Gürcüstanın baş naziri Avropa İttifaqına çağırış etdi – şantaja son qoyun...
Tiflisdə baş verənləri dəyərləndirən Gürcüstanın baş naziri İrakli Kobaxidze avropalı siyasətçilərin Avropa İttifaqına (Aİ) üzvlük müzakirələrinə başlamaq üçün ölkəsini şantaj etməyə başladığını deyib.
Ölkənin Aİ-yə üzvlük danışıqlarını 2028-ci ilə qədər dayandırmaq qərarına gəldiklərini xatırladan Kobaxidze müxalifətin bu qərara reaksiya verdiyini və paytaxt Tiflisdə aksiyalar keçirdiyini bildirib. Kobaxidze qeyd edib ki, bu qərar Gürcüstanın Aİ-yə inteqrasiya prosesini dayandırmaq demək deyil və Gürcüstanın 2030-cu ildə Aİ-yə tamhüquqlu üzv olması üçün səylərini davam etdirəcəklərini vurğulayıb.
Aİ-nin Gürcüstandakı səfiri Pavla Qerçinskini ictimaiyyətə yalan məlumat verməkdə günahlandıran Kobaxidze deyib ki, onlar Gürcüstan hökumətinin Avropaya inteqrasiya prosesini dayandırması ilə bağlı yalan məlumatlar yayıblar. Kobaxidze Herçinskinin seçkidən əvvəl açıq şəkildə “radikal” müxalifəti dəstəklədiyini və ona diplomatik üsullarla “cavab vermək” məcburiyyətində qala biləcəklərini deyib.
Bəzi Avropa rəsmilərinin Aİ-yə üzvlük danışıqlarına başlamaq üçün hökuməti dəfələrlə şantaj etdiyini deyən Kobaxidze 2028-ci ilə qədər bu məsələni gündəmə gətirməmək qərarına gəldiklərini bildirib.
Kobaxidze avropalı siyasətçilərin, xüsusən də Ukrayna müharibəsindən sonra Gürcüstanı Aİ-yə üzvlük danışıqlarına başlamaq üçün şantaj etdiyini dilə gətirib: "Ona görə də sadə bir şey deyirik. Bütün bu məsələlərdə şantajı dayandırın. Əgər danışıqlara başlamaq istəyirlərsə, bunu masaya qoysunlar, mən də bu gün imzalayıb".
Bundan əvvəl də baş nazir Kobaxidze bəzi avropalı siyasətçilərin Gürcüstanın daxili işlərinə qarışdıqlarını və Aİ-nin pulları ilə Gürcüstanı şantaj etdiyini bildirib: “Bütün bunları nəzərə alaraq, Aİ ilə danışıqlara başlamaq məsələsini 2028-ci ilin sonuna qədər gündəmə gətirməmək qərarına gəldik”.
Qeyd edək ki, iki gün əvvəl Avropa Parlamentinin bəyanat yayaraq oktyabrın 26-da Gürcüstanda keçirilən parlament seçkilərində “ciddi pozuntuların” olduğuni iddia edib və seçkilərin beynəlxalq nəzarət altında bir il ərzində təkrar keçirilməsinə çağırıb.
TAHİR
