O’Braynın Bakıdan sonrakı tviti - ABŞ post-Qarabağ reallıqlarını tam qəbul etdi...
Əli Mustafa: "Bu, əslində belə düşünməyə əsas verir ki, bir sıra məsələlərdə qarşılıqlı anlaşma var"
ABŞ Dövlət katibinin Avropa və Avrasiya məsələləri üzrə köməkçisi Ceyms O'Brayn Prezident İlham Əliyevlə görüşündən sonra X platformasında yazdığı postda bu görüşü "ABŞ-la Azərbaycan arasında münasibətlərin gələcəyinə dair ilk konstruktiv söhbət" adlandırıb.
O yazıb ki, "regionda davamlı, ləyaqətli sülhün bərqərar edilməsi tarixi imkanlar açacaq. Prezident İlham Əliyevə dediyim kimi, ABŞ Mərkəzi Bankın sədrinin və energetika nazirinin səfərlərini alqışlayır və katib Blinken sülh danışıqları üçün xarici işlər nazirləri Ceyhun Bayramov və Ararat Mirzoyanı tezliklə Vaşinqtonda qəbul etməyi səbrsizliklə gözləyir".
Maraqlıdır, O'Braynın Bakıya səfəri, onun belə bəyanat verməsi o deməkdirmi ki, ABŞ müharibədən sonra bölgəmizdə yaranmış reallıqları tam şəkildə qəbul etdi və Azərbaycanla bağlı bu arada aparılmış siyasətin faydalı siyasət olmadığının fərqinə vardı?
"O'Brayn məlum səfəri ilə Vaşinqtonun sərt demarşdan geri çəkildiyini ifadə edir"
Sözügedən məsələni "Bakı-Xəbər"ə şərh edən Demokratik Dəyişim Partiyası Təşkilat Komitəsinin sədri Əli Mustafanın fikrincə, ABŞ Dövlət katibinin köməkçisi Ceyms O’Braynın Azərbaycana səfəri, Prezident İlham Əliyevlə görüşü və bundan sonra belə bir yanaşma sərgiləməsi müsbət siqnaldır: "Bu, əslində belə düşünməyə əsas verir ki, bir sıra məsələlərdə qarşılıqlı anlaşma var. Eyni zamanda bu, Birləşmiş Ştatların Cənubi Qafqaz siyasətinə də, təbii ki, öz təsirini göstərir. Bu, siyasətdə özünü əks etdirir. Bu da o anlama gəlir ki, ABŞ Cənubi Qafqaz siyasətinin Azərbaycanı görmədən, iştirakı olmadan reallaşmasının mümkünsüzlüyünün fərqindədir. Düzdür, müəyyən təzyiqlər olur, amma əvvəl-axır anlayır ki, bütövlükdə Cənubi Qafqaza təsir etmək üçün Azərbaycan faktorunu gözardı etmək olmaz. Hesab edirəm ki, mühüm məsələlərdən biri də budur. Ən nəhayət, bütün bunlar onu göstərir ki, ABŞ regionda sülhün olmasını istəyir. Əlbəttə, sülhün olmağı bir tərəfdən Ermənistanı qorumağa xidmət edir. Digər tərəfdən də Rusiyanın burada mövcudluğuna qarşı faktor kimi çıxış edə bilər. Çünki bu amil Rusiyanın da bölgədə təsir imkanlarını azaldır. Bu baxımdan da Vaşinqton maraqlıdır ki, Azərbaycanla normal münasibətlər qurulsun. Burada digər amil də var. O da ondan ibarətdir ki, sülh danışıqları kimin moderatorluğu ilə olursa, onun təsir imkanları artmış olur və maraqları nəzərə alınır. Hər halda, ABŞ tərəfi bu məsələdə də çox maraqlıdır ki, sülh danışıqlarında tərəflərə ən yaxın üçüncü tərəf olsun. Vaşinqton anlayır ki, ötən ayın ortalarında sərgilənən sərt diplomatik demarşlar hər iki tərəfin maraqlarına zərər vurur. O'Brayn məlum səfəri ilə Vaşinqtonun sərt demarşdan geri çəkildiyini ifadə edir".
Vidadi ORDAHALLI
