Türkiyə, Azərbaycan və Özbəkistan arasında Ankara Bəyannaməsi imzalandı
![Image](https://www.baki-xeber.com/media/uploads/posts/2025-01/2025_01_toplanti29-1.webp?v=1738218275)
Türkiyə, Azərbaycan və Özbəkistan arasında Ankara Bəyannaməsi imzalanıb. Üç ölkə Ankara Bəyannaməsində bir-birinin suverenliyi, ərazi bütövlüyü və beynəlxalq sərhədlərinin toxunulmazlığını açıq şəkildə dəstəklədiklərini təsdiqləyiblər.
Ankara Bəyannaməsində həmçinin Azərbaycanın Qarabağ və Şərqi Zəngəzurda minalardan təmizləmə işləri də daxil olmaqla yenidənqurma və bərpa səylərinə verdiyi töhfənin əhəmiyyəti bir daha vurğulanıb.
Nəqliyyat və regional əlaqə sahəsində əməkdaşlığın gücləndirilməsinə yönəlmiş hərtərəfli Fəaliyyət Planına əlavə olaraq, Ankara Bəyannaməsinə aşağıdakılar daxildir:
- Ümumi maraq kəsb edən regional və beynəlxalq məsələlər üzrə əməkdaşlığı genişləndirmək öhdəliyinin bir daha təsdiqi;
- Suverenliyə və ərazi bütövlüyünə xələl gətirən cəhdlərə qarşı birgə tədbirləri dəstəkləmək öhdəliyi;
- İqtisadiyyat, ticarət, investisiya, logistika, infrastruktur, rəqəmsallaşma, ətraf mühit və iqlim dəyişikliyi daxil olmaqla əsas sahələrdə potensialın tam şəkildə kəşf edilməsi öhdəliyi;
- Orta Dəhlizin səmərəliliyinin və rəqabət qabiliyyətinin artırılmasına çağırış;
- Azərbaycanın işğaldan azad edilmiş Qarabağ və Şərqi Zəngəzur rayonlarında yenidənqurma və minalardan təmizləmə səylərinə dəstək;
- Türk Dövlətləri Təşkilatı çərçivəsində iqtisadi, ticarət, əlaqə və iqlim sahəsində əməkdaşlıq çərçivəsində müsbət irəliləyişlərin vurğulanması;
- Azərbaycanın COP29 və CICA-da sədrlik rolunun vurğulanması;
- Mərkəzi Asiyada sabitliyin təmin edilməsi üçün əsas hesab edilən Əfqanıstanın təhlükəsizliyi və inkişafı ilə bağlı TDT çərçivəsində vahid yanaşmanın vacibliyinin vurğulanması;
- Qəzzada atəşkəs elan edilməsinin alqışlanması, onun ciddi şəkildə yerinə yetirilməsinin tələb edilməsi və İsrail-Fələstin münaqişəsinin iki dövlət prinsipi əsasında həllinin dəstəklənməsi.
TAHİR