Azər Həsrət: "O video Kəlbəcərin işğalı zamanı çəkilib və həmin ildə kadrda görünən rəngdə helikopter olmayıb"
Fransanın Arte.TV telekanalı Azərbaycan haqqında heç bir əxlaq normasına və insanlığa sığmayan saxta, riyakar "sənədli film" çəkib. "Ermənistan: Hadisələrin mərkəzində" adlı başdan-başa böhtan olan "sənədli film"in bir hissəsi 90-cı illərdə Birinci Qarabağ müharibəsi zamanı ermənilərin guya "deportasiya"sına həsr olunub.
"Sənədli film" istehsalçılarının "ermənilərin deport olunması" kimi təqdim etdikləri kadrlar isə Kəlbəcərin işğalı zamanı azərbaycanlıların öz yurd-yuvasından didərgin düşməsini əks etdirən görüntülərdir.
Fransızlar azərbaycanlıların qovulması kadrlarını "məzlum erməni qaçqınlar" kimi göstərir.
Qeyd edək ki, kanalın tapdığı "ekspert" də 90-cı illərdə "məzlum ermənilər"ə Azərbaycanın verdiyi "zülmlər"dən danışıb. Belə ki, Riçard Kirakosyan adlı "ekspert" 90-cı illərdə "məzlum ermənilərə" edilən "zülmləri" qondarma 1915-ci il soyqırımı ilə müqayisə edib. Kirakosyan hətta bir az da irəliyə gedərək deyib ki, Türkiyə və Azərbaycan eyni vəhşilikləri edə bilən qardaş millətlərdir.
Onu da bildirək ki, bu "sənədli" saxtakarlıq və riyakarlıq təxminən 3 həftə öncə internet resurslarında yayılıb. Məlum filmlə bağlı azərbaycanlıların qəti etirazından və həqiqəti şərh bölümündə yazmasından sonra isə "sənədli film"ə Azərbaycandan giriş bloklanıb, azərbaycanlıların yazdığı və həqiqəti üzə çıxaran şərhlər, videolar silinib.
"Etnik təmizliyə məruz qalan məcburi köçkünlərin videosunu utanmadan ermənilərdir deyə təqdim edirlər"
Siyasi şərhçi Azər Həsrət "Bakı-Xəbər"ə açıqlamasında qeyd etdi ki, o məlum kadrları görüb və dərhal da reaksiya verib: "Hesab edirəm ki, bu saxtakarlıqla bağlı məlumatları müvafiq beynəlxalq qurumlara göndərmək lazımdır və mən öz adıma göndərdim. Konkret olaraq beynəlxaq jurnalist və insan haqları təşkilatına bununla bağlı məlumat göndərdim. Qərb mediası, xüsusilə Fransanın Arte.TV telekanalı media etikasını, jurnalistlərin tərəfsizliyi prinsipini, ümumiyyətlə obyektivliyi ayaq altına ataraq açıq şəkildə saxtakarlığa yol verir. Bu videoda diqqətimi çəkən məqamlardan biri də helikopterin rənginin belə dəyişməsidir. Videoya baxanda görünür ki, helikopteri Ermənistanın bayrağı rəngində ediblər. Halbuki, o video Kəlbəcərin işğalı zamanı çəkilib və həmin ildə kadrda görünən rəngdə helikopter olmayıb. Yəni o vaxtı milli bayraqlarla bəzədilmiş helikopter olmayıb. Həyasız saxtakarlar helikopterin üzərini erməni bayrağının rəngləri ilə örtüblər. Saxtakarlıq açıq-aşkar görünür. Bu hadisəyə mütləq reaksiya verilməlidir. Hər bir azərbaycanlı öz imkanları çərçivəsində öz etirazını bildirir. Hesab edirəm ki, Azərbaycanın müvafiq dövlət qurumları, siyasi xadimlər, millət vəkilləri və digər ictimai şəxslər bu məsələni müvafiq qurumların diqqətinə çatdırmalı və beynalxalq platformalarda bunu sübutlarla dilə gətirməlidir".
Ekspert hesab edir ki, onların bu addımı bizə tutarlı fakt verib: "1915-ci ildə iddia etdikləri erməni soyqırımı belə yalanlar üzərindən dünyaya tirajlanıb. O vaxtı da heç nə baş vermədiyi halda milyon yarım erməninin soyqırıma məruz qaldığını iddia edərək buna bir çox dövlətləri inandıra biliblər. Ancaq biz bu faktı göstərməklə deyirik ki, baxın, ermənilərin xasiyyəti budur. Riçard Kirakosyan adlı ekspert tarixi yaxşı bilir, baş verənlərin canlı şahididir. Etnik təmizliyə məruz qalan məcburi köçkünlərin videosunu utanmadan ermənilərdir deyə təqdim edirlər. Kirakosyanla da bağlı müvafiq təşkilatlara məlumat verilməlidir".
Günel CƏLİLOVA
