Paşinyan Zəngəzur dəhlizində Rusiyaya yeni status uydurdu - "monitorinqçi"...

Tiqran Abramyan vəziyyətdən yararlanaraq Paşinyanı ifşa edir

Ermənistan siyasiləri ömrü boyu qazandıqları uğurların hamısını yalan danışmaqla, imzasından imtina etməklə, xəyanətlə, tərəfdaşını kürəyindən xəncərləməklə, terrorizmlə, köməksiz və dinc əhaliyə amansız divan tutmaqla əldə edib. Bu ənənəni erməni siyasətçilər bu gün də davam etdirməkdədilər. 

Bu əlamətlər, hətta ən demokratik dövlət başçısı sayılan Nikol Paşinyanın siyasətində belə qırmızı xətlə keçir. Hazirda Nikol Paşinyan həm Rusiyanın, həm də Qərbin yanında olduğunu iddia edir. İqtisadi baxımdan Ermənistan Rusiyanın, siyasi baxımdan isə Amerika və Qərbin yanındadır. Bu anormal bir siyