Türk dövlətlərinin birgə müdafiəsi üçün “Yol xəritəsi”nə yeni izah verildi...
Ceyhun Məmmədov: “Bu gün heç vaxt olmadığı qədər qarışıq bir dövrdə yaşıyırıq və dünyada təhdidlərin sayı artır”
Prezident İlham Əliyev ADA Universitetində keçirilən “Qarabağ: 30 ildən sonra evə dönüş. Nailiyyətlər və çətinliklər” Forumunda bəyan etdi ki, Türk Dövlətləri Təşkilatı (TDT) olaraq müdafiə və müdafiə sənayesi sahəsində əməkdaşlıq etməliyik, birgə təlimlər keçirməliyik:
“Biz müdafiə və müdafiə sənayesi sahələrində daha sıx əməkdaşlıq etməliyik, birgə istehsal, birgə təlimlər keçirməliyik və sərhədlərimizin qorunması üçün birgə səylər göstərməliyik. Türk Dövlətləri Təşkilatı ölkələrinin milli təhlükəsizliyinin və sabitliyinin təmin edilməsi baxımından bunlara nail olmaq üçün yol xəritəsi hazırlanmalıdır. Zənnimcə, bu, praktiki baxımdan faydalı ola bilər və hər bir ölkə vahid amal naminə öz töhfəsini verə bilər”.
Maraqlıdır, ümumən, türk dövlətlərinin müdafiə sahəsində əməkdaşlığının perspektivini ekspertlər necə dəyərləndirir?
“Türk Dövlətləri Təşkilatında təmsil olunan ölkələrin hərbi sahədə çox geniş potensialı var”
Məsələ ilə bağlı “Bakı-Xəbər”ə açıqlama verən millət vəkili Ceyhun Məmmədov bu sahədə əməkdaşlığa prinspcə müsbət yanaşdı: “Hesab edirəm ki, Vətən müharibəsində qələbədən sonra qarşımızda duran ən mühüm vəzifələrdən biri türk dövlətləri arasında əməkdaşlığın daha da gücləndirilməsidir. Cənab Prezident “Qarabağ: 30 ildən sonra evə dönüş. Nailiyyətlər və çətinliklər” Forumunda bu barədə fikirlərini geniş və açıq şəkildə qeyd etdi. Türk Dövlətləri Təşkilatında təmsil olunan ölkələrin hərbi sahədə çox geniş potensialı var. Biz həm hərbi sənaye sahəsində, həm birgə hərbi təlimlərlə bağlı, ordu quruculuğu istiqamətində mütləq səylərimizi gücləndirməliyik. Çünki bu gün dünyada çox ciddi proseslər gedir. Bu gün heç vaxt olmadığı qədər qarışıq bir dövrdə yaşıyırıq və dünyada təhdidlərin sayı artır. O baxımdan biz daha çox bir olmalıyıq. Daha sıx əməkdaşlıq etməliyik. Səylərimizi daha da gücləndirməliyik. Nəzərə almaq lazımdır ki, ordu dövlətin vacib atributlarından biridir. Ancaq ordunun güclü olması ilə yanaşı, etibarlı, vacib strateji müttəfiqlər də lazımdır. Türkiyə Azərbaycanın əsas strateji müttəfiqidir. Hərbi sahədə geniş əlaqələr var. Ancaq Türk Dövlətləri Təşkilatı çərçivəsində də əlaqələrin genişləndirilməsinə ehtiyac var. Hesab edirəm ki, zamanla bütün bunlar yoluna düşəcək”.
Vidadi ORDAHALLI
