Paşinyan hələ də “Sovet Ermənistanının xəritəsi” üzərində oynayır, ərazi iddiasını isə yerə qoymur...
Əli Mustafa: “Nikol anlayır ki, Qarabağı itirdiyi kimi, sabah bu əraziləri də itirmək zorundadır”
Ermənistanın baş naziri Nikol Paşinyan SSRİ dövründəki sərhədlərdən imtina olunmasını dövlətçilikdən imtina edilməsi kimi qiymətləndirib. Paşinyanın fikrincə, əgər ölkə vətəndaşları beynəlxalq səviyyədə tanınmış əraziləri tanımasalar, o zaman Ermənistan qapılarını başqalarının üzünə açacaq:
“SSRİ dövründən qalma xəritələrdən imtina dövlətçilikdən və müstəqillikdən imtina demək ola bilər. Çünki biz müstəqilliyi Sovet Ermənistanı ərazisində əldə etmişik və beynəlxalq ictimaiyyət bizi belə tanıyıb. Beynəlxalq səviyyədə tanınan əraziyə sadiqlik ölkənin təhlükəsizliyi üçün vacibdir və bu buferdir”.
Maraqlıdır, Paşinyan niyə bu qədər SSRİ dövründəki xəritələrdən yapışıb?
“Bütün bunları bildiyindən, hər fürsətdə çalışır sovet Ermənistanının ərazilərindən, Alma-Ata razılaşmasından bəhs etsin”
Sözügedən məsələni “Bakı-Xəbər”ə şərh edən Demokratik Dəyişim Partiyası Təşkilat Komitəsinin sədri Əli Mustafa hesab edir ki, Paşinyanın SSRİ dövründəki xəritələrə önəm verməsi bir sıra məsələlərlə bağlıdır: “Paşinyan başa düşür ki, bu sərhədlər sürüşdürülüb. Yəni Azərbaycanın əraziləri hesabına Ermənistan böyüdülüb. Ermənistanın indiki ərazisi Azərbaycanın əraziləri qəsb edilərək genişləndirilib. Bu o deməkdir ki, Ermənistanın əraziləri bu ölkənin öz əraziləri deyil. Nikol anlayır ki, Azərbaycan və Ermənistan sovet Rusiyası tərəfindən işğal olunandan sonra regionda bir sıra proseslər gedib. 1920-ci, 30-cu, 50-60-cı illərdə müxtəlif bəhanələrlə Azərbaycan ərazilərini Ermənistana peşkəş ediblər. Paşinyan yaxşı bilir ki, ermənilər aborigen xalq deyil. 29 min kvadratkilometr əraziyə malik olan Ermənistan Azərbaycanın tarixi ərazilərində yaradılıb. İndi Ermənistan nəyin bahasına olursa olsun, həmin əraziyə sahiblənmək istəyir. Nikol anlayır ki, Qarabağı itirdiyi kimi, sabah bu əraziləri də itirmək zorundadır. Çünki bu ərazilər tarixi Azərbaycan torpaqlarıdır. Çünki Ermənistanın bizim ərazilərimiz hesabına yaradılmasına və sonra genişləndirilməsinə dair çoxsaylı tarixi faktlar var. Bu səbəbdən Paşinyan belə canfəşanlıq edir. Bütün vasitələrlə çalışır ki, Azərbaycan bununla bağlı tarixi məqamları qaldırmasın və güzəştə getsin. Çünki Ermənistanın xeyrinə edilən saxtakarlıqlar yaxın tarixdə baş verib. Ona görə də bütün bu həngamə onun üzərindədir. O üzdən, hesab edirəm ki, biz bu məsələlərin üzərinə getməliyik. Haqqımız var ki, bizə edilən ədalətsizliyi gündəmə gətirib torpaqlarımızı tələb edək. Azərbaycan 1918-ci ildə könüllü olaraq Ermənistana 9 min kvadratkilometr ərazi veribsə, 1920-ci ildə xalqımızın rəyi nəzərə alınmadan 20 min kvadrat kilometr ərazi bolşeviklər tərəfindən Ermənistana verilib. O baxımdan bizdən oğurlanan 20 min kvadrat kilometr mübahisəlidir. Bütün bunları Paşinyan bildiyi üçün hər fürsətdə çalışır ki, sovet Ermənistanının ərazilərindən, Alma-Ata razılaşmasından bəhs etsin”.
Vidadi ORDAHALLI
