İxracatımızda qeyri-neft sektorunun payı çox az olaraq qalır
Akif Nəsirli: “… səbəblərdən biri inhisarçılıqdır”
İqtisadi İslahatların Təhlili və Kommunikasiya Mərkəzinin məlumatına görə, 2023-cü ilin yanvar-noyabr aylarında Azərbaycanın ümumi ixracı 31,5 milyard dollar təşkil edib.
Bu dövrdə qeyri-neft sektoru üzrə ixrac isə 2022-ci ilin müvafiq dövrü ilə müqayisədə 10,5 faiz artsa da, ümumi ixracatda onun payı cəmi 3 milyard dollar olub.
Bu statistika onu göstərir ki, hələ də ümumi ixracatda qeyri-neft sektorunun payı çox aşağı olaraq qalmaqdadır.
“Bu sahəni inkişaf etdirmək üçün Azərbaycanda iqtisadiyyatın ənənəvi problemi aradan qalxmalıdır”
Mövzu ilə bağlı fikir bildirən Liberal İqtisadçılar Mərkəzinin sədri Akif Nəsirli “Bakı-Xəbər”ə açıqlamasında qeyd etdi ki, Azərbaycanda qeyri-neft sektorunun artım tempindən nə qədər danışılsa da, bu gün faktlar başqa nəticəni göstərir: “Ya dövlət dəstəyi alan şirkətlər ixrac üçün mal-məhsul istehsal edir ya da hökumətin öz yaratdığı müəssisələr ixracatla məşğuldur. Nəzərə almaq lazımdır ki, büdcə nə qədər imkan verirsə o qədər istehsal müəssisəsi yaradıla bilər. Qeyri-neft sektorunun ixracatda payını artırmaq üçün yalnız büdcədən xərcləmələr həyata keçirilir. Açıqlanan statistik rəqəmlərdə bildirilən artım bunun hesabınadır. Ancaq onu da deyim ki, artım tempi olduqca zəifdir. Bu sahəni inkişaf etdirmək üçün Azərbaycanda iqtisadiyyatın ənənəvi problemi aradan qalxmalıdır. Özəl sektor sərbəst məhsul istehsalı ilə məşğul olmalıdır. Kapitalı və qabiliyyəti olan hər bir insan bu işlə məşğul ola bilər. Bu halda özəl sektorun inkişafı sürətlənər”.
Həmsöhbətimiz onu da əlavə etdi ki, ixracatda qeyri-neft sektorunun payının aşağı düşməsinin səbəblərindən biri də inhisarçılıqdır: “Hər ay bir neçə sahibkar əmlakının əlindən alınması ilə bağlı şikayət edir, maneçilik törədilir. Qanunun aliliyi, məhkəmələrin müstəqilliyi təmin olunmalıdır. Rəqabət mühitinin inkişafı üçün şərait yaradılmalıdır. Ümumiyyətlə, sahibkarlıq fəaliyyətinin inkişafı üçün bütün çətinliklər aradan qalxmalıdır. Bu kimi problemlər həll olunandan sonra qeyri-neft sektorunun ixracatının inkişafının şahidi olacağıq”.
Günel CƏLİLOVA
