Aİ-nin Ermənistandakı missiyası Azərbaycana qarşı kəşfiyyat müharibəsini gücləndirir...
Akif Nağı: “Azərbaycanın da mövqeyini regonda zəiflətmək üçün hərəkətə keçməyə, təxribat törətməyə çalışırlar”
Avropa İttifaqının (Aİ) Ermənistandakı hərbi missiyası son vaxtlar fəallığını daha da artırıb və əsas diqqət də ona yönəlib ki, Azərbaycan ordusu və sərhəd mühafizə qüvvələrimizin dislokasiyası haqda daha geniş məlumat toplayıb Ermənistana ötürsünlər.
Avropa ölkələrindən gələn diplomat və siyasi xadimlər də Azərbaycan sərhədinə bu niyyətlə gəlirlər. Bir sözlə, Aİ-nin Ermənistandakı missiyası Azərbaycana qarşı kəşfiyyat müharibəsini gücləndirir.
“Aİ missiyasının, Qərbdən gələnlərin Ermənistan-Azərbaycan sərhədində apardıqları müşahidə, kəşfiyyat işləri onu göstərir ki, onlar Ermənistanı yeni təxribata hazırlayırlar”
Məsələyə şərh verən Azad Vətən Partiyasının sədri Akif Nağı “Bakı-Xəbər”ə bildirdi ki, Ermənistanın Azərbaycana qarşı hərbi təxribat törətməsi ilə bağlı məsələ ikitərəfli məsələdir. “Yəni bir tərəfdən, burda Qərb, Avropa Birliyi çox fəaldır. Qərbin, Aİ-nin öz məqsədləri var və öz məqsədlərinə uyğun olaraq Ermənistandan istifadə etməyə çalışırlar. Onlar həm regionda gərginlik yaratmaq, həm Rusiyaya qarşı ikinci cəbhə açmaq, həm də Azərbaycanın da mövqeyini regonda zəiflətmək üçün hərəkətə keçməyə, təxribat törətməyə çalışırlar. Azərbaycanın regionda lider mövqeyə malik olması Qərbin xoşuna gəlmir, bu onun istəklərinin ziddinədir. Çünki Azərbaycan onların regiona girməsinə mane olur. Daha doğrusu, Azərbaycan qarşılıqlı, səmərəli əməkdaşlıq təklif edir. Yəni Qərb, Fransa, Almaniya, ABŞ və başqaları regiona daxil olmaq istəyirsə Azərbaycanın mövqeyi ilə hesablaşmalıdırlar. Azərbaycan əməkdaşlıq üçün açıqdır. Amma onlar Azərbaycana özlərinin hansısa şərtlərini diqtə etmək, Azərbaycandan alət kimi istifadə etmək istəyirlərsə, Azərbaycan onlarla razılaşmır, ona görə də ölkəmizə qarşı bu cür aqressivdirlər. Belə suallar olur ki, niyə Azərbaycana qarşı belə qərəzli qətnamələr qəbul edirlər, düşmənçilik addımları atırlar. Bu, Azərbaycanın özünü müstəqil aparması ilə bağlıdır, biz onların ssenarisi ilə hərəkət etmirik. Ona görə də Qərb regionda vəziyyəti gərginləşdirməkdə yuxarıda qeyd etdiyim iki məqsəddən çıxış edir”.
