14 dekabr - Gürcüstanda silahlı üsyan anonsu verildi... "cinayətə uymayın" əks çağırışlar var...

Dekabrın 14-də Gürcüstanda keçiriləcək altıncı prezident seçkiləri fonunda bu ölkədə siyasi gərginliyin yeni mərhələyə qədəm qoyduğu müşahidə olunur. Qeyd edək ki, bu dəfə seçkilər ilk dəfə dolayı yolla, 300 üzvdən ibarət seçki kollegiyası tərəfindən seçiləcək. 

Amma hazırkı prezident Salome Zurabişvili vəzifəsindən əl çəkmək istəmir və müxalifətin də onu dəstəklədiyi üzə çıxıb. Belə ki, Gürcüstan müxalifəti   Salome Zurabişvilini yeganə legitim hakimiyyət kimi tanıyıb və qarşıdan gələn seçkiləri boykot etdiyini bəyan edib.

Müxalifət koalisiyalarının birgə bəyanatında deyilir ki, Gürcüstanda müxalifət oktyabrın 26-da keçirilmiş parlament seçkilərini qeyri-legitim hesab edərək dekabrın 14-nə təyin edilmiş prezident seçkilərini boykot edir. Qeyd olunur ki, Gürcüstanın hazırkı prezidenti Salome Zurabişvili ölkədə yeganə legitim hakimiyyətdir: “Qeyri-legitim parlamentin prezident seçmək səlahiyyəti yoxdur, ona görə də Salome Zurabişvili Gürcüstanın prezidenti, Gürcüstan Müdafiə Qüvvələrinin ali komandanı və ölkənin xarici əlaqələr üzrə ali nümayəndəsi olaraq qalır”. Müxalifət hesab edir ki, mövcud siyasi böhrandan yeganə çıxış yolu yeni parlament seçkilərinin keçirilməsidir. Müxaliflər həmçinin iki həftəlik hökumət əleyhinə etirazlar zamanı həbs olunan bütün məhbusların azad edilməsini tələb edir. Bəyanatı “Birlik - Milli Hərəkat”, “Dəyişiklik Koalisiyası” və “Güclü Gürcüstan” koalisiyaları imzalayıb. Keçmiş baş nazir Georgi Qaxarianın rəhbərlik etdiyi digər müxalifət qüvvəsi olan “Gürcüstan naminə” ayrı bir bəyanat yayaraq, ümumiyyətlə yuxarıdakı tezislərlə razılaşdığını bəyan edib. Bir daha xatırladaq ki, Gürcüstanda prezident seçkiləri dekabrın 14-də keçiriləcək. İnauqurasiya dekabrın 29-na planlaşdırılıb. Hazırda seçkilərdə yeganə namizəd keçmiş futbolçu, “Xalqın Gücü” partiyasının yaradıcısı Mixail Kavelavşilidir. Onun namizədliyi  hakim “Gürcü Arzusu” partiyası  tərəfindən irəli sürülüb. Bunlar fonunda Gürcüstanın Dövlət Təhlükəsizliyi Xidməti bildirib ki, radikal müxalifət seçkiləri pozmağa və ölkədə iğtişaşlar törətməyə cəhd edəcək: “Dağıdıcı və kriminal fəaliyyətin təşkilatçıları 2024-cü il dekabrın 14-də Gürcüstanda keçiriləcək prezident seçkilərinin qarşısını almağı planlaşdırırlar. Bu məqsədlə təşkilatçılar vəziyyəti mümkün qədər gərginləşdirməyi düşünürlər. Onlar bu çirkin niyyətləri nəticəsində aksiya zamanı 2-3 qurban verməyi belə planlaşdırırlar”. Qurum əhalini cinayət planının iştirakçısı və ya qurbanına çevrilməmək üçün maksimum diqqətli olmağa, əllərində olan müxtəlif texniki vasitələrlə hər hansı şübhəli vəziyyəti və ya təxribat cəhdini qeydə almağa və dərhal müvafiq hüquq-mühafizə orqanlarına müraciət etməyə çağırır:

“Hazırda faktla bağlı Xüsusi İstintaq Xidməti tərəfindən araşdırma aparılır. İş üzrə obyektiv həqiqəti ən qısa müddətdə müəyyən etmək üçün sözügedən xidmətlə fəal əməkdaşlığa hazır olduğumuzu bildiririk”.

