Bizim abituriyent müğənni Hissin mahnısını niyə bilməlidir? Bu nə biabırçılıq və nə təhsil?..
Özəl tədris müəssisələrindən birində 9-cu siniflər üçün təşkil olunan sınaq imtahanında Hissin "Mars" adlı mahnısındakı "mahnılarım qızıldır, paslanmır" sözləri yer alıb.
Sözügedən sual ictimaiyyətdə birmənalı qarşılanmayıb. Tanınmış sənətkarların klassik ifalarından yox, məhz Hissin mahnısından test tərtib edilməsi müzakirələr yaradıb.
Onu da xatırladaq ki, imtahanlara salınan sualların mətnləri zaman-zaman qınaq obyektinə çevrilir.
DİM: “Sözügedən sualın DİM-lə heç bir əlaqəsi yoxdur”
Məsələ ilə bağlı Dövlət İmtahan Mərkəzindən (DİM) “Bakı-Xəbər”ə bildirildi ki, sözügedən sualın DİM-lə heç bir əlaqəsi yoxdur: “Sualın DİM-ə hər hansı bir aidiyyəti yoxdur və DİM-in imtahanlarında istifadə olunmayıb. Mərkəzin məlumat bazasında belə bir sual yoxdur”.
Elçin Əfəndi: “Sualı hazırlayan şəxs özü də həmin müğənninin fanatı olub, onun pərəstişkarıdır və nəticə etibarilə ...”
Təhsil eksperti Elçin Əfəndi bildirdi ki, kiminsə hər hansı bir ifasından və yaxud da hər hansı bir əsərindən, musiqisindən müəyyən bir hissə verilməsində problem yoxdur: “Problem ondan ibarətdir ki, bu sualın qoyuluşu ümumi şərtlərə cavab versə də, bu, Dövlət İmtahan Mərkəzinin təyin etdiyi sual deyil. Hər hansı bir özəl müəssisənin tətbiq etdiyi və təqdim etdiyi sualdır. Burada təbii, könül istərdi ki, həmin o özəl müəssisə bizim korifey sənətkarların hər hansı ifasından cümlələr seçib sualda istifadə etsin. Görünür ki, sualı hazırlayan şəxs özü də həmin müğənninin fanatı olub, onun pərəstişkarıdır və nəticə etibarilə öz istəyini, sevgisini bu formada bildirir. Çünki buna bir başqa açıqlama verə bilmirəm. Əslində bu da doğru deyil. Çünki bir növ təbliğat vasitəsidir. Amma bu şəkildə təşviq olunması şagirdlərin də ən azından axtarış motorlarında olacaq. Müğənni kimdir? Hansı musiqiləri var deyə ən azı bunun reklamı getmiş olur. Düşünürəm ki, bu, təbii ki, özəl bir müəssisənin etdiyi davranışdır. Buna görə hər hansısa narahatlıq yoxdur. Dövlət tərəfindən, dövlət qurumu tərəfindən tərtib edilsəydi, bəli, o zaman buna ictimaiyyətin reaksiyası birmənalı olardı”.
Günel CƏLİLOVA
