Patruşev Ermənistanı dəqiq faktla vurdu - orada heç 2 milyon da əhali yoxdur...
Elşən Manafov: “Patruşevin çıxışında Ermənistan iqtidarına ünvanlanmış çox ciddi ismarıclar var”
Rusiya Federasiyası Təhlükəsizlik Şurasının katibi Nikolay Patruşev “Rusiya” sərgi-forumu çərçivəsində “Znanie” cəmiyyətinin marafonunda çıxış edərkən bildirib ki, Azərbaycanın potensialı Ermənistandan çox böyükdür:
“Azərbaycan hazırkı şəraitdə böyük iqtisadi potensiala malikdir. Gəlin iqtisadi potensialı müqayisə edək: Azərbaycanın əhalisi 10 milyon nəfərdir, Ermənistan, özlərinin dediyinə görə, 3 milyondur. Amma biz dəqiq bilirik ki, bu belə deyil, maksimum 2 milyon nəfərdir. İqtisadi, maliyyə göstəriciləri üzrə də Azərbaycan böyük üstünlüyə malikdir”.
Məlum olduğu kimi, Patruşev sıradan bir şəxs deyil. O baxımdan Patruşevin Ermənistanın demoqrafik vəziyyəti haqqında belə bəyanat verməsi nə deməkdir?
“Paşinyan hakimiyyəti bu xəbərdarlıqdan nəticə çıxarmalıdır”
Sözügedən məsələyə dair fikirlərini “Bakı-Xəbər”lə bölüşən politoloq Elşən Manafov bununla bağlı bir sıra məqamlara toxundu: “Hesab edirəm ki, Patruşevin çıxışında ilk növbədə Ermənistan iqtidarına ünvanlanmış çox ciddi ismarıclar var. Patruşevin Rusiya forumundakı çıxışı zamanı Ermənistan və Azərbaycanın iqtisadi potensialı, Azərbaycanın bütün kriteriyalar üzrə Ermənistanı üstələməsi ilə bağlı açıqlamaları Ermənistan və Rusiya arasında münasibətlərdə hazırda yaşanan gərginliyin fonunda verilir. Azərbaycanla münasibətlərə Rusiyanın nə qədər önəm verməsi baxımından diqqəti cəlb edir. Patruşevin forumda çıxışında toxunduğu məsələlərə hazırda Rusiya siyasi isteblişmentindəki yüksək və son dərəcə məsuliyyətli mövqe prizmasindan yanaşmaq, onların sətiraltı mahiyyətinə varmaq lazımdır. Patruşev əhali, sosial, iqtisadi inkişaf göstəriciləri, hərbi gücü və qüdrəti, valyuta ehtiyatlarının həcmini, UDM-nin adambaşına düşən pay göstəricilərini nəzərə alaraq belə deyir. Digər amillərə görə Ermənistanla müqaisəyə gəlməyəcək dərəcədə üstün olan dövlətlə bundan sonra da qarşıdurmanın rəsmi İrəvana neçəyə başa gələcəyi ilə bağlı məqamlara işarə edir. Bütün bu reallıqları nəzərə almayıb, okeanın o tayındakı, habelə Qərbdəki bəlli dairələrə söykənərək Azərbaycana əzələ nümayiş etdirmək istəyən Ermənistana yerini göstərir. Patruşev Rusiya Təhlükəsizlik Şurasının katibi olaraq, Azərbaycan Ordusunun bir illik maliyyə məsrəflərinin Ermənistanın illik büdcəsindən 3 dəfə artıq olduğunu bilir. Erməni cəmiyyətinə olan çağırışında Ermənistanı uçurumun bir addımlığına gətirib çıxartmış Paşinyan rejiminə münasibətdə mövqelərinə yenidən baxmağa çağırır. Patruşev Ermənistan siyasi isteblişmentinə ünvanlanmış bu ismarıcı ilə onu bir daha regionun təhlükəsizkik problemlərinə ABŞ maraqları baxımından yanaşmamağa çağırır. Rəsmi Bakı ilə münasibətləri sözdə bir, əməldə ayrı müstəvi üzərində qurmaqdan çəkinməyə, Rusiya ilə münasibətlərin eskalasiyası istiqamətində növbəti addimları atmadan düşünməyə çağırır. Ona görə də Paşinyan hakimiyyəti bu xəbərdarlıqdan nəticə çıxarmalıdır”.
Vidadi ORDAHALLI
