Paşinyan bu dövlətin başçısını İrəvanda görmək istəmir...
Mübariz Göyüşlü: "Ermənistan - xüsusilə Paşinyanın özü - qeyd edilən ölkələrin hər biri üçün arzuolunmaz ölkədir"
Ermənistanın Baş naziri Nikol Paşinyan Avrasiya İqtisadi İttifaqının (Aİİ) Ali İqtisadi Şurasının iclasının İrəvanda keçirilməyəcəyini bildirib. O, bu qərarın İttifaqın bütün üzvlərinin Ermənistan üçün arzuolunan olmaması ilə əlaqədar olduğunu qeyd edib.
Paşinyan parlamentdə çıxışı zamanı belə deyib: "Şəxsən mən sammitin Ermənistanda keçirilməsini qeyri-münasib hesab edirəm, çünki Aİİ-nin Ali İqtisadi Şurasının heç də bütün üzvləri Ermənistan üçün arzuolunan deyil".
Qeyd edək ki, Aİİ Ali İqtisadi Şurasında Ermənistan, Rusiya, Belarus, Qazaxıstan və Qırğızıstan var. Görəsən, Ermənistan bu ölkələrin hansını arzuolunmaz dövlət sayır.
Bildirək ki, Rusiya prezidentinin köməkçisi Yuri Uşakovun sözlərinə görə, dekabrın 25-də Aİİ-yə sədrlik edən Ermənistanın xahişi ilə Ali Şuranın iclası Rusiyanın Sankt-Peterburq şəhərində keçiriləcək. İclasa Paşinyanın özü sədrlik edəcək.
"Ermənistanın yürütdüyü siyasət, Paşinyanın apardığı fəaliyyət İttifaqa üzv dövlətlərin maraqlarına cavab vermir və situasiyalardan narazı qalırlar"
Cross Media Təhlil Mərkəzinin analitiki, siyasi şərhçi Mübariz Göyüşlü "Bakı-Xəbər"ə açıqlamasında qeyd etdi ki, Ermənistan - xüsusilə Paşinyanın özü - qeyd edilən ölkələrin hər biri üçün arzuolunmaz ölkədir. Xüsusən də Rusiya və Belarus üçün arzuolunmaz ölkədir. Hesab edirəm ki, artıq Qazaxıstan və Qırğızıstan üçün də belə bir vəziyyət yaranır. Ermənistanın yürütdüyü siyasət, Paşinyanın apardığı fəaliyyət bu dövlətlərin maraqlarına cavab vermir və situasiyalardan narazı qalırlar. Bu baxımdan Paşinyan elə doğru zənn edir ki, Ermənistan adıçəkilən ölkələr və kollektiv təhlükəsizlik üçün arzuolunmazdır. Nikol Paşinyan stabil siyasətçi olmadığı üçün həmin ölkələr tərəfdən qəbul olunmur. Həmçinin, onun bütün fəaliyyəti təşkilat daxilində narahatlıqlara səbəb olur. Əslində nonsens sayıla biləcək açıqlamalarla çıxış edir, toplantılara qatılmır. Faktiki olaraq təşkilatı pat vəziyyətinə gətirib çıxarıb. Rusiya və Belarus üçün arzuolunmaz ölkə məhz Ermənistandır. Qeyd edilən ölkələr Ermənistan və Paşinyanın yürütdüyü siyasətdən narazıdır".
Günel CƏLİLOVA
