“44 gün – Tarixi zəfər” adlı kitabın III cildinin növbəti təqdimatı keçirilib - FOTO
Mədəniyyət Nazirliyi Respublika Xatirə Kitabı Redaksiyası dekabr ayının 4-də “44 gün – Tarixi zəfər” adlı kitabın III cildinin növbəti təqdimatını keçirib.
Müharibə, Əmək və Silahlı Qüvvələr Veteranları Təşkilatında keçirilən təqimat mərasimində Bakının Abşeron, Binəqədi, Xətai, Sabunçu, Xəzər, Nizami, Qaradağ, Nərimanov, Pirallahı, Nəsimi, Suraxanı, Səbail, Yasamal rayonlarından və Sumqayıt şəhərindən olan şəhid ailələri üzvləri, Müharibə, Əmək və Silahlı Qüvvələr Veteranları Təşkilatının sədri, polkovnik Cəlil Xəlilov, Azərbaycan Mətbuat Şurasının İdarə Heyətinin üzvü, “Bakı-Xəbər” qəzetinin baş redaktoru Aydın Quliyev, Mədəniyyət Nazirliyinin nümayəndəsi Kəmalə Əlyarova və başqaları iştirak edib.
Şəhidlərimizin və ümummilli lider Heydər Əliyevin xatirəsi 1 dəqiqəlik sükutla yad edilib, Azərbaycanın dövlət himni səsləndirilib.
Təqdimat mərasimini Müharibə, Əmək və Silahlı Qüvvələr Veteranları Təşkilatının sədri, polkovnik Cəlil Xəlilov açdı və Respublika Xatirə Kitabı Redaksiyasının həyata keçirdiyi misilsiz işlərdən danışıb.
Respublika Xatirə Kitabı Redaksiyasının baş redaktoru Nəzakət Məmmədova tədbirə toplaşan şəhid ailələrinə, bu tədbirin təşkilində Xatirə Kitabına köməklik göstərən Müharibə, Əmək və Silahlı Qüvvələr Veteranları Təşkilatının rəsmilərinə təşəkkürünü bildirib. “Xoş haldır ki, Respublika Xatirə Kitabının Vətən müharibəsində həlak olmuş üç mindən çox şəhidlə bağlı “44 gün – Tarixi zəfər” adlı çoxcildliyinin III cildinin təqdimat mərasimini Zəfər sevincimizdən doğan qürur hissi ilə keçiririk”-deyə baş redaktor qeyd edib.
Azərbaycan Mətbuat Şurasının İdarə Heyətinin üzvü, “Bakı-Xəbər” qəzetinin baş redaktoru Aydın Quliyev də çıxış edib. A.Quliyev bu redaksiyanın şəhidlərimizin xatirəsinin əbədiləşdirilməsi yönündə gördüyü genişmiqyaslı işləri qeyd edib və bildirib ki, torpaqlarımızın ərazi bütövlüyü uğrunda şəhid olan oğullar təkcə ailələri üçün deyil, bütün xalqımız üçün əzizdir, unudulmazdır.
Tədbirdə şəhid kapitan Nurlan Hamlet oğlu Mustafayevin anası Rəhlə Ramazanova çıxış edib, şəhid şair Teymur Turanın atası oğlunun şeirlərindən və aforizmlərindən ibarət kitabının çap olunduğunu deyib.
Təqdimat mərasimində, həmçinin, Xatirə Kitabı Redaksiyasının ərsəyə gətirdiyi, layihə rəhbəri Nəzakət Məmmədova olan və Vüsal Nurunun ekranlaşdırdığı “Vətən daşı... və ya 44 günün dastanı” adlı layihə əsasında çəkilən Vətən müharibəsi şəhidi Məhəbbət Quliyevə həsr olunan sənədli film də təqdim edilib.
Mərəsimdə qeyd olunub ki, kitabın I və II cildlərində ümumilikdə 2000-ə yaxın şəhid haqqında ensiklopedik məlumat yer alıb.
Xatırladaq ki, “44 gün – Tarixi zəfər” adlı ki¬ta¬bın birinci cildində 44 günlük Vətən müharibəsi ilə yanaşı, 2016-cı ilin Aprel döyüşləri və Tovuz hadisələri zamanı həlak olanların da adları əbədiləşdirilib.
