"Seçkidən əvvəl Gürcüstana təxribatçılar, qan tökənlər və kəşfiyyatçılar gətirilib" - ŞOK SSENARİNİN DETALLARI...

Qərbin Gürcüstana məlum münasibəti ABŞ və Avropanın etibarlı müttəfiq olmadığını bir daha təsdiqlədi. Hazırda rəsmi Tiflisə qarşı Qərbin total xarakterli hücum həyata keçirdiyi müşahidə olunur. ABŞ, Kanada və İsveç Gürcüstanda seçkilərin guya Moskva tərəfindən saxtalaşdırıldığını və manipulyasiya edildiyini deyən müxalifət tərəfdarlarını daha açıq şəkildə dəstəkləyirlər. 

Artıq Kanada və İsveç Gürcüstanın hazırkı hökumətini hədəf alan konkret addımlar atdıqlarını açıqlayıb. İsveç Gürcüstan hökuməti ilə hər hansı birbaşa əməkdaşlığa son verdiyini, Kanada isə gürcü hakimiyyət orqanları ilə əlaqələrini nəzərdən keçirdiyini bildirib. İsveçin inkişaf əməkdaşlığı və xarici ticarət naziri Benjamin Dousa açıqlamasında bildirib ki, Stokholmda Gürcüstanda “narahatedici” siyasi proseslərlə bağlı “uzun müddətdir narahatlıqlar” mövcuddur və Qərb müşahidəçiləri tərəfindən qeyd edilən qanun pozuntuları bu narahatlığı təsdiqləyir: “Buna görə də hökumət, Gürcüstanın vergi orqanı da daxil olmaqla, hələ də davam edən birbaşa İsveç-Gürcüstan əməkdaşlığını dayandırır”. Onun sözlərinə görə, eyni zamanda, İsveç Gürcüstanın vətəndaş cəmiyyəti üçün təxminən 2,3 milyon dollar dəyərində vəsait ayıracaq. Kanada Xarici İşlər Nazirliyi açıqladığı bəyanatda səsverməni izləyən beynəlxalq müşahidəçilər tərəfindən qeyd edilən “seçicilərə hədə-qorxu gəlmək, səslərin satın alınması və seçki günü digər pozuntular” ilə bağlı narahatlıq ifadə edib. Kanada xarici İşlər Nazirliyinin bu xüsusda bəyanatında deyilir: “Böyük yeddilik” və avropalı tərəfdaşlarımızla koordinasiyada və bu seçkinin gedişi və nəticələrini nəzərə alaraq, Kanada Gürcüstan rəhbərliyi ilə münasibətlərini yenidən qiymətləndirəcək. Gürcüstan rəhbərliyi demokratiyaya, insan haqlarına, qanunun aliliyinə hörmət etdiyi və son demokratik geri çəkilmələri aradan qaldırdığı müddətdə Kanada Gürcüstanla əməkdaşlığa açıq qalır”. ABŞ Senatının Xarici Əlaqələr Komitəsinin sədri, Merilend ştatından demokrat senatoru Ben Kardin qeyd edilən pozuntuların “narahatedici və məyusedicidir” olduğunu və bunun Avropa və ABŞ-ın Gürcüstanın prinsiplərdən geri çəkildiyi barədə “dəfələrlə xəbərdarlıq etdiyi” bir vaxtda baş verdiyini bildirib: “Mən seçkidən sonrakı mühiti yaxından izləməyə və ABŞ-Gürcüstan münasibətlərində müvafiq addımları müəyyən etmək üçün Bayden-Harris administrasiyası ilə işləməyə davam edəcəyəm”. Qərbin xəbərdarlığı prezident Salome Zurabişvilinin ölkənin hakim partiyanı Rusiyasayağı taktika tətbiq etməkdə ittiham etməsindən və nəticələri tanımaqdan imtina etməsindən sonra müxaliflərin küçələrə çıxdığı vaxt gəlib.

