Sirr açıldı - xunta reinteqrasiya qrafikini Qarabağ ermənilərindən tam gizlədibmiş...
Mətin Məmmədli: "Onların məqsədi Qarabağda yaşayan ermənilərlə mərkəzi hakimiyyət arasında əlaqələrin qurulmasının, yaxınlaşmasının qarşısını almaq olub"
"...Yerli erməni əhalinin kütləvi oranı tərk etməsinin səbəbi separatçı rejimin dırnaqarası liderlərinin fəaliyyəti olduğu nəzərə çatdırılıb. Xalqlar arasında irqçilik aşılayan bu insanlar fəaliyyətlərini antirettor tədbirlərindən sonra da davam etdirib, Azərbaycanın təqdim etdiyi reinteqrasiya tədbirlərini yerli ictimaiyyətə açıqlamayıb.
Ermənistanın da bu məsələdə böyük məsuliyyəti var. Qarabağda qalmaq istəyən insanların Ermənistanda təzyiq hədəfi seçilməsi də göz önündə idi". Bu barədə Azərbaycan xarici işlər naziri Ceyhun Bayramov Almaniya xarici işlər naziri Annalena Berbok ilə birgə mətbuat konfransında çıxışında deyib.
Ceyhun Bayramov bildirib ki, biz bu qrafiki onlara vermişik, amma bu qrafik vaxtında ermənilərə çatdırılmayıb. Bununla xunta rəhbərləri nə məqsəd güdüblər? Azərbaycan mərkəzi hakimiyyətinin təqdim etdiyi qrafiki niyə erməni əhalidən gizlədiblər?
"Separatçı başçılar istəməyib ki, əlaqələr qurulsun, barışıq baş versin, ermənilər reinteqrasiya etsinlər"
Beynəlxalq Münasibətlərin Təhlili Mərkəzinin aparıcı məsləhətçisi, siyasi elmlər üzrə fəlsəfə doktoru, dosent Mətin Məmmədli "Bakı-Xəbər"ə şərhində "Ceyhun Bayramovun da qeyd etdiyi kimi, Qarabağda yaşayan ermənilərə reinteqrasiya planını detallı şəkildə təqdim edib. Lokal antiterror tədbirlərindən sonra Azərbaycanın mərkəzi hakimiyyətinin təmsilçiləri ilə Qarabağdakı erməni əhalinin nümayəndələri ilə Yevlaxda keçirilən görüşdə onlara sözügedən plan təqdim edilib. Təbii, Azərbaycan dövlətinin məqsədi ondan ibarət idi ki, Qarabağda yaşayan ermənilər də digər vətəndaşlarımız kimi, konstitutsiyada nəzərdə tutulan hüquqlardan istifadə etsinlər və Azərbaycan vətəndaşları olaraq Qarabağda yaşasınlar. Təəssüf ki, separatçı xuntanın başçıları Azərbaycan dövlətinin təqdim etdiyi reinterqrasiya planını ermənilərə təqdim etməyib. Separatçı xunta "liderlərinin" məqsədi aydındır. Onların məqsədi Qarabağda yaşayan ermənilərlə mərkəzi hakimiyyət arasında əlaqələrin qurulmasının, yaxınlaşmasının qarşısını almaq olub. Separatçı başçılar istəməyib ki, əlaqələr qurulsun, barışıq baş versin, ermənilər reinteqrasiya etsinlər. Onların əsas məqsədi o olub ki, reinteqrasiya getməsin, əvvəlki gərgin münasibət qalsın və bölgədə sülhün əldə olunması baş tutmasın"-deyə qeyd etdi.
M.Məmmədli hesab edir ki, xunta rejiminin başçılarının o vaxt hansı məqsəd güdməsindən asılı olmayaraq, Azərbaycan dövləti Qarabağda yaşayan, müharibə cinayətlərində iştirak etməyən sadə ermənilərin burada yaşamasında maraqlı olub. O maraqdan da irəli gələrək dövlətin onların reinteqrasiya planını təqdim etdiyini deyən M.Məmmədlinin sözlərinə görə, təəssüf ki, xunta rejiminin rəhbərləri bu reinteqrasiya planını təqdim etməyib. "Belə bir vəziyyətin yaranmasında məsuliyyəti separatçı xunta rəhbərləri daşıyır. Onların məkrli məqsədləri ucbatından erməni əhali reinteqrasiya planından xəbərsiz qaldı. Bu baxımdan bu faktı xarici işlər naziri Ceyhun Bayramov da dilə gətirdi. O, nəyə görə bu faktı Almaniyanın xarici işlər naziri ilə görüşdə vurğulayıb? Ona görə ki, ermənilər Qarabağı könüllü tərk etdikdən sonra ölkəmizə qarşı kampaniya başladıblar. Təəssüf ki, bu kampaniyaya Avropa, Qərb dövlətləri də, onların nümayəndələri də qoşulub. İddia edirlər ki, guya Azərbaycan "etnik təmizləmə" aparıb, "ermənilər zorakılıqla çıxarılıb". Təbii ki, bunun heç bir əsası yoxdur. Belə bir əsassız ittiham kampaniyasına qarşı Azərbaycan dövləti hər zaman öz mövqeyini ortaya qoyub. Buna görə də, Azərbaycanın xarici işlər naziri Ceyhun Bayramov Almaniyanın xarici işlər nazirinə bu məsələni xatırladıb"-deyə M.Məmmədli qeyd etdi.
İradə SARIYEVA