Məlumat üçün bildirilib ki, müasir Azərbaycan dövlətinin qurucusu və memarı, ümummilli lider Heydər Əliyevin qayğısı və təşəbbüsü ilə yaradılmış, onun xeyir-duası ilə fəaliyyətə başlamış Respublika Xatirə Kitabı insan resurslarını əbədiləşdirən tarixi sənəd, tarixlə cəmiyyət arasındakı həqiqətləri, müharibə ağrılarını özündə geniş əks etdirən ensiklopedik salnamədir. Vurğulanıb ki, bu missiyanı öz üzərinə götürərək Xatirə Kitabı Redaksiyası İkinci Dünya müharibəsi, Əfqanıstan döyüşləri, 20 Yanvar faciəsi, Xocalı soyqırımı, Azərbaycanın ərazi bütövlüyü uğrunda gedən döyüşlərdə həlak olmuş, itkin düşmüş, əsir götürülmüş vətəndaşlarımız, Milli Qəhrəmanlarımız, Azərbaycanın ərazi bütövlüyü uğrunda şücaət göstərmiş şəxslər haqqında da əhatəli materiallar toplayaraq ayrı-ayrı kitablar dərc edir.
Respublika Xatirə Kitabının indiyədək iyirmiyə yaxın cildi çap olunub. 2017-ci ildə Respublika Xatirə Kitabı Redaksiyası Dövlət Təhlükəsizlik Xidməti nəzdində fəaliyyət göstərən “Əsir, itkin düşmüş, girov götürülmüş vətəndaşlarla əlaqədar Dövlət Komissiyası”nın İşçi qrupu ilə birgə Azərbaycanın ərazi bütövlüyünə təcavüz edən Ermənistanın Dağlıq Qarabağ və ətraf rayon¬lara hücumu, torpaqlarımızın işğalı zamanı əsir və girov götürülmüş, həmçinin naməlum şəraitdə itkin düşmüş hərbçi və mülki şəxslərin sonrakı taleləri araşdırılıb və dörd cilddən (iki dildə) ibarət kitab hazırlanıb.
Eyni zamanda, redaksiya 44 günlük Vətən müharibəsində şəhid olmuş şəxlərin adlarının və xatirələrinin əbədiləşdirilməsi məqsədilə bir neçə cildlik kitab üzərində çalışır. Kitabın artıq 1-ci, 2-ci və 3-cü cildi işıq üzü görüb, 4-cü cild üzərində işlər aparılır. Bu çoxcildlik ensiklopedik nəşrlər ictimai müstəvidə xüsusi rol oynayır.
Redaksiyanın hazırladığı “Qələbə - 75: Azərbaycan xalqının mübarizə əzmi” kitabı da tarixlə cəmiyyət arasındakı faktiki prosesləri özündə ehtiva edir. Burada Faşizm üzərində qələbənin 75 illiyi geniş təqdir olunub, 1941-1945-ci illərdə alman faşizminə qarşı döyüşən Azərbaycan vətəndaşlarının qəhrəmanlıq və şücaəti xüsusi rakursda xarakterizə edilib, Sovet İttifaqı Qəhrəmanı adına layiq görülmüş azərbaycanlılar, müharibədə örnək, hünər göstərmiş cəsur qadınlarımız barədə tutarlı və ma¬raqlı fikirlər yer alıb.
Respublika Xatirə Kitabı Redaksiyası, həmçinin, “Bakı Xəbər” qəzeti ilə birgə layihəsi əsasında “Şəhidlər ölməz, Vətən bölünməz!” silsiləsindən Qarabağ müharibəsində həlak olanların adlarının və xatirələrinin əbədiləşdirilməsi məqsədilə bir neçə kitab nəşr edib, həmin kitabların təqdimatını keçirib. Redaksiya, eyni zamanda, «Vətən daşı... və ya 44 günün dastanı» adlı layihə əsasında 8 sənədli film çəkib. Bu filmlərin 4-ü geniş ictimaiyyətə təqdim olunub.
Qeyd olunub ki, Respublika Xatirə Kitabı yaddaşımızın tarix salnaməsidir və redaksiya dövlət başçısı İlham Əliyevin diqqət və qayğısı altında bugünkü və gələcək strateji işlərini də eyni məhəbbət və həvəslə davam etdirmək üçün əzmlə çalışır.
Tədbirdən hazırladığımız geniş yazını növbəti sayımızda təqdim edəcəyik.
İradə SARIYEVA
