Berbok İrəvanda "100 min zorən qaçqın erməni" uydurmasına inandı?..
Tofiq Abbasov: "Burada anlayacaq ki, kim tarixin düz, kim səhv tərəfindədir"
Ermənistanın baş naziri Nikol Paşinyan Almaniyanın xarici işlər naziri Annalena Berbokun başçılıq etdiyi nümayəndə heyətini qəbul edib.
Həmsöhbətlər Ermənistan və Almaniya arasında iqtisadi əlaqələrin daha da inkişafı və möhkəmləndirilməsi üçün ardıcıl addımların atılmasının vacibliyini vurğulayıblar. Xüsusilə enerji və digər sahələrdə əməkdaşlığın genişləndirilməsi imkanlarına dair fikir mübadiləsi aparılıb. Nikol Paşinyan vurğulayıb ki, Ermənistan hökuməti Almaniya kapitalını Ermənistan bazarında genişləndirməkdə maraqlıdır. Götüşdə bildirilib ki, Azərbaycanın "etnik təmizləmə" siyasəti nəticəsində 100 mindən çox soydaşımızın Dağlıq Qarabağdan "məcburi köçürülməsi" və mövcud humanitar vəziyyət, bunun aradan qaldırılması üçün Ermənistan hökumətinin addımları yetərli olmayıb. Mövcud problemlərin həllində beynəlxalq ictimaiyyətin dəstəyinin vacibliyi vurğulanıb. Annalena Berbok Almaniyanın Ermənistana 9 milyon avrodan çox humanitar yardım etməyi planlaşdırdığını bildirib.
Hansı 100 min zorla qovulan ermənidən söhbət gedə bilər? Almaniya rəsmisi ermənilərin bu yalanına inandımı?
Siyasi şərhçi Tofiq Abbasov "Bakı-Xəbər"ə açıqlamasında bildirdi ki, Ermənistan iştirak etdiyi platformaların hamısında yalan danışmaqdan başqa heç nə bacarmır: "Xarici qüvvələr onun mahiyyətini çox yaxşı anlayır. İndiki məqamda Ermənistanın belə yalan söyləməsi onun bundan sonra müsbətə doğru heç bir addım atmaq istəməməsindən xəbər verir. Bu səbəbdən də çalışır ki, heç nə etməyə-etməyə nəsə qazansın. Bəllidir ki, Avropa xristian təəssübkeşliyi zəminində çalışır Ermənistana kömək göstərsin, ona bacardığı dəstəyi versin. Hazırda bölgədə vəziyyət çox gərgindir. Ermənistanın özü bilər: ya sülh istəsin, ya da istəməsin. Ermənistan real addım atmasa, deməli, heç bir sülh istəmir. Özü çaşqın vəziyyətdədir, istəyir ki, bizi də öz durumuna salsın. Bu da mümkün deyil. Berbok çox gözəl anlayır ki, hansı qüvvə necə hərəkət edir və onun nəyə gücü çatır. Biz yeni reallıqları yaratmaqda çox irəliləmişik və əməkdaşlığa hazırlıqla bağlı mesajlar vermişik. Ermənistan bizi Avropa qarşısında çıxılmaz vəziyyətdə qoymağa çalışır. Azərbaycan diplomatiyası onlara layiqli cavablar verir. Berbok İrəvandan sonra Bakıya gəlir. Burada anlayacaq ki, kim tarixin düz, kim səhv tərəfindədir. Ermənistan qaranlıq tərəfdədir. Ancaq çalışır elə təqdim etsin ki, güya onun bütün uğursuzluğunda günahkar olan Azərbaycandır. Ancaq onun heç bir subutlar bazası yoxdur. Berbok gərək prosesləri düzgün anlasın və dəyərləndirsin. Azərbaycan heç kimi qovmayıb. Keçmiş qondarma qurum orada olan ermənilərin sayını 36 min kimi qeyd edirdi. Güya aç qalan bu sayda erməniyə ərzaq yardımı etməyi planlayırdılar. Deməli, Ermənistandan gələn səslər yalandı. Bütün bunlar məğlub durumda olan Ermənistanın yeganə çıxış yolunu yalan danışmaqda gördüyünü təsdiqləyir".
Məhəmmədəli QƏRİBLİ
