Zaxarovanın İrəvana “Praqa və Brüssel eyhamı”...
Bəhruz Quliyev: "Ola bilər ki, Zaxarova bununla erməni cəmiyyətinə sətiraltı mesaj verir"
Rusiya Xarici İşlər Nazirliyinin sözçüsü Mariya Zaxarova keçirdiyi brifinqdə bildirib ki, Azərbaycan Rusiyanın təklifinə müsbət cavab verib:
"Bakı bizə hər zaman danışıqların keçirilməsinə hazır olduğunu təsdiqləyib. Təəssüflər olsun ki, erməni tərəfdaşlarımızla bağlı bunları deyə bilmərik. Mümkündür ki, onlar hesab edirlər Vaşinqtondan, Brüsseldən və Parisdən olan yeni "məsləhətçi"lər daha maraqlı, daha yaxşı, daha səmərəli təkliflər verə bilərlər. Bilmirəm, düşünürəm ki, hər zaman əvvəlki təcrübəyə, qonşuların təcrübəsinə baxmaq lazımdır. Bu hər zaman faydalıdır. Avropa İttifaqının müşahidəçilərinin, Praqa və Brüsseldə olanların nəyə gətirib çıxardığını biz hamımız gördük. Ola bilsin ki, erməni xalqı hər şeydən xəbərdar deyil. Ona görə ki, erməni xalqını hər şey barədə məlumatlandırmırlar".
Burada diqqət çəkən məqam Zaxarovanın "Praqa və Brüsseldə olanların nəyə gətirib çıxardığını biz hamımız gördük" cümləsidir. Praqa və Brüsseldə Paşinyan Qarabağın Azərbaycanın tərkib hissəsi olduğunu bəyan etdi. Əcaba, Zaxarova buna işarə edir?
"Yəni Qərbin formatı Ermənistanın Qarabağı Azərbaycanın tərkib hissəsi kimi tanıması ilə nəticələndi"
Sözügedən məsələ ilə bağlı fikirlərini "Bakı-Xəbər"lə bölüşən "SƏS" Media Qrupunun rəhbəri, politoloq Bəhruz Quliyev hesab edir ki, Zaxarova bununla bir neçə nüansa işarə edib: "Birincisi, Azərbaycanın hər zaman danışıqlara hazır olduğunu diqqətə çatdırıb. İkincisi, Ermənistanın Rusiya forpostluğundan çıxdığını və Qərbə meylləndiyini göstərib. Bu da o deməkdir ki, Rusiya bununla razılaşmır. Hətta son dövrlərdə Rusiyanın Ermənistana qarşı aqressiyası açıq-aşkar özünü büruzə verir. Praqa və Brüsseldə Ermənistan baş naziri Nikol Paşinyan Qarabağın Azərbaycanın tərkib hissəsi olduğunu etiraf edib. O, bəzi çıxışlarında da Azərbaycanın ərazi bütövlüyünü tanıyıb və bunu konkret rəqəmlərlə göstərib. Ola bilsin ki, Zaxarova fikirlərini bu istiqamətdə əsaslandırıb. O da ola bilər ki, Zaxarova bununla erməni cəmiyyətinə sətiraltı mesaj verir. Yəni Qərbin formatı Ermənistanın Qarabağı Azərbaycanın tərkib hissəsi kimi tanıması ilə nəticələndi. Zatən Rusiya rəsmiləri ən yüksək səviyyədə buna işarə etməkdən yorulmurlar".
Politoloqun sözlərinə görə, status-kvonun saxlanması o dövr üçün Ermənistana sərf edirdi və ATƏT-in Minsk Qrupunun fəaliyyətsizliyi nəticəsində də buna nail olunurdu: "Rusiyada gedən danışıqlara görə faktiki olaraq Ermənistan uduzmamışdı. Amma Qərbdə və digər yerlərdə olan danışıqlar Ermənistanın bir növ əleyhinə işləyib. Artıq Zaxarova da bu nüansları çox gözəl dərk edir. Ermənistanda artıq anti-Rusiya xarakterli aksiyalar davam edir. Təbii, bu da Rusiyanı qıcıqlandırır. Hesab edirəm ki, Zaxarova dolayısı ilə Ermənistana yönəlik mesajında rəsmi İrəvanın antirus siyasətindən əl çəkməyinə və öz yoluna qayıtmağına işarə edir".
Vidadi ORDAHALLI
