Bakı gözləyir, İrəvan Qərbə, Moskva özünə çəkir - sülh sazişi ortada qalıb...
Ramil Məmmədli: “Sülh sazişi ilə bağlı vasitəçilik missiyasında Rusiya təşəbbüsü kiməsə verməyi düşünmür”
Bakı İrəvandan sülh müqaviləsi ilə bağlı son təkliflərə cavab gözləyir. Xarici İşlər Nazirliyinin rəhbəri Ceyhun Bayramov bildirib ki, Azərbaycan Ermənistanla danışıqlara hazır olduğunu təsdiqləyir və onun son sülh təkliflərinə İrəvanın cavabını gözləyir:
"Danışıqların formatı istənilən ola bilər. Anlamaq lazımdır ki, bu, Azərbaycan və Ermənistan arasında olan məsələdir. Sülh müqaviləsinə əsasən, biz növbəti təkliflərimizi Ermənistan tərəfinə çatdırmışıq və indi onlardan cavab gözləyirik”.
Ceyhun Bayramov vurğulayıb ki, nazirlərin Tehranda “3+3” formatında görüşü zamanı erməni həmkarı Ararat Mirzoyanla münasibətlərin normallaşdırılmasını müzakirə edib: “Erməni həmkarımla görüşüm orada nəzərdə tutulmamışdı, lakin biz 40 dəqiqədən çox davam edən görüş keçirdik”.
Rusiya Təhlükəsizlik Şurasının katibi Nikolay Patruşev deyib ki, Moskva Bakı və İrəvan arasında münasibətlərin nizamlanması üçün hər iki tərəflə əlaqədədir və hazırda sülh sazişi hazırlanır. Onun sözlərinə görə, Ermənistan-Azərbaycan münasibətlərinin normallaşması üçün ardıcıl səylər göstərilib.
Demək mümkündürmü ki, sülh sazişinin hazırlanması prosesi artıq üstün şəkildə Moskvanın vasitəçiliyi ilə gedən prosesə çevrilir?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki,
Rəsmi İrəvanın qeyri-konstruktiv davranışları sülh müqaviləsi ilə bağlı ümidləri sual altına qoyur:
“Azərbaycan postmüharibə dövründə, sentyabrda reallaşan antiterror tədbirlərinə qədər Ermənistanla sülh müqaviləsinin imzalanması üçün var gücü ilə çalışdı. Bu istiqamətdə bütün səylər göstərildi, lakin Ermənistan hər vəchlə boyun qaçırdı. Antiterror tədbirlərindən, Xankəndiyə bayraq sancmağımızdan, suverenliyimiz tam bərpa etdikdən, separatçı rejimin ləğvindən, məhvindən sonra sülh indi yalnız Ermənistan üçün vacib ola bilər. Azərbaycan bunu əlavə qan tökülməməsi üçün postmüharibə dövründə tələb edirdi. İndi isə vəziyyət tamam fərqlidir və yeni reallıqlar var. Ancaq görünən odur ki, Paşinyan son çıxışlarında ilin sonunadək sülh müqaviləsi imzalanmasınən mümkünlüyündən danışsa da, bu istiqamətdə əməli addımlar atmırlar. Avropa, Qərb də artıq təşəbbüskar görünmür. Yeni tendensiya həm də onu tələb edir ki, regiona aidiyyəti olmayanların bölgədəki proseslərə qoşulması heç də arzuolunan deyil. Azərbaycan rəhbərliyinin ardınca Rusiya rəsmilərinin və bununla bağlı aydın mövqeləri olub. Hesab olunur ki, uzaq ölkələrin bölgədə mövcudluğu gərginliyi artıra bilər. Gedişat onu göstərir ki, yaxın vaxtlarda bu istiqamətdə Rusiyada müzakirələr baş tuta bilər. Həm 3+3 formatındakı müzakirələrin nəticələri, həm də bu danışıqlardan dərhal sonra Rusiya xarici işlər nazirinin Azərbaycan-Ermənistan münasibətlərinin normallaşdırılması üzrə xüsusi nümayəndəsi İqor Xovayevin Azərbaycana təcili səfəri bu cür düşüncələr yaradır.
Tehran görüşündə Rusiya XİN rəhbəri Lavrovun "xoşbəxtliyi Brüsseldə axtaranlar bilsin ki, sülh üçün delimitasiya xəritəsi Rusiyadadır" açıqlaması bir daha göstərir ki, Rusiya Cənubi Qafqazda, konkret olaraq Ermənistanda mövqelərini və təsirini itirmək niyyətində deyil.
Bu baxımdan da sülh sazişi ilə bağlı vasitəçilik missiyasında Rusiya təşəbbüsü kiməsə verməyi düşünmür”.
Məhəmmədəli QƏRİBLİ