Bu arada Zurabişvili Qərbi hakim “Gürcü Arzusu” partiyasına “oğurladığı” səsləri yenidən saymaq üçün təzyiq göstərməyə səsləyib. Qeyd edib ki, bu baş verməsə, ölkənin Avropa perspektivini itirəcəyini deyib. Zurabişvili və müxalifət 300 minədək səsin hakim partiyanın xeyrinə yönəldiyini, nəticədə “Gürcü Arzusu”nun 54 faiz səs topladığını söyləyir. Amma maraqlıdır ki, bu iddiaları ortaya qoyan hansısa dəlil təqdim edilmir. Zurabişvili isə Qərbi hakimiyyətə qarşı hərəkətə keçməyə çağırıb: “Qərb təzyiq göstərməsə, Gürcüstanı öz tərəfində saxlamaq və Avropa perspektivimizi qorumaq üçün bütün imkanlarını sınamamış olacaq”. Zurabişvili bildirib ki, “exit-poll” sorğuları Mərkəzi Seçki Komissiyasının rəsmi nəticələri ilə haçalanır. Müxalifətin iki exit-poll-u hakim partiyanın 42 faiz, rəsmi bilgilərsə 54 faiz səs topladığını açıqlayıb. MSK bütün müxalifət qüvvələrinin toplam 37 faiz səs topladığını bildirib. Etirazlara çağıran Zurabişvili bildirib ki, rəsmi nəticəyə Moskva təsir edib: “Bunlar Rusiyanın xüsusi əməliyyatı – xalqımıza, ölkəmizə qarşı həyata keçirilən hibrid müharibənin yeni formalarından birinin sübutudur”. Rusiya seçkilərə təsir göstərməsinə dair ittihamları rədd edib. Rusiyalı politoloq Dmitri Solonnikov bildirir ki, seçkilərdə radikal qərbyönlü müxalifət, Saakaşvilinin varisləri qalib gəlsəydi, çox güman ki, onlara əvvəlcədən son dərəcə aqressiv istiqamətdə Ukrayna ssenarisini izləmək tapşırığı veriləcəkdi: “Belə olan halda Gürcüstan Rusiyaya qarşı ikinci cəbhə açacaqdı. Yeni böyük müharibə başlayacaqdı. Qərb qüvvələri tərəfindən Gürcüstanın radikal müxalifəti qarşısında belə bir vəzifə qoyulmuşdu. Radikal müxalifətin vəzifəsi “müştəri”nin tapşırığını yerinə yetirmək, gələcək təminatı üçün qonorar almaqdır. Bir ölkə olaraq Gürcüstanda və bütün Cənubi Qafqazda nələrin baş verəcəyi isə onlar üçün əhəmiyyət kəsb etmir. Məsələn, Gürcüstanın hazırkı prezidenti Salome Zurabişvili Fransa vətəndaşıdır. Nəsə yolunda getməsə, o dərhal Fransaya gedəcək”. Solonnikovun sözlərinə görə, Qərb qüvvələrinin Gürcüstanda radikal müxalifəti hakimiyyətə gətirmək planı hələ tam silinməyib: “Parlamentə daxil olan bir sıra müxalifət partiyaları artıq mandatlarından imtina etdiklərini bəyan ediblər. Gürcüstan prezidenti mitinqlər keçirir və insanları seçkinin nəticələrinə etiraz etmək üçün küçələrə çıxmağa çağırır. ABŞ və 13 Aİ ölkəsi Gürcü Arzusunu hədələyir və seçki zamanı iddia edilən pozuntuları araşdıracaqlarını deyirlər. Gürcü Arzusu indi ayaqda qalsa və onun qələbəsi təsdiqlənsə, kənardan müdaxilə və mümkün radikal təxribatlar, o cümlədən terror aktları ilə vəhşi etirazlar olmayacaq, deməli, bu, Cənubi Qafqaz üçün yaxşıdır. Məlumat var ki, seçkidən əvvəl Gürcüstana muzdlular, Ukrayna casusları, təxribatçılar, qan tökməli olan şəxslər gətirilib. Çevriliş ssenarisini həyata keçirə biləcəklər, ya yox, bilinmir. “Gürcü Arzusu”nun qələbəsi region üçün daha böyük təhlükəsizlik və sülh proseslərinin mümkünlüyü demək olardı”. Xatırladaq ki, “Gürcü arzusu” partiyası 2012-ci ildən hakimiyyətdədir. Qərbyönümlü siyasət apardığını söyləsə də, ABŞ və Avropa ondan narazılıq edir.

Samirə SƏFƏROVA