Azərbaycana qarşı bu mövqeyin digər tərəfinin Ermənistan olduğunu deyən A.Nağının sözlərinə görə, Ermənistan özü də başa düşür ki, Qərb ondan alət kimi istifadə etmək istəyir, amma o da öz maraqlarını həyata keçirməyə çalışır. “Ermənistan Azərbaycana qarşı revanşist müharibə aparmaq həvəsindədir. Elə güman edirlər ki, Azərbaycanın onlara vurduğu zərbədən özlərinə gəliblər və bizim mövqeyimizi sarsıda bilərlər. Belə bir utopik, qeyri-real arzulara düşüblər. Bəlkə də xəyal edirlər ki, Azərbaycana qarşı addım atıb onu məğlub edə bilərlər. Belə bir ümidlərlə yanaşırlar. Baxırlar ki, Qərb onlara yüksək səviyyədə silahla kömək edir, kəşfiyyat məsələsində, maddi anlamda dəstək göstərir. Ermənistan başa düşür ki, Qərbin Azərbaycana qarşı çirkin niyyətləri var, eyni zamanda onun niyyəti əsasən Rusiyaya qarşıdır. Qərbin Rusiyaya qarşı niyyətləri olduğu üçün Ermənistan düşünür ki, onlara külli miqdarda silah, hərbi təlimatçılar veriləcək, hətta bəzi ölkələrin hərbiçiləri də Ermənistan tərəfindən Azərbaycana qarşı döyüşdə iştirak edəcəklər. Belə utopik hisslərə qapılan Ermənistan Azərbaycanı “çökdürmək” arzusu ilə yaşayır. Ona görə də Ermənistan Qərbin hərtərəfli dəstəyinə bel bağlayıb ciddi şəkildə müharibəyə hazırlaşır. Bu hər iki tərəfin mövqeyində artıq özünün təzahürlərini tapır. Yəni Aİ Azərbaycanla Ermənistan arasındakı şərti sərhəddə missiyasını gücləndirməyə çalışır. Eyni zamanda son olaraq Polşa prezidentinin regiona səfər etməsi, açıq şəkildə Azərbaycana qarşı mövqe nümayiş etdirməsi, Arazdəyən, Kərki istiqamətində nümayişkaranə şəkildə müşahidə həyata keçirməsi, bunlar hamısı bizə bir mesajdır ki, sizə qarşı Ermənistandan istifadə edə bilərik. Bu, eyni zamanda “biz sizin yanınızdayıq” mesajı ilə Ermənistanı ürəkləndirmək məqsədi daşıyır. Ermənistan da ümid edir ki, ola bilsin, doğrudan da onların hərəkəti real bir hərəkətə çevriləcək. Polşa prezidentinin bu hərəkəti Qərblə razılaşdırılmış bir hərəkətdir. Polaşadan həmişə regionda Rusiyaya qarşı Qərbin bir forpostu kimi istifadə olunurdu. Bilirsiz ki, son aylarda Qərb artıq Polşanın ərazisində ciddi planlar qurur, oradakı hərbi bazanın genişləndirilməsi, Polşaya ABŞ-dan, Avropa ölkələrindən maliyyə dəstəyinin verilməsi istiqamətində addımlar atılır. Polşa da bununla razılaşır. Polşanın bir tərəfdən Rusiyaya qarşı məqsədləri var, digər tərəfdən, özü də digər aparıcı Qərb dövlətləri ilə birgə regionda öz mövcudluğunu təmin etmək istəyir. Ona görə də, bir tərəfdən, Azərbaycanla öz xoş münasibətlərini saxlayır, digər tərəfdən isə başqalarının əlində alət olmaqla regionda başqa niyyətləri təbliğ etməyə çalışır. Yəni vəziyyət bu şəkildədir. Eyni zamanda da Ermənistan sürətlə silahlandırılır. Ermənistan həm Qərbdən, eyni zamanda Hindistandan, Yunanıstandan silahlar alır, gözünməmiş bu silahları öz hərbi arsenalına əlavə edir. Bunların heç biri təsadüfi deyil və dediyimiz məqsədlərə xidmət edir. Üç-dörd variantda işlər təşkil etməyə çalışırlar ki, nəyəsə nail olsunlar. Məqsədləri odur ki, ya Azərbaycana təcavüz edib torpaqlarımızı yenidən işğal etsinlər, ya Azərbaycanın qalib imicinə kölgə salsınlar, ya regionda qarşıdurmalar, xaos yaratsınlar. Qərb çox xoşlayır ki, hansısa bir ölkədə, hansısa bir bölgədə xaos yaratsın, sonra da həmin xaosu özü idarə etsin. Qərb tərəfindən istifadə olunan “idarə olunan xaos” nəzəriyyəsi var. Onlar təxribatlara hazırlaşıb onu törədirlər. Bu gün o təxribatları bizim regionda törətmək məqsədi güdürlər. Aİ missiyasının, Qərbdən gələnlərin Ermənistan-Azərbaycan sərhədində apardıqları müşahidə, kəşfiyyat işləri onu göstərir ki, onlar Ermənistanı yeni təxribata hazırlayırlar.