Rusiya Siyasi Araşdırmalar İnstitutunun direktoru Sergey Markov hesab edir ki, müxalifətin Qərbin dəstəyi ilə yeni və bu dəfə daha qəddar çevriliş cəhdinə başlayacağına gözləmək olar: “Onlar silahlı üsyana cəhd edəcəklər, böhranın pik nöqtəsi yaxınlaşır.  14 dekabrda prezident seçkiləri baş tutacaq, hakimiyyətə sadiq olan Mixail Kavelaşvili  şübhəsiz ki, seçiləcək. Amma müxalifət mütləq seçkiləri tanımayacaq və Zurabişvili tamamilə qanunsuz olaraq hakimiyyətdə qalmağa çalışacaq.Gürcüstan hökumətini devirmək istəyən “müharibə partiyası”na Qərb də dəstək verir. Parisdə Zurabişvili Notr-Dam Katedralinin açılışında olub və rəsmi olaraq, Zurabişvili Fransa vətəndaşıdır. Makron onunla söhbətindən sonra İvanişvili ilə söhbət edib və onu bir saat ərzində nəyəsə razı salmağa çalışıb. Bundan başqa, Makron Avropa parlamentarilərinin və AB ölkələrinin milli parlamentlərinin üzvlərindən ibarət böyük bir heyətin Tiflisə   gəlməsinə və üsyan cəhdində iştirakına icazə verib. Gürcüstanda gərginlik artıb. Gözlənilən  silahlı üsyanda kimlərin iştirak edəcəyi hələ tam bəlli deyil.  Birləşmiş Ştatlar və Böyük Britaniya indiyə qədər belə halda iştirakdan imtina edib. Bidzina İvanişvili onları Aleksandr Lukaşenko kimi iğtişaşları sərt şəkildə yatıra və tamamilə Rusiyanın tərəfinə keçə biləcəyi ilə hədələyib. Görünən odur ki, dekabrın 14-də prezident seçkilərindən dərhal sonra Zurabişvilidən prezident sarayını tərk etməsi tələb olunacaq. O imtina edəcək və onda da zorla qovulacaq”. Digər rus ekspert  Andrey Petrov isə qeyd edir ki, Gürcüstanda etiraz aksiyalarını genişləndirmək üçün təxribatçıların arsenalı demək olar ki, tükənib:  “Gürcüstan rəhbərliyinin daxili düşmənlərinin indi iki problemi var, birincisi, əhalinin böyük əksəriyyəti “oğurlanmış seçkilərə” inanmır və ən azı “Gürcü Arzusu”nun qərarına biganədir. Brüsselin avrointeqrasiya ilə bağlı danışıqları dayandırmasına güzgü effekti ilə cavab verilib. Bu, vətəndaşlarda hansısa etiraz yaratmayıb. Gürcüstanın adi vətəndaşlarının bu payıza etiraz edəcəkləri ciddi hal yoxdur, çünki onların həyatında heç bir mənfiyə dəyişmə yoxdur. Radikalların fikrincə, xalqda kütləvi narazılıq yaratmağın ən yaxşı yolu hakimiyyəti həddən artıq zorakılığa sövq etməkdir. Müxalifət göstərmək istəyir ki, gürcü xalqı öz demokratik dövlətini qəsbkarlardan geri alır, amma hamı görür ki, əslində boş-bekar gənclər gecələr atəş-fəşanlıqla əylənir, onlar hüquq-mühafizə orqanlarının əməkdaşları ilə döyüşürlər. Xalqın bu gənclik əyləncələri ilə heç bir əlaqəsi yoxdur. Amma  təxribatçıların və onların kuratorlarının fikrincə, bu halı davam etdirmək lazımdır. Lakin əmin ola bilərsiniz ki, gürcü müxalifətinin törətməyə hazır olduğu bu cinayət ya siyasi situasiyada heç nəyi dəyişməyəcək, ya da “Gürcü Arzusu”nun düşmənlərinə qarşı oynayacaq. Hakimiyyətdəkilər əhalinin əksəriyyətinin dəstəyini alırlar. Bu halda Gürcüstanın Dövlət Təhlükəsizliyi Xidməti bildirir ki, müxalifət prezident seçkiləri zamanı qətllər belə törətməyə hazırdır. Amma hakimiyyət üçün  vətəndaşları belə qətlin müxalifət tərəfindən törədildiyinə inandırmaq asan olacaq. Mümkün cinayət hərtərəfli araşdırılacaq və istintaq onun əsl təşkilatçılarını və icraçılarını ortaya çıxaracaq. Hansısa etirazçının ölümü müxalifətin öz əleyhinə olacaq, bu da təxribatçıların və radikalların dövlət əleyhinə hərəkətlərinə insanların sərt reaksiyasına səbəb olacaq”. Ekspert bildirir ki, qətl gözləntilərinin özü etirazlara mənfi təsir göstərəcək, çünki heç kim müxalifətin yanlış işi, hətta pul üçün ölmək istəməz”.

Samirə SƏFƏROVA