Bakıda bu qədər avtobus marşrutuna ehtiyac var?
“Bakıda marşrutların sayı azaldılacaq”. Bunu “Azərbaycanda mobilliyin transformasiyası proqramı”nın təqdimatında rəqəmsal inkişaf və nəqliyyat nazirinin müavini Rəhman Hümmətov deyib.
O, bildirib ki, məqsəd əhaliyə yüksək səviyyədə xidmət göstərməkdir: “Bakıda 22 avtobus zolağı var. Lakin hamısının təkmilləşməsinə ehtiyac var. Bu gün paytaxtda 180-ə yaxın marşrut xətti var ki, onların yarısı yenilənməlidir. Əhalinin rahatlığı üçün marşrut xətlərinin təkmilləşməsi və marşrutların yarıya qədər azaldılması planlaşdırılır”.
Nazir müavini onu da qeyd edib ki, avtobuslarla bağlı məsələdə maliyyələşmə mexanizminin qurulması planlaşdırılır: “Biz operatorların da xidmətini başa düşürük. Müasir avtobuslar və onların qiymətləri barədə də müzakirələr gedir. Burada da ən qabaqcıl praktikalardan istifadə edilir. Yəqin ki, növbəti ildən müasir növ avtobusların gətirilməsi həyata keçirilə bilər”.
Avtobus xətlərinin sayının azaldılması sərnişindaşımaya necə təsir edəcək?
Eldəniz Cəfərov: “Əsas məqsəd vətəndaşların bir nöqtədən digər nöqtəyə bir marşrutla hərəkətini təmin etməkdir”
Nəqliyyat eksperti Eldəniz Cəfərov “Bakı-Xəbər”ə açıqlamasında qeyd etdi ki, əsas məqsəd marşrutların sayının azaldılması olsa da, vətəndaşların bir nöqtədən digər nöqtəyə bir marşrutla hərəkətini təmin etməkdir: “Vətəndaş Yasamaldan Binəqədiyə getmək üçün bir neçə avtobus dəyişirdi. Ancaq indi məqsəd odur ki, həmin ərazidən digərinə konkret bir avtobusla gedə bilsin. Belə olduqda marşrutların sayı azaldıla bilər. Ancaq əsas qalacaq bir marşrutun məsafəsi də uzun olacaq. Eyni zamanda marşruta buraxılacaq avtobusların sayı da artırılacaq ki, vətəndaşların fasiləsiz daşınması həyata keçirilsin”.
Elxan Əliyev: “Marşrutların sayının azaldılması ictimai nəqliyyatdan istifadə edənlər üçün çətinliklər yaradacaq”
Sosial sahə üzrə ekspert Elxan Əliyev hesab edir ki, avtobusların sayının azalması bu sahədə vəziyyəti daha da pisləşdirəcək: “Danılmaz faktdır ki, bu gün daşıyıcılarla bağlı problem həddindən artıq çoxdur. Avtobuslar vaxtında gəlmir, dayanacaqlarda sərnişin sayı çoxdur. Belə bir məqamda marşrutların sayının azaldılması ictimai nəqliyyatdan istifadə edənlər üçün çətinliklər yaradacaq. Biz ilk növbədə sərnişinlərin rahatlığını düşünməliyik. Soyuq hava və ya qızmar gün altında sərnişinin saatlarda avtobus gözləməsi düzgün deyil. Bu məsələ elə həll olunmalıdır ki, nə sərnişin əziyyət çəksin, nə də daşıyıcı”.
Günel CƏLİLOVA
