Əliyev saziş mətni barədə məxfiliyi qoruyur, Paşinyanın komandası qoruya bilmir...
Elşən Həsənov: "Azərbaycan tərəfi bu sənədlə bağlı məxfiliyi qoruyursa, Ermənistan buna niyə əməl etmir?"
Ermənistan parlamentinin müxalifətdən olan deputatları Kristin Vardanyan, Anna Qriqoryan və Geqam Manukyan Azərbaycan və Ermənistan arasında münasibətlərin nizamlanmasına dair sazişlə bağlı iki ölkənin son təklifləri ilə tanış olublar.
Bu barədə 3 deputatın birgə açıqlamasında qeyd edilib.
Onlar bildirib ki, israrlı müraciətlərdən sonra bu gün Ermənistan XİN-də sülh sazişinin müzakirə edilən mətni ilə tanış olmaq imkanı yaradılıb:
"Bu anda aşağıdakıları qeyd edə bilərik: Tam məxfi kimi qeyd olunan sənədin bütün bəndlərini dərc edə bilməsək də, qeyd edək ki, təkliflərlə tanış olmaq onun təhlükəsini təsdiqlədi və bu məsələ ilə bağlı əvvəllər söylədiyimiz bütün qorxuları gücləndirdi".
Çox maraqlıdır ki, Azərbaycan tərəfi sülh danışıqları ilə bağlı məxfiliyi qoruyur. Hətta Prezident İlham Əliyevə belə bu barədə sual verəndə dedi ki, bu danışıqların detallarını açmaq istəmir çünki məxfidir. Yalnız onu dedi ki, 20 bənddən ibarət bir sənəddir. Belə olan təqdirdə Paşinyan hakimiyyəti niyə məxfiliyinə razılıq verdiyi sənədlə deputatları tanış edir?
Təhlükəsizlik məsələləri üzrə ekspert Elşən Həsənov "Bakı-Xəbər"ə açıqlamasında bildirdi ki, bunlar məqsədli şəkildə cəmiyyətdə xof yaradırlar: "Ermənistan üçün həmin sənəddə təhlükə yoxdur. Sazişin əksər bəndləri müzakirə edilib, hansı təhlükədən söhbət gedə bilər? Əksinə, Ermənistan həmin sazişi imzalamaqla nicat tapa bilər. Azərbaycan tərəfi bu sənədlə bağlı məxfiliyi qoruyursa, Ermənistan buna niyə əməl etmir?
Əgər Ermənistan rəhbərliyi, başda Paşinyan olmaqla bu məsələdə səmimidirsə, mütləq mənada bu məxfi sənədlə deputatların tanış olmasına şərait yaradanları cinayət məsuliyyətinə cəlb etməlidir. Bunu etməyəcəklərsə, deməli, özləri məqsədli şəkildə belə şərait yaradırlar ki, sülh sazişindən boyun qaçırsınlar. Bu, düzgün oyun qaydaları deyil. Ermənistan cəmiyyətin təpkisini göstərmək istəyir ki, əlavə manevr imkanları əldə edə bilsin. Ermənistan yayınmaqla da nəsə qazanan deyil. Əksinə, itirdikləri daha çox olacaq".
Məhəmmədəli QƏRİBLİ
