Avropa Birliyi Ermənistana daha 30 milyon ayırdı...
Ramil Hüseynov: “Aİ-nin etdiyi bu maliyyə yardımlarını Ermənistan silahlanmaya yönəldəcək”
Avropa İttifaqı Qarabağ ermənilərinin dəstəklənməsinin maliyyə yükünü bölüşmək və Ermənistanda islahatların həyata keçirilməsinə töhfə vermək üçün Ermənistan hökumətinə büdcə dəstəyi çərçivəsində əlavə 30 milyon avro ayırmaq niyyətindədir.
Bunu İrəvanda keçirilən “Dünyanın kəsişməsi: təhlükəsizlik və demokratiyanın birləşməsi” konfransda Aİ-nin Ermənistandakı nümayəndəliyinin rəhbəri Vasilis Maraqos deyib.
Daha sonra Maraqos bunları qeyd edib: “Birgə səylər nəticə verir, çünki ortaq siyasi öhdəlik var. Aİ Ermənistanı bir sıra istiqamətlərdə dəstəkləyir və dəstəkləməyə davam edəcək: iqtisadiyyat, məhkəmə sistemi, regional əlaqələr, sülh də bunun bir hissəsidir”.
Aİ təmsilçisi onu da qeyd edib ki, Avropa Komissiyasının hazırkı prezidenti Ursula fon der Leyen aprelin 5-də baş nazir və dövlət katibi Blinkenlə görüşündə dayanıqlılıq və inkişaf planını təqdim edib, bu, növbəti 4 ildə Ermənistana cəmi 270 milyon qrant dəstəyi deməkdir: “Biz Qarabağ ermənilərinin taleyi ilə də məşğuluq. Biz bir il ərzində 100 milyon avrodan çox sərmayə qoymuşuq və büdcə dəstəyimiz çərçivəsində hökumətin çiyinlərinə yüklənmiş yükü sizinlə bölüşmək üçün hökumət büdcəsinə daha 30 milyon əlavə etmək qərara alındı”.
Göründüyü kimi, Ermənistana apreldə 270 milyon ayırmaları azmış kimi, bu çərçivədə 30 milyon avro da ayırdılar.
“İndiyə qədər işğaldan azad edilən ərazilərin bərpa prosesinə 1 avro belə ayırmayıblar”
Sözügedən məsələni “Bakı-Xəbər”ə şərh edən “Yeni Xətt” Siyasi Tədqiqatlar Mərkəzinin rəhbəri Ramil Hüseynovun fikrincə, Avropa İttifaqının Ermənistana yardımı artıracağı gözlənilən idi: “Ona görə ki, neçə vaxtdır hər şey ortadadır. Aİ üzvü olan bəzi dövlətlər Ermənistanı silahlandırır, qurum bu ölkəyə siyasi və maliyyə dəstəyi verir. Antiterror əməliyyatlarından sonra öz xoşu ilə Qarabağı tərk edən ermənilərin qeydinə artıq bilmirlər necə qalsınlar. Halbuki, onların sayı ermənilərin iddia etdiyi kimi 100 nəfər deyil. Bundan qat-qat azdır. Aydın məsələdir ki, Aİ-nin etdiyi bu maliyyə yardımlarını Ermənistan silahlanmaya yönəldəcək. Onsuz da neçə vaxtdır silahlanır. Üstəlik, Fransa Ermənistanı pulsuz olaraq silahlandırır. Yaxşı, bəs 30 il ərzində Azərbaycanda 1 milyon nəfərədək qaçqın və məcburi köçkün olmazın əziyyətlər çəkəndə Avroittifaq niyə narahat olmurdu? Niyə dövlətimizin üzərinə düşən yükü bölməyə maraq göstərmirdi? Bütün bunlar azmış kimi, 4 ildir ərazilərimiz azad edilib. O ərazilər ki, orada yaşayış məntəqələri yer üzündən silinib. İndiyə qədər bərpa prosesinə Avropa İttifaqı 1 avro belə ayırmayıb. Azərbaycan öz imkanları hesabına bərpa-quruculuq işlərini həyata keçirir. Bu, bir daha Aİ rəhbərliyinin iç üzünü ortaya qoyur. Halbuki, Azərbaycan illərdir Avropanın enerji təhlükəsizliyinə dəstək verir. Bunlar isə bütün vasitələrlə Ermənistanı dirçəltməyə səy göstərirlər”.
Vidadi ORDAHALLI
