Əvvəlcə Azərbaycanı və Ermənistanı "3-cü ölkə" saydılar, sonra... AB-də rüsvayçılıq...
Mehman Muradlı: “Çox güman ki, Azərbaycanın etiraz edəcəyini biliblər və ona görə də adımızı oradan siliblər”
İlkin versiyada Azərbaycan və Ermənistan “üçüncü ölkələr siyahısı”nda yer almışdı. Lakin bir müddət sonra onlar möcüzəvi şəkildə oradan yoxa çıxdılar.
Bu sözləri Rusiya Xarici İşlər Nazirliyinin nümayəndəsi Mariya Zaxarova keçirdiyi brifinqdə Azərbaycan və Ermənistanın AB-nin “Maqnitski siyahısının” uzadılması qərarını dəstəkləyən ölkələr sırasına düşməsi, sonra isə onların adının o siyahıdan çıxarılmasını şərh edərkən deyib.
Qeyd edək ki, Azərbaycan və Ermənistanın adı AB-nin “Maqnitski siyahısı”nın 2024-cü il dekabrın 8-dək uzadılması qərarını dəstəkləyən ölkələr siyahısında hallandırılsa da, qısa müddət sonra siyahıdan çıxarılıb.
Hər iki ölkənin adı bu siyahıya niyə daxil edilib və niyə çıxarılıb?
Hüquqşunas Mehman Muradlı “Bakı-Xəbər”ə açıqlamasında bildirdi ki, Avropanın “Maqnitski siyahısı” insan haqlarını pozan şəxslərə sanksiya tətbiqini nəzərdə tutur: “Avropa İttifaqına daxil olmayan 11 dövlət, o cümlədən Ermənistan və Azərbaycan Aİ Şurasının “Maqnitski siyahısının” daha bir il müddətinə uzadılması qərarına qoşulduğu barədə xəbər yayıldı.
Bu rejim çərçivəsində İran, Çin, Şimali Koreya, Rusiya, Suriya və digər dövlətlərin vətəndaşları, təhlükəsizlik qüvvələri və şirkətləri üçün Aİ-yə giriş qadağası və Aİ ölkələrinin ərazisindəki maliyyə aktivlərinin dondurulması tətbiq edilib. Lakin qısa müddətdən sonra biz Azərbaycan və Ermənistanın adının həmin siyahıdan çıxarıldığını gördük.
“Maqnitski qanunu”na edilmiş düzəlişə əsasən, Birləşmiş Ştatlar təkcə Rusiyanın yox, digər ölkələrin də insan haqlarını pozan məmurlarına sanksiyalar tətbiq etmək səlahiyyətinə malikdir.
S.Maqnitski 2007-ci ildə bir qrup məmurun Rusiya büdcəsindən fırıldaq yolu ilə 230 milyon dollar oğurlayaraq xarici offşor şirkətlərin hesablarına keçirdiyini üzə çıxarıb. Bundan sonra A.Kuznetsovun rəhbərlik etdiyi əməliyyat qrupu vəkilin özünü vergi qaçaqçılığında ittiham edərək həbs edib. S.Maqnitski 11 aydan sonra həbsxanada ölüb.
Offşor şirkətlər üzərindən oğurlanan milyonların bir hissəsinin A.Kuznetsova çatdığı bildirilir. Bu, əslində Rusiyaya qarşı yaranmış bir siyahıdır. Qərb dəfələrlə Azərbaycan məmurlarının da adını həmin siyahıya sala biləcəyi ilə bizi hədələyib. Azərbaycanın həmin siyahıya heç vaxt marağı olmayıb. Görünür, Ermənistanla aramızda balans yaratmaq üçün belə ediblər. Amma biliblər ki, buna etiraz olacaq və Rusiyanın hər iki ölkə ilə münasibətləri daha da korlana bilər. Çünki həmin siyahının başlıca hədəfi məhz Rusiyadır. Çox güman ki, Azərbaycanın açıq etiraz edəcəyini biliblər və ona görə də adımızı oradan siliblər. Həm də bununla iku ölkə arasında balans yaradıblar. Ermənistanı Rusiyanın basqısından sığortalamış olublar”.
Məhəmmədəli QƏRİBLİ
