Makronun Bakıda casus şəbəkəsi Fransa dövlətçiliyini "yerə sürtdü" - TŞ-də daimilik statusu da itiriləcək...
Bu gün Fransa xarici siyasət sahəsində böyük iflas yaşamaqda, dünyada onsuz da zəifləmiş nüfuzunu demək olar ki, tamamilə itirməkdədir. Bunun ümdə səbəbi müstəmləkəçilikdən əl çəkməyən Fransanın digər ölkələrin daxili işlərinə qarışmaq cəhdi, BMT Təhlükəsizlik Şurasında daimi üzv olmaq kimi mövqeyindən sui-istifadə etməsidir.
Bu fonda Fransanın Vyana konvensiyası da daxil olmaqla beynəlxalq qanunvericiliyin tələblərini kobud formada pozması müşahidə olunur. Bunu Azərbaycanla bağlı olay da təsdiq edir.
Qeyd edək ki, bu yaxınlarda Azərbaycan xüsusi xidmət orqanlarının uğurlu əməliyyatı nəticəsində ölkə ərazisində Fransa səfirliyinin kəşfiyyat şəbəkəsi aşkarlanıb.Yayılan məlumatlardan belə bəlli olur ki, bu rezidentura Fransanın “tərəfdaşları” kimi tanınan ölkələrin nümayəndələrinə qarşı çox inamlı və sakit şəkildə kəşfiyyat əməliyyatları aparıb. Üstəlik, rezidentura geniş əlaqələrdən istifadə edərək region ölkələrində fəal şəkildə fəaliyyət göstərib, yeni məqsədlər formalaşdırıb və təsir dairəsini genişləndirib. Məlumatlı mənbələrin xəbərinə görə, bu istiqamətdə araşdırma bir-biri ilə əlaqəli olan şəxslərin şəbəkəsini aşkarlamağa imkan verən çox maraqlı məqamları üzə çıxarıb. Belə ki, uzun illər Fransa kəşfiyyatının ştatdankənar əməkdaşı olmuş Fransa vətəndaşlarından biri könüllü olaraq Azərbaycanın hüquq-mühafizə orqanları ilə əməkdaşlıq təşəbbüsü ilə çıxış edib. Onun əməkdaşlığı nəticəsində Azərbaycanda xidmət etmiş, fəaliyyətlərini davam etdirən, bəziləri isə hazırda bir sıra qonşu dövlətlərdə və beynəlxalq təşkilatlarda fəaliyyət göstərən onlarla fransız məxfi agent ifşa edilib. Bununla yanaşı, Azərbaycan xüsusi xidmət orqanlarına Fransa rezidenturasının Cənubi Qafqaz, Yaxın Şərq, Ukrayna və Moldovadakı fəaliyyəti ilə bağlı sübut və sənədlər təqdim olunub. Bundan başqa, məlum olub ki, Azərbaycanın xüsusi xidmət orqanlarının apardığı cinayət işi ilə bağlı Ukrayna, Gürcüstan və Azərbaycanla bağlı kəşfiyyat fəaliyyəti həyata keçirmiş bir sıra şəxslər həbs edilib. Mənbənin fikrincə, bu uğursuzluğun miqyası Fransa kəşfiyyatının imicinə ciddi zərbə vuracaq. Eyni zamanda, ötən gün yayılan xəbərlərdə Fransa prezidenti Emmanuel Makronun Fransa Müdafiə Nazirliyinin Xarici Təhlükəsizlik Baş İdarəsinin direktoru Bernard Emyeri vəzifəsindən azad etdiyi bildirilib.
Xatırladaq ki, Afrika və Cənubi Qafqaz regionunda kəşfiyyatın uğursuzluğundan sonra onun mümkün istefası müzakirə edilməyə başlanılmışdı. Hələ 2023-cü ilin avqustunda Makron Fransa xarici kəşfiyyatının rəhbərinə qarşı narazılığını ifadə etmişdi. Buna səbəb Emyerin fəaliyyətinin Parisin Afrika və Şərqi Avropadakı mövqelərinə zərbə vurması olub. Maraqlıdır ki, Daxili Təhlükəsizlik Baş İdarəsinə rəhbərlik edən Nikolya Lerner Fransa Baş Qərargahının rəhbəri təyin edilib. Amma burada o da xüsusi qeyd edilməlidir ki, Azərbaycan və digər ölkələrin daxili işlərinə qarışılması elə Makronun xeyir-duası ilə baş tutub. Deməli, bütün bunlar həm də Makronun iflasıdır.
Qeyd edək ki, baş verənlər Fransa xüsusi xidmət orqanlarının son 50 ildə ən böyük biabırçı iflası hesab edilir. Bunu Fransaya məhz Azərbaycan xüsusi xidmət orqanları yaşadıb. Baş verənlər Fransanın Cənubi Qafqazda siyasətinin daha sürətli iflasıdır. Azərbaycan xüsusi xidmət orqanlarının peşəkarlığı sayəsində suverenliyimiz qorunub, ölkəmiz daxilində casusluq şəbəkəsi və ölkənin müstəqilliyinə təhdid törədə biləcək hərəkətlərin qarşısı alınıb. Daha bir önəmli məqam odur ki, BMT Təhlükəsizlik Şurasının 5 daimi üzvündən birinin digər ölkənin ərazisində casusluq şəbəkəsi qurması yolverilməzdir. Bu, beynəlxalq hüquq normalarına, ölkələr arasında qurulan səmimi münasibətlərə zərbədir. Belə vəziyyət hətta ekspertlərə görə, Fransanın BMT Təhlükəsizlik Şurasının daimi üzvlüyünü də sual altına alır. Fransanın Azərbaycana qərəzli münasibəti çoxdan bəllidir, casusluq şəbəkəsinin ifşa olunması bu dövlətin məkrli planlarından xəbər verir. Fransanın iflasının əsasında Makronun yürütdüyü düşünülməmiş, yanlış siyasəti dayanır. Makron Fransanın dünyada mənafelərinə çox ciddi zərbə vurdu. Makronun dövlət başçısı olduğu müddətdə anti-fransız əhval-ruhiyyə pik həddə çatıb. Uzun müddətdir ölkə daxilində yaşanan etirazlar indi sürətlə Fransanın vaxtilə müstəmləkəsi olan ərazilərə yayılıb. İfrat dərəcədə sərt siyasət, pozulan hüquqlar, müstəmləkəçi yanaşma etirazların dalğasını genişləndirib. Fransanın fəxrlə elan etdiyi frankomaniya ideyasının da artıq nifrət doğurduğunu demək mümkündür. Casus şəbəkəsi ilə bağlı olay da Fransanın növbəti süqutudur. Makronun Cənubi Qafqaz siyasəti bərbad olduğu kimi, Afrika siyasətinin də uğursuzluğa düçar olacağı şəksizdir.
Tahir TAĞIYEV
