Ya Bakı ilə razılaşmaq, ya da Mərkəzi Asiyadan əl üzmək - Bakıdan Brüsselə mesaj...
Azər Həsrət: “Azərbaycan olmadan Avroittifaqın Orta Asiya dövlətləri ilə işləməsi alınmayacaq”
Prezident İlham Əliyev ADA Universitetində keçirilən “Qarabağ: 30 ildən sonra evə dönüş. Nailiyyətlər və çətinliklər” Forumunda bəzi Avroittifaq liderlərinin qərəzli mövqeyini tənqid edərək qeyd etdi ki, Azərbaycansız Avropanın Orta Asiya ilə əlaqələri mümkünsüzdür:
“Avropada liderlər arasında cənab Borrel, xanım Metsola kimi populist insanlar var. Cozef Borrel kimi insanlar üçün xəritəyə baxmaq və Azərbaycanın harada yerləşdiyini görmək kifayətdir. Əgər onlar Mərkəzi Asiyada fəal olmaq istəyirlərsə və biz görürük ki, onlar istəyirlər, biz hər iki istiqamətdə hərəkətləri görürük. Onlar Azərbaycandan necə yan keçə bilərlər? Orta Asiya ölkələri ilə İran vasitəsilə əlaqə quracaqlar, yoxsa Rusiya vasitəsilə? Yoxsa qanadları var?. Ona görə də bu bəyanatları verməzdən əvvəl bu barədə düşünməlidirlər”.
Sözügedən məsələni baki-xeber.com-a şərh edən siyasi şərhçi Azər Həsrət bununla bağlı bir sıra məqamlara toxundu: “Prezident İlham Əliyev xüsusən də Avropa İttifaqına Cənubi Qafqaz vasitəsilə Orta Asiya ilə əlaqə qurmasına hər zaman yardımçı olmağa çalışıb. Özü də bunu xüsusi bir istək üzərindən etməyib. Yəni, Azərbaycan dövlətinin rəhbəri anlayır ki, bizim bölgəmizin Avropaya inteqrasiyası vacibdir və gərəklidir. Eyni zamanda onu da yaxşı anlayırıq ki, Avropanın özü də bizə münasibətdə obyektiv davranmalıdır. Yəni, elə davranmalıdır ki, burada Azərbaycanın və digər bölgə dövlətlərinin maraqları zərbə altında qalmasın. Ancaq təəssüflər olsun ki, Borrel, xanım Metsola kimi bəzi Avropa siyasi liderləri bu məsələlərdə yetərincə anlayışlı davranmırlar. Ona görə də cənab Prezident onlara bir növ tarix dərsi verəcək keyfiyyətdə fikirlər səsləndirir. Yəni, bildirir ki, bizim bölgəmizlə, xüsusən də Orta Asiya ilə işləmək istəyirsinizsə, həmin regionun açarı Azərbaycandır. Yəni, Azərbaycan olmadan Avroittifaqın Orta Asiya dövlətləri ilə işləməsi alınmayacaq. Həqiqətən də alınmayacaq. Ona görə ki, birincisi, Orta Asiya dövlətləri, türk dövlətləridir. İkincisi, həmin dövlətlər Azərbaycanın çox yaxın dostlarıdır. Digər tərəfdən, Avropa İttifaqı doğrudan da bölgədə işləmək istəyirsə, o zaman Azərbaycanla anlaşmalıdırlar. O baxımdan cənab Prezident bu fikirləri səsləndirib. Ümid edək ki, Avropa liderləri bu fikirləri yaxşı anlamış olacaqlar”.
Vidadi ORDAHALLI
