Ülviyyə Zülfüqar: "Deportasiyanı əks etdirən şəkillər barədə də soruşurdular"
Oktyabrın 14-də Polşanın paytaxtı Varşava şəhərində Qərbi Azərbaycan İcmasının təşkilatçılığı ilə "Qərbi Azərbaycan - yaddaşlarımızda" adlı sərginin açılışı olub. Oktyabr ayının 25-dək davam edəcək sərgidə Qərbi Azərbaycanın zəngin irsini əks etdirən şəkillər, eksponatlar, kulinariya nümunələri əks edilib.
İrəvan xanlığının bayrağı, Qərbi azərbaycanlıların deportasiyası, dağıdılmış məscidlərimiz, abidələrimiz, qəbristanlıqlarımız, Qərbi Azərbaycanın görkəmli şəxsiyyətlərinin fotolarının əks olunduğu sərgi iştirakçılar tərəfindən maraqla qarşılanıb, soydaşlarımızın başına gətirilən müsibətlər barədə onlara ətraflı məlumat verilib.
Varşavada açılan Qərbi Azərbaycanla bağlı sərgiyə gələnlər, əsasən yerli polyaklar və başqa xalqların nümayəndələri hansı məsələlərə maraq göstərirlər? Bu onların diqqətini nə dərəcədə cəlb edir? Məsələn, onlar bu sərgiyə gələndə ən çox hansı sualları verirlər? Hansı eksponatların yanında çox dayanırlar, maraqlanırlar? Əsasən hansı millətlərin nümayəndələri gəlir? Polyaklar bu sərgidə qonaq qismində nə dərəcədə iştirak edirlər? Gün ərzində neçə polyak o sərgiyə baxır?
"Polşalılar və qonaqlar sərgiyə maraqla yanaşdılar"
Qərbi Azərbaycan İcmasının İctimaiyyətlə Əlaqələr və Qərbi Azərbaycan Televiziyası şöbəsinin müdiri – mətbuat katibi Ülviyyə Zülfüqar "Bakı-Xəbər"in suallarına cavab olaraq bildirdi ki, Polşada açılan "Qərbi Azərbaycan - yaddaşlarımızda" sərgisi oktyabrın 25-nə qədər davam edəcək: "Sərgiyə çox böyük maraq göstərildi. Açılışda çox sayda qonaqlarımız vardı. Əsasən polşalılar və qonaqlar sərgiyə maraqla yanaşdılar. Onlar arasında rəsmi şəxslər də vardı. Polşa-Azərbaycan parlamentlərarası dostluq qrupunun rəhbəri Pşemislav Vitek də tədbirə qatılmışdı. Universitet rektoru professor Pyotr Vaxovyak tədbirdə bizə söz verdi, xanım səfir çıxış etdi, ardınca mən danışdım. Ondan sonra artıq sərgiyə baxış keçirildi. Təbii ki, sərgiyə gələnlər çox maraq göstərirdilər. Tədbirimiz mədəni irslə bağlı olduğu üçün daha çox mədəniyyət, mədəni irs məsələləri ilə bağlı sual verirdilər. Buna rəğmən, sərgidə Qərbi azərbaycanlıların 1987-1991-ci illərdəki deportasiyasını və daha əvvəlki deportasiyaları əks etdirən şəkillər də vardı. Deportasiyanı əks etdirən şəkillər barədə də soruşurdular. Mədəni irsimizin dağıdılan nümunələri və digər aidiyyəti məsələlərlə bağlı iştirakçılara məlumatlar verirdik. Hər bir şəklin qarşısında dayanıb o şəkillərin nə ilə bağlı olduğunu soruşurdular, maraqlanırdılar. Onlara hər bir şəkil haqda ətraflı məlumat verilirdi".
Ü.Zülfüqar qeyd etdi ki, onun özünün Polşa-Azərbaycan parlamentlərarası qrupunun rəhbəri Pşemislav Viteklə ikilikdə ayrıca görüşləri baş tutub. "Bizim onunla görüşmək imkanımız oldu və bir-bir sərgidə sərgilənən bütün şəkillər barədə soruşdu. Sual verdi ki, bu zəngin mədəni irs nümunələri hardadır, vəziyyətləri necədir? Onun bu suallarına və onu maraqlandıran digər suallara da cavab verildi. O, bu sərgini, orada nümayiş olunan şəkilləri çox maraqla qarşıladı. Ona bizim geri qayıdış hüququmuzla bağlı məlumat verildi.O bildirdi ki, bizim qayıdış hüququnun tanınması mütləqdir, bu, beynəlxalq hüquq normalarının prinsipləridir, öz torpaqlarından zorla çıxarılan insanlar geri qayıdış hüququna malikdir, bu qayıdış hüququ təmin olunmalıdır".
Ü.Zülfüqarın sözlərinə görə, cənab Vitek bildirib ki, zorla qovulan azərbaycanlılar beynəlxalq hüququn prinsipləri çərçivəsində öz yurdlarına qayıtmalıdır və onların geriqayıdış hüququ təmin edilməlidir.
İradə SARIYEVA
