Ermənistan KTMT ilə bütün əlaqələri formal kəsdi...
Emin Həsənli: “Ermənistan, faktiki olaraq, KTMT-dən uzaqlaşmaq siyasətini davam etdirir”
Rusiya Federasiya Şurasının beynəlxalq komitəsinin rəhbəri Qriqori Karasin bildirib ki, Rusiya senatorları müntəzəm olaraq erməni həmkarları ilə birbaşa, videokanallar və səfirlik vasitəsilə əlaqə saxlayırlar, münasibətlərin dondurulmasından söhbət getmir.
Ermənistan parlamenti sədrinin mətbuat katibi Tsovinar Xaçatryan deyib: “Ermənistan Milli Assambleyasının sədri Alen Simonyan Kollektiv Təhlükəsizlik Müqaviləsi Təşkilatı Parlament Assambleyası Şurasının və Kollektiv Təhlükəsizlik Müqaviləsi Təşkilatının Parlament Assambleyasının səfərdə olan iclasında iştirak etməyəcək”.
Rusiya və Ermənistan qanunvericiləri arasında ikitərəfli münasibətlərin olub-olmaması ilə bağlı sualı cavablandıran Karasin qeyd edib: “Təbii ki, çox aktiv əlaqələr mövcuddur – həm birbaşa, həm videokanallar, həm də səfirliklər vasitəsilə əlaqələr müntəzəmdir”.
Parlamentarilər arasında münasibətlərin dondurulması ilə bağlı hər hansı söhbətin olub-olmaması ilə bağlı aydınlaşdırıcı suala cavab olaraq rusiyalı senator vurğulayıb ki, “biz bu barədə danışmırıq və düşünmürük”.
Karasin eyni zamanda vurğulayıb ki, Ermənistan nümayəndə heyətinin KTMT PA-ya gəlməmək qərarları “təəssüf hissi ilə” qarşılanır: “Eyni zamanda, İrəvanın ölkənin KTMT-nin üzvü olaraq qalması ilə bağlı mövqeyi də nəzərə alınır. Ancaq belə bir qərar təbii olaraq təəssüf doğurur. Biz istərdik ki, onlar iştirak etsinlər”.
Buradan belə qənaətə gəlmək olarmı ki, Ermənistan KTMT ilə bütün əlaqələri formal kəsmiş olub?
Hərbi ekspert Emin Həsənli “Bakı-Xəbər”ə açıqlamasında bildirdi ki, hazırkı KTMT–Ermənistan “izdivacının” yalnız kağız üzərində olduğu aşkardır və bu aşkarlıq Ermənistanı anti-Rusiya xəttinin mühüm tərkib hissəsi olmağa sürükləyir:
“Görəsən nə lazımdır, yaxud nə olmalıdır ki, Ermənistan dövləti açıq-aşkar Kollektiv Təhlükəsizlik Müqaviləsi Təşkilatı ilə yollarını ayırdığını bəyan etsin? Məsələn, noyabrın 23-də Belarusun paytaxtı Minskdə KTMT-nin növbəti sammitinin gündəliyinə Ermənistana yardım məsələsi də salınıbmış. Amma qurumun baş katibi İmanqali Tasmahambetovun sammitin ev sahibi Belarus Prezidenti Aleksandr Lukaşenkoya dediyinə görə, İrəvan məsələnin gündəlikdən çıxarılmasını istəyib. Yəni bu o deməkdir ki, Ermənistan KTMT-nin köməyinə ehtiyac duymur, yaxud qurumdan kömək gözləmir. Məlum olur ki, nəinki Paşinyan, ümumiyyətlə Ermənistanın yüksək ranqlı məmurlarından heç kəs KTMT-nin tədbirlərinə qatılmır. Ötən il KTMT-nin Ermənistan-Azərbaycan sərhədinə müşahidə missiyası göndərəcəyi güman edilirdi. Hərbi-texniki əməkdaşlıq baxımından da addımlar nəzərdə tutulurdu. Amma hazırda erməni iqtidarı tamam başqa havalardadır. Onu da deyək ki, İrəvan KTMT-dəki nümayəndəsi Viktor Biyaqovu geri çağırıb və onun yerinə yenisini təyin etməyib. Ermənistanda hesab edirlər ki, amorf qurum kimi göstərdikləri KTMT-dən fərqli olaraq, ABŞ-ın və Fransanın təmsil olunduğu Qərb bir çağırışla Azərbaycanın mümkün təcavüzünü dayandıra bilər. İrəvan Rusiyanın Cənubi Qafqaz regionundan sıxışdırılması vədini yerinə yetirir. Qərbin Ermənistana ciddi dəstək göstərəcəyinə, sözdən əmələ keçəcəyinə böyük ümid var.
İrəvanın KTMT-dən incikliyi ilə bağlı xüsusi tapşırıqlar üzrə səfiri Edmon Marukyan bildirib ki, ölkəsi ötən ilin sentyabrında Azərbaycanın Ermənistana “təcavüzü” ilə bağlı təşkilatdan aydın siyasi qiymət gözləyirdi, amma KTMT, guya Ermənistanın işğal olunmuş ərazisinin bir hissəsinin qurumun təsir zonası olduğunu açıqlamadı. Ermənistan, faktiki olaraq, KTMT-dən uzaqlamaq siyasətini davam etdirir”.
Məhəmmədəli QƏRİBLİ
