Böyük qayıdışın Xankəndi mərhələsi - böyük şəhərimiz həmişə boş qala bilməz ki...
Yeni yaranmış situasiyada tezliklə Böyük Qayıdış Xankəndinin məcburi köçkün olan azərbaycanlı əhalisini də əhatə edəcək. Məcburi köçkünlüklə üzləşən bütün həmvətənlərimiz kimi xankəndililər də daim dövlətimizin himayəsində olublar.
Ulu Öndər Heydər Əliyevin müəyyənləşdirdiyi siyasi xəttə uyğun olaraq Prezident İlham Əliyev bu kateqoriyadan olan vətəndaşlarımıza daim böyük diqqət və qayğı göstərib. Məcburi köçkünlər Birinci vitse-prezident Mehriban xanım Əliyevanın həssas münasibətini hər zaman hiss edib, onun dəstək və köməyindən bəhrələniblər. Bu gün işğaldan azad edilmiş ərazilərin dirçəlişi, bərpası və yenidən qurulması, Böyük Qayıdış proqramı üzrə tədbirlərin sürətlə həyata keçirilməsi istiqamətində məqsədyönlü iş aparılır, məcburi köçkünlər mərhələli şəkildə doğma yurda dönürlər. Xankəndidən olan məcburi köçkünlərin də bu prosesə qoşulacağı gün uzaqda deyil. Çünki Azərbsycanın bu böyük və tarixi şəhəri daim boş qala bilməz.
Gələn ilin yaz aylarından biz Xankəndidə kifayət qədər insanın yaşadığını görəcəyik
Dövlət rəsmiləri tez-tez köçkünlərin qayıdışa hazırlanması ilə bağlı həyata keçirilən tədbirlər, işğaldan azad edilmiş ərazilərdə yenidən salınmış və bərpa olunmuş yaşayış məntəqələrinə köçürülmənin gedişi və qaydaları haqqında görüş iştirakçılarını məlumatlandırıb, azərbaycanlı əhalinin Xankəndi şəhərinə qayıdışının təşkili ilə bağlı qarşıda duran vəzifələrdən danışır, dövlət başçısının bununla bağlı tapşırıqlarını onlara çatdırırlar.
İşğaldan azad edilmiş bütün ərazilərdə Azərbaycanın dövlət suverenleyinin bərpa edilməsinə görə dövlətimizin başçısına və rəşadətli silahlı qüvvələrimizin mənsublarına minnətdar olmalıyıq, xalqımızın haqq işi uğrunda canını qurban verən şəhidlərimizə Allahdan rəhmət, qazilərimizə şəfa diləməliyik.
Bir müddət əvvəl, Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayev Gəncə şəhərində Xankəndi şəhərindən və Kərkicahan qəsəbəsindən məcburi köçkün düşmüş azərbaycanlıların bir qrupu ilə görüşüb.
Xankəndiyə qayıtmağa, yenidən tarixi yurd yerlərində yaşamağa hazır olduqlarını deyən sakinlər işğaldan azad edilmiş bütün ərazilərdə Azərbaycanın dövlət suverenleyinin bərpa edilməsinə görə dövlətimizin başçısına minnətdarlıq ifadə ediblər.
Görüşdə Xankəndindən olan məcburi köçkün icmalarının nümayəndələri, ziyalılar, ictimai fəallar iştirak edib, qayıdışa hazırlıq məsələlərinə dair rəy və təkliflərini səsləndiriblər.
Artıq gələn ilin yaz ayından biz Xankəndidə kifayət qədər insanın yaşadığını görəcəyik. Bu sözləri millət vəkili Vüqar İsgəndərov geniş müsahibəsində bildirib:
"Bildiyiniz kimi, Xankəndidə artıq polis şöbəsi də fəaliyyətdədir və insanların yaşayışı üçün bütün normal şərait yaradılacaq. Azərbaycan konsitusiyası altında normal yaşayış olacaq və ağlı başında olan erməni vətəndaşlarımız da Xankəndiyə qayıda bilərlər".
Hər zaman Xankəndiyə qayıdacaqları günün xəyalını quran sakinlər...
Böyük qayıdış konsepsiyasının Xankəndi və ətraf ərazilərə nə zaman şamil olacağı ilə bağlı fikirlərini ifadə edən politoloq Məhəmməd Əsədullayevin sözlərinə görə, Azərbaycanın böyük qayıdış konsepsiyasının işğaldan azad edilmiş ərazilərə tətbiqi yönündə ardıcıl işlər görülür: "Xankəndi və ətraf ərazilərdə qayıdış prosesi aparmaq üçün ilk növbədə təhlükəsizlik tədbirləri yüksək səviyyəyə çatdırılmalıdır. Rusiya sülhməramlıları hələ də buradadır. Müəyyən dərəcədə meşələrdə terrorçu qüvvələrin qaldığı təxmin edilir. Təhlükəsizlik üst səviyyəyə qaldırıldıqdan sonra böyük qayıdış Xocavənd, Əsgəran, Xocalıda həyata keçiriləcək. Artıq iki aydan çoxdur ki, antiterror əməliyyatı başa çatıb. İki aya qayıdış konsepsiyasını bu ərazilərdə tətbiq etmək tezdir. İlk növbədə təhlükəsizlik tam şəkildə təmin olunmalıdır. Təhlükəsizlik orqanları bu sahədə lazimi tədbirlər həyata keçirməkdə davam edir. Bundan sonra isə qayıdış konsepsiyası həyata keçiriləcək.
Düşünmürəm ki, Qarabağı könüllü şəkildə tərk edən ermənilər bura qayıdıb birgəyaşayışı qəbul etsinlər. Azərbaycan erməni sakinlərin hüquqlarının ölkə Konstitusiyası əsasında təmin ediləcəyini dəfələrlə vurğulayıb. Amma göründüyü kimi, əksəriyyət bunu qəbul etmədi. Erməni sakinlərin yenidən kütləvi sürətdə Qarabağa qayıdacağını düşünmürəm. Xankəndidən, Xocalıdan Ağdərədən, Xocavənddən köçkün düşən soydaşlarımızın geri qayıtma prosesi gələn ilin yaz aylarından başlaya bilər".
19-20 sentyabr tarixlərində Azərbaycan Ordusunun Qarabağda icra etdiyi antiterror tədbirlərindən sonra bölgədə sülhün tam bərqərar edilməsi Xankəndidən olan məcburi köçkünlərin doğma torpaqlarına qayıdışını sürətləndirəcək. Artıq Xankəndidən olan ailələr səbrsizliklə həmin günü gözləyirlər.
1988 - ci ildə doğma evlərini tərk etmək məcburiyyətində qalmış Quliyevlər ailəsi erməni qonşularının azərbaycanlılara qarşı olan nifrətini hər zaman duyduqlarını bildirirlər.
Hər zaman Xankəndiyə qayıdacaqları günün xəyalını quran sakinlər indi bu arzunun astanasındadırlar.
Məhəmmədəli QƏRİBLİ
Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
