakirə etməyə dəyməz. Məsələ ondadır ki, İsrail Qəzzada quru əməliyyatlara başlayandan sonra 20 mindən çox insan həlak olub. Bu, İsrailin tarixinə çox ağır zərbə vuracaq bir əməliyyata çevrilib. İsrailin hazırda Qəzza sektorunda apardığı quru əməliyyatların nəticəsi getdikcə daha faciəvi bir sonluğa doğru istiqamət alıb. Bütün müsəlman dünyası İsrailin Qəzza bölgəsindəki əməliyyatlarına qarşı səsini qaldırıb. Avropa paytaxtlarında - Romada, Parisdə, Osloda, Londonda, bir sözlə hər yerdə İsrailin Qəzza sektorundakı əməliyyatlarına qarşı etiraz dalğaları baş alıb gedir. Türkiyədə Fələstinin və Qəzza sektorunun müdafiəsi üçün 1 milyon 500 min insanın iştirak etdiyi mitinq göstərir ki, dünyada İsrailin əleyhinə bu dalğa getdikcə güclənir. Belə bir vəziyyətdə atom silahından Qəzza sektoruna qarşı istifadə etməyə çağırış olduqca qeyri-ciddi bir məsələdir”-deyə bildirdi.
M.İsmaylovun fikrincə, nəzərə almaq lazımdır ki, İsraillə Fələstinin ikisinin bir yerdə ərazisi cəmi 27, 08 kvadratkilometrdir. “Belə kiçik bir ərazidə kütləvi qırğın silahından istifadə öz həyətinə atom bombası atmaq, öz evinin içində onu partlatmaq deməkdir. Bu qeyri-ciddi bir məsələdir. Sadəcə olaraq, İsrailin düşmənlərinə və rəqiblərinə qarşı işlədilən psixoloji bir fənd kimi ortaya atılıb. Yəni buna dünya imkan verməz. İsrail o addımı atarsa özü özünü məhv etmiş, bütün dünyanın qəzəbini öz üzərinə kökləmiş olar”-deyə bildirən M.İsmayılovun qeyd etdiynə görə, bu, psixoloji bir təzyiq vasitəsidir və İsrailin Qəzzada nə qədər qətiyyətli addımlar atacağını dünyaya çatıran psixoloji çağırışdır.
İradə SARIYEVA
