Səmimi insan – sadə deputat
Sadəlik Allahın insana (ən əhəmiyyətli) ərməğanı, həyat lütfüdür. Sadəlik təvazökarlıqdır; səlis xarakterdə olmaq hissidir, gözəl-nəcib sifətlərə malik olmaqdır. Bu lütfü üzərində gəzdirən insan bütün hallarda cəmiyyət tərəfindən sevgi atəş(lər)inə tutulur, tütyə kimi əzizlənir, sevilir...
(Doğrudan da) sadəlik insan üçün ən yüksək-prioritet səciyyə, ən vacib-qərar tutulası pillədir; insan fərd olaraq yalnız sadə ehtimallarda daha görkəmlidir. Mövlanədən soruşdular: - Bu qədər oxudun, nə(yi) bildin? Dedi: - Həddimi...
Həddini bilmək də əslində, (bir) sadəlik rakursudur. Müxtəlif aspektlərdən yanaşsaq, sadə insan ən dürüst, ən vacib və ən əhəmiyyətli insandır...
Təbii ki, millət vəkili, Milli Məclisin İctimai birliklər və dini qurumlar komitəsinin, Elm və təhsil komitəsinin üzvü Ceyhun Məmmədov da özündə sadə xarakterlər kəsb edən, sadəliyi özünün ən böyük mükafatı bilən bir insan – bir Vətən oğludur. 120 saylı Cəbrayıl-Qubadlı seçki dairəsindən namizədliyi irəli sürülən, hazırda deputat kimi Milli Məclisə şərəf verən Ceyhun Məmmədov illər əvvəl işlədiyi mühüm sahələrdə də (əsas etibarilə) sadəlik nümayiş etdirib, öz simasında Adəm övladının ancaq bu səbəb üzrə rəhmət və cənnət qazana biləcəyini diqtə edib.
Kimsə qəfildən naşı bir fikrə zəmin verə bilər ki, biz hansı səbəbdən Ceyhun Məmmədovu sadə insan kimi xarakterizə edir, onun haqqında nəsə deyirik?! (Əgər belə biri olarsa) o şəxsə əyan olsun; bir nəfərdən soruşurlar, dostun necə adamdır, cavab verir ki, hələ yol getməmişəm. Əlbəttə insanın kimliyi (necəliyi) yolda bəlli olur. Biz Ceyhun Məmmədovu Mədəniyyət Nazirliyi Respublika Xatirə Kitabı Redaksiyasının Vətən müharibəsində şəhid olan qəhrəman oğullarımız haqqında dərc etdiyi “44 gün – Tarixi zəfər” adlı çoxcildliyin üçüncü cildinin təqdimatı ilə əlaqədar 31 oktyabr 2024-cü il tarixində Şuşaya səfərimiz zamanı tanıdıq. O, səhərüzü saat 4:00-dan – Şuşaya istiqamət götürdüyümüz andan axşam saat 11:30-a qədər – Bakıda bir-birimizdən ayrıldığımız ana kimi bizə olduqca sadə, səmimi insan təsiri bağışladı. Biz onda səmimiyyət aynası gördük. O, bizimlə söhbətlərində də son dərəcə səmimi idi; onun avtobusun pəncərəsindən ətrafı seyr etməsi də, hətta arada yorğunluqdan əsnəməsi, mədəni gülüşləri də səmimiyyət notları ilə süslənmişdi. Təxminən iyirmi saat müddətində biz onun xırda bir hərəkətində belə (bir) saxtalıq görmədik.
Üstəlik, Ceyhun Məmmədovu aydın nitqə, əhatəli danışıq tərzinə, ictimai-siyasi savada malik şəxs kimi (də) tanıdıq. Şuşadakı 1 nömrəli orta məktəbin milli ornamentli zalında etdiyi çıxış onun həqiqi mənada hədsiz savada malik olduğunu təsdiqlədi. Əcəba, bir insan həm yüksək əyarlı savada, dərin-mental baxışa, milli düşüncəyə, həm də əsl vətəndaş görkəminə, odlu dövlətçilik əzminə... necə sahib ola bilir? Deməli, o, Allahın seçdiyi, önəm verdiyi şəxsdir, çöhrəsində ifadə etdiyi parlaq möhtəşəmlik də məhz Allahın ona lütfüdür. Nə xoşbəxtik ki, Ceyhun Məmmədov kimi (bir) sadə-əzəmətli insanla – qürur duyulası (bir) millət vəkili ilə yol yoldaşı olduq, ondan çox şey əxz etdik. Həmçinin, Ceyhun Məmmədovdakı ilıq-isti xarakterləri özümüzə ibrət etdik, onu özümüzə nümunə-görk sandıq. Bəlli ki, Ceyhun Məmmədovdakı sadəlik, misilsiz əzəmət, mərdlik, anlayış, əliaçıqlıq, lütf və s. gendən – ata-babalarından gəlir. Bu, o deməkdir ki, Ceyhun Məmmədov zatında əsl kişilik qaynayan (bir) nəslin gerçək nümayəndəsidir.
Bəli, Ceyhun Məmmədov son dərəcə səmimi-sadə insandır, sadəlik fəhmini öz üzərində bir lütf kimi gəzdirir. Onun kimi çöhrəsi nurlu bir şəxsiyyətin, əsl mənada gerçək deputatın təmsil olunduğu Milli Məclis də bizim üçün (təbii ki,) işıqlı – işığı heç vaxt sönməyəcək müqəddəs məbəddir...
Allah sizi qorusun, Ceyhun Məmmədov!
Hikmət Məlikzadə,
Respublika Xatirə Kitabı Redaksiyasının kiçik redaktoru
