Ekspertiza tarifləri 29 faiz azaldı - dərmanlar ucuzlaşacaqmı...
Adil Qeybulla: "Ekspertiza tariflərinin 20-29 faiz azalması istər-istəməz qiymətə təsir etməlidir"
Tarif Şurası tərəfindən dərmanların sadələşdirilmiş ekspertiza tarifləri ilə bağlı dəyişilik edilib. Belə ki, tariflər 20-29 faiz azaldılıb.
Qeyd edək ki, Tarif Şurası tərəfindən, həmçinin, yeni dövlət qeydiyyatına alınan 158 dərman vasitəsinin qiymətinin yuxarı həddi təsdiq edilib. Etibarlı təchizatın təmin olunması məqsədilə Səhiyyə Nazirliyindən müvafiq rəy alınmış 57 dərman vasitəsinin qiymətinin yuxarı həddində qanunvericiliyə uyğun olaraq dəyişikliklər aparılıb. Yeni qərar iki gün sonra qüvvəyə minəcək.
Maraqlıdır, yeni qaydalar dərman bazarında qiymətlərə necə təsir edəcək?
"Yeni qərar dərman şirkətlərinin yüksək keyfiyyətli, effektivliyi təsdiqlənmiş dərman vasitələrini ölkəyə idxal etməsinə şərait yaradacaq"
Professor, tibbi ekspert Adil Qeybulla "Bakı-Xəbər"ə açıqlamasında qeyd etdi ki, dərmanların təkrar yoxlanması yox, dünyanın tanınmış firmaları ilə sertifikat əsasında keyfiyyətli preparatlar alınmalıdır. Əsas məsələ bu olmalıdır. Dərmanların yenidən Azərbaycanda yoxlanılması, ekspertizadan keçməsi əlavə xərcdir: "Məlumdur ki, bu gün müxtəlif parametrli dərmanlar var. Onların arasında keyfiyyət parametri fərqli olanlar da az deyil".
Həmsöhbətimiz hesab edir ki, ekspertiza tariflərinin 20-29 faiz azalması istər-istəməz qiymətə təsir etməlidir: "Tarif Şurası qiyməti tənzimləyirsə dəyişiklərə müdaxilə etməlidir. Onu da nəzərə almaq lazımdır ki, dərmanların satışı müxtəlif apteklərdə fərqli qiymətə olur. Aptekin hansı ərazidə olmasından asılı olmayaraq dərmanların satış qiyməti eyni olmalıdır. Ancaq bizdə eyni dərman hər aptekdə bir qiymətə olur. Buna nəzarət etmık lazımdır".
Ekspert hesab edir ki, yeni qərar dərman şirkətlərinin yüksək keyfiyyətli, effektivliyi təsdiqlənmiş dərman vasitələrini ölkəyə idxal etməsini şərait yaradacaq: "İdxal olunan dərmanların tanınması üçün ekspertiza müddətinin 11 iş günü müəyyən edilməsi bu sahədə rəqabətliliyi artırmalıdır. Nəzərə almaq lazımdır ki, adi ekspertizanın müddəti 90 gündür, sadələşdirilmiş ekspertizanın isə müddəti 11 gündür. Belə olduqda ölkəyə dərman idxal edən təsərrüfat subyekti beynəlxalq aləmdə qeydiyyatda olan dərman vasitələrinin idxalına üstünlük verəcək. Çünki həmin dərmanlar idxal edilərkən 11 gün ərzində tanınacaq, tarifləri aşağı olacaq, təsərrüfat subyekti keyfiyyətli məhsul idxal edəcək və əhali belə dərmanları daha çox istehlak edəcək".
Günel CƏLİLOVA
