Makron "Şengen zonasını" dağıdır - 6 ölkə ilə sərhədləri bağladı...
Əli Orucov: "Makron hökmətinin xarici və daxili siyasəti zorakılıqların artması ilə müşahidə olunmaqdadır"
Noyabrın 1-dən etibarən Fransa bütün sərhədlərində nəzarəti bərpa edir. Müvəqqəti adlandırılan bu tədbir 30 aprel 2025-ci il tarixinədək qüvvədə qalacaq.
Fransanın baş naziri Mişel Barnier bildirib ki, Fransa noyabrın 1-dən altı Avropa ölkəsi ilə sərhədlərində nəzarətini bərpa edəcək. Fransa artıq 2015-ci ildən İtaliya ilə sərhədlərdə analoji nəzarəti həyata keçirib. Noyabrın 1-dən etibarən isə Lüksemburq, Belçika, Almaniya, İsveçrə və İspaniya ilə sərhədlərdə ciddi sərhəd nəzarəti bərpa edilib.
Mişel Barnier bildirib ki, Norveç də sərhəd nəzarətini gücləndirib: "Bu, effektivliyini sübut edən bir modeldir. Biz sərhəd nəzarətini bütün Fransanın quru sərhədləri boyunca genişləndirəcəyik".
Fransa mətbuatının yazdığına görə, Paris Avropa Komissiyasını xəbərdar edib ki, bu nəzarət tədbiri 30 aprel 2025-ci ilə qədər qüvvədə qalacaq.
Şengen zonasında sərbəst hərəkət prinsipinə əsasən, üzv dövlət öz daxili sərhədlərində yoxlamaları yalnız müvəqqəti olaraq, ictimai asayiş və daxili təhlükəsizliyə ciddi təhlükə yarandığı halda bərpa edə bilər.
Fransa bu tədbirin uzadılmasını “yüksək səviyyəli terror fəaliyyətinin ictimai asayişə və daxili təhlükəsizliyə ciddi təhdid etməsi, qeyri-qanuni immiqrasiya və insan alverinə, habelə miqrasiyaya şərait yaradan cinayətkar şəbəkələrin artması” ilə əsaslandırıb.
Müvəqqəti adlandırılsa da, Fransa uzun müddətə sərhədlərində nəzarəti gücləndirdi. Nə baş verir, Fransanı hansı təhlükə gözləyir? Bir də baş nazirin fikrindən belə anlaşılır ki, bu bir model olaraq Fransada qəbul ediləcək. Yəni Fransa Şengen zonasından çıxırmı?
Məsələni şərh edən politoloq Əli Orucov bizimlə söhbətində bildirdi ki, Fransanın Şengen ölkələri ilə sərhədlərində 1 noyabrdan 30 noyabr 2025-ci il tarixədək nəzarəti gücləndirməsi, elan olunduğu kimi, sırf təhlükəsizliklə bağlıdır: "Eyni zamanda qanunsuz miqrant axınının qarşısının alınmasına yönəlib. Orta Doğuda İsraillə Fələstin və Livan arasında müharibə - həmin müharibənin geniş areala sıçraması böyük qaçqın axını dalğası yaradıb. Həmin qaçqınların üz tutduqları ölkələrin ön sıralarında Fransa da var. Bu isə ciddi humanitar və təhlükəsizlik problemlərinə yol açır. Odur ki qabaqlayıcı tədbir kimi sərhədlərinə nəzarəti gücləndirir. Bundan başqa, Fransada islamafob əhval-ruhiyyə getdikcə artmaqdadır. Fransa hökumətinin yürütdüyü islamlafob və ayrıseçkilik siyasəti dini və milli zəmində toqquşmaları hər an alovlandıra bilər. Məncə, Parisi narahat edən məqamlardan biri də budur. Təəssüflə qeyd etmək lazımdır ki, Makron hökumətinin xarici və daxili siyasəti zorakılıqların artması ilə müşahidə olunmaqdadır. Bu gün BMT TŞ-nin 5 daimi üzvündən biri olaraq Fransa beynəlxalq sülhün pozulmasında əsas rol oynayır, nəinki onun təmin edilməsində. Ona görə də uzun illər sərgilənən siyasət artıq Fransanın özü üçün başağrısına çevrilib.
Belə sərhəd nəzarətinin bir model kimi qəbul edilməsinə gəldikdə isə, Orta Doğuda indiki vaziyyət nə qədər davam edəcəksə, bu model bütün Avropa ölkələri üçün cəlbedici olacaq ".
Dəniz NƏSİRLİ
