Yeni Günəşlidə "V massivi" nə ünvandır? - Bir şəhidin adını vermək olmazdı?...
Əmirsoltan Abdullayev: “Bu massivlər küçələrə çevirilərsə və hər biri də bir şəhid adını daşıyarsa, bunun çox böyük mənəvi və tərbiyəvi əhəmiyyəti olar”
Yaşadığımız Bakı şəhərində hələ də Sovet dövründən miras qalan küçə adları, ünvanlar var. Əlbəttə, onların əksəriyyətinin mənası bilinmir və heç bizimlə də əlaqəsi yoxdur. Uzun illərdir bu uyğunsuz adların dəyişdirilməsi ilə bağlı ictimai mübarizə aparılır.
Əksəriyyət deyir ki, mənasız, məzmunsuz adlar götürülüsün, o küçələrə, yaşayış ünvanlarına, massivlərə şəhidlərimizin adları verilsin. Şəhid ailələri də, ziyalılar da, ictimai xadimlər də dəfələrlə məmurlara səsləniblər ki, adları Sovetdən qalma olan bütün küçələrə milli adlar verilməlidir.
“Bir şəhid atası kimi bu istiqamətdə işlərin görülməsini çox arzu edərdim”
Suraxanı rayonu Yeni Günəşli qəsəbəsində mövcud olan bəzi küçə və massivlərin adlarının dəyişdirilməsi təşəbbüsü də meydana çıxıb. Bu qəsəbədə “AB”, “V”, “Q” və “D” massivləri var ki, onların da adları dəyişdirilməlidir. Həmin qəsəbənin sakini, 2013-cü ilin oktyabr ayının 25-də cəbhənin Tərtər rayonu istiqamətində erməni silahlı bölmələrinin atəşkəs rejimini pozması nəticəsində şəhid olmuş gizir Aydın Abdullayevin atası Əmirsoltan Abdullayev təklif edir ki, bu massivlər küçələrə çevrilsin və onlara da şəhidlərimizin adları verilsin. Sovetdənqalma və heç bir məna daşımayan, gənclərə, uşaqlara hansısa bir mənəvi ruh aşılamayan “AB” “V” “Q”, “D” massivləri kimi ünvanların adları dəyişməlidir. Ə.Abdullayev bu təklifi Mədəniyyət Nazirliyi Respublika Xatirə Kitabı redaksiyasının “Vətən daşı... və ya 44 günün dastanı” adlı layihə əsasında çəkdiyi növbəti 4 filmin təqdimat mərasimində çıxışı zamanı səsləndirib. Ə.Abdullayev “Bakı-Xəbər”ə açıqlamasında bildirdi ki, bu məsələ hər kəsi, xüsusən də məmurları maraqlandırmalıdır: “Mən o tədbirdə deputatlarımız da iştirak etdiyi üçün şəhid ailələrinin və qəsəbə ictimaiyyətinin qəlbindən keçənləri dilə gətirdim. Bəlkə də yeri deyildi, amma ümumi maraqlarımıza xidmət etdiyi üçün vurğuladım. İxtisasca mühəndisəm, həmişə camaatın içində oluram. 35 ildir ki, Suraxanı rayonu Yeni Günəşli qəsəbəsində yaşayıram. Yaşadığım qəsəbədə hələ də Sovet dövründə verilən adında qalan massivlər var. Sovet dövründən qalan və heç bir mənası olmayan adlar nə üçün hələ də yaşayış ünvanı kimi mövcud olmalıdır? O dövrdən qalan adlardır, bizim nəyimizə lazımdır? Qəsəbəmizdə “AB” “V” “Q”, “D” massivi adlanan ünvanlar var. Ünvanlara baxın, “V” yaşayış sahəsi bina 24, yaxud “D” yaşayış massivi bina 54. Təklif edirəm ki, yaşayış massivləri küçələrə çevrilsin və o küçələrə də qəsəbəmizin şəhidlərinin adları verilsin. Bir şəhid atası kimi bu istiqamətdə işlərin görülməsini çox arzu edərdim. Məmurlar təkliflərdən nəticə çıxarıb fəaliyyətə keçməlidir, deputatlarımız da bu işdə dəstək göstərməlidir.
Mənim oğlum da şəhiddir, amma öz oğlumu demirəm, qəsəbəmizdə başqa şəhidlər də var. Şəhidlərimizin adlarının bu şəkildə əbədiləşdirilməsi məktəblilərin, uşaqların, gənc nəslin vətənpərvərlik tərbiyəsində mühüm rol oynayar. Bu massivlər küçələrə çevrilərsə və hər biri də bir şəhid adını daşıyarsa, bunun çox böyük mənəvi və tərbiyəvi əhəmiyyəti olar”-deyə Ə.Abdullayev qeyd etdi.
İradə SARIYEVA
