Cəngavər Vətən oğulları - Sadiq Rəhimov və Elqaş Əliyev anıldı... - FOTO
Dağlar diyarı Lerikdə illər ötsə də, 44 günlük haqq savaşımızda Vətən qarşısında övladıq borcunu şərəflə yerinə yetirərkən şəhidlik zirvəsinə ucalan oğullar heç vaxt unudulmur, həmişə minnətdarlıq duyğuları ilə yada salınır və xatirələrinə dərin ehtiram bəslənilir.
Azərbaycanın hərb tarixinə qızıl hərflərlə yazılmış bu müharibədə Lerik 46 şəhid verdi. Sadiq Nadir oğlu Rəhimov və Elqaş Barat oğlu Əliyev də belə Vətən qeyrətli igidlərin sırasında yer tuturlar. Candan əziz tutduqları Vətən torpaqlarının işğaldan azad edilməsi uğrunda özlərini fəda edən hər iki igidin əziz xatirəsi şəhidlik zirvəsinə ucalmasının üçüncü ildönümündə anıldı. Belə ki, Lerik Rayon İcra Hakimiyyətinin başçısı Əkbər Abbasov, rayonun hüquq-mühafizə orqanlarının, idarə, müəssisə və təşkilat rəhbərləri və ictimaiyyət nümayəndələri şəhid ailələri ilə birlikdə hər iki Vətən sevdalısının məzarlarını ziyarət etdilər, əziz xatirələrinə ehtiram əlaməti olaraq onlara təzə gülərdən çələng hördülər. Söhbət zamanı bildirildi ki, Sadiq, Elqaş kimi qeyrətli oğulların qanı bahasına Azərbaycan Ordusu zəfər çaldı, ölkəmizin ərazi bütövlüyü təmin olunmaqla, xalqımızın 30 illik torpaq həsrətinə son qoyuldu. Şəhidlər Vətənə sədaqət nümunəsi olaraq ürəklərdə yaşayırlar...
Vətəninə ürəkdən bağlanan, onun yolunda ölümü özünə şərəf bilən Sadiq Nadir oğlu Rəhimov 1997-ci ildə dağlar diyarının Veri-Əliabadı kəndində dünyaya göz açıb. Həyatının mənasını xalqına təmənnasiz xidmətdə görən Sadiq orta məktəbi bitirib, Astara Pedaqoji Kollecində oxumaqla Fiziki tərbiyə müəllimliyi peşəsinə yiyələnir. Sonra hərbi xidmətdə əsgərliyi cəbhə bölgəsində keçib. Vətəni göz bəbəyi kimi qoruyub, həm də düşməndən alacağı qisas gününə hazırlaşıb. Odur ki, İkinci Qarabağ müharibəsi başlanan andan Vətənin haqq çağırışına birinci gedib. Füzuli, Xocavənd uğrunda erməni dığalarına vurduğu sarsıdıcı zərbələri ilə ad qazanıb. Son döyüş günü də yağıya qan qusdurub. Özü şəhid olsa da, arzuladığı üç rəngli qələbə bayrağımız döyüşdüyü torpaqda ucaldılıb.
Qəhrəman Vətən sevdalısı ölümündən sonra dövlət tərəfindən “Vətən uğrunda”, “Cəsur döyüşçü”, Füzulinin, Xocavəndin, Şuşanın azadlığı uğrunda medallara layiq görülüb.
İkinci Qarabağ müharibəsində Vətən qarşısında öz övladlıq borcunu ləyaqətlə, mərdliklə yerinə yetirən Elqaş Əliyev Brkandul kəndində anadan olub. Ömrünün 21-ci ilində vətənpərvərliyin ən ali məqamı olan şəhidlik zirvəsinə ucalan, ölümündən sonra “Vətən uğrunda”, Xocavəndin, Laçının azadlığına görə medallarla təltif olunan, bütöv bir xalqın qəhrəmanlıq simvoluna çevrilən igid döyüşçü Ağdamda, Füzulidə, Cəbrayılda, Qubadlıda, Laçında odlu-alovlu səngərlərdə sözün əsl mənasında tarix yazıb. Elə Elqaş kimi qəhrəmanların sayəsində 44 gün müddətində şanlı bir qələbə qazandıq.
Bəli, torpaq, uğrunda ölən varsa Vətəndir. Qəhrəman oğullarımız 44 günlük Qarabağ müharibəsində bunu bir daha bütün dünyaya sübut etdilər.
Zəfər ORUCOĞLU
Azərbaycan Jurnalistlər Birliyinin üzvü