Azərbaycan bu xüsusda nə edir? Azərbaycan bu təxribatlara qarşı öz hazırlıq işlərini görür, müttəfiqləri var, öz hərbi arsenalını getdikcə genişləndirir. Onlar elə bilirlər ki, Azərbaycan 2020-ci ildəki vəziyyətdədir. Çünki Azərbaycan 2020-ci ildə həm ordunun hazırlığı, həm də silah – sursat baxımından hamı üçün bir sürpriz fakt ortaya qoydu. Yəni heç kəs bilmirdi ki, Azərbaycan bu şəkildə müharibəyə hazırlaşa, bu cür silahlara malik ola, bu cür taktiki hərəkətlər həyata keçirə bilər. Azərbaycan İkinci Qarabağ müharibəsindən artıq qalib dövlət kimi müəyyən nəticələr çıxarıb. Yəni arxayın olmaq olmaz ki, mənim silahların məğlubedilməzdir, onu təkmilləşdirməyə, başqa vasitələr tapmağa ehtiyac yoxdur. Azərbaycan bunu başa düşür və öz silahlarının təkmilləşdirilməsi işini həyata keçirir. Düzdür, biz hərbini bilmirik, amma ümid edirik ki, Azərbaycan onlardan bu məsələdə də on addımlarla irəlidədir. Onlar Azərbaycanın arxasınca gəlirlər, bizim istifadə etdiyimiz pilotsuz aparatlarla, dronlarla məşğuldurlar. Nə qədər silahlansalar da Azərbaycandan irəli keçə, ordumuzun hazırlıq səviyyəsinə gələ bilmirlər. Azərbaycan 44 günlük müharibədə bütün dünyaya Azərbaycan əsgərinin, ordusunun gücünü, səviyyəsini göstərdi. O səviyyəyə isə Ermənistan heç vaxt çata bilməz, heç yaxınlaşa bilməz. Avropa dövlətlərinin çoxu da Azərbaycanın hərbi hazırlıq səviyyəsindən geridə qalır...”
A.Nağı qeyd etdi ki, Azərbaycan ordusunu yüksək hazırlıq səviyyəsində saxlamalıdır, orduya yüksək məbləğdə maliyyə ayırımları olmalıdır, silah arsenalı daim yenilənməlidir: “Ciddi şəkildə təhlükəsizlik tədbirləri görülməlidir, düşmənin bütün kəşfiyyat təxribatlarının qarşısı alınmalıdır. Kənardan müşahidələr göstərir ki, ordunun rəhbərliyində, şəxsi heyətində Azərbaycan davamlı kadr islahatları həyata keçirir. O istiqamətdə də işlər gedir. Azərbaycan cəmiyyətinin daxili birliyi, hakimiyyət-xalq birliyi, monolitliyi qorunub saxlanılmalıdır. Ona mane olan qüvvələr, təxribat törətmək istəyənlər sıradan çıxarılmalıdır, zərərsizləşdirilməlidir. Azərbaycan o situasiyaya hazır olmalıdır ki, kimlərinsə təhriki ilə Ermənistan addım atarsa bu ölkə atdığı addıma peşman olmalıdır. Azərbaycan həm o təxribatların zərərsizləşdirilməsi üçün əks tədbirlər görməlidir, eyni zamanda gələcəkdə Ermənistanın Azərbaycana qarşı hər hansı bir təxribat törətmək cəhdini ürəyindən keçirməməsi üçün bir sıra qabaqlayıcı tədbirlər görməlidir” - deyə A.Nağı qeyd etdi.
İradə SARIYEVA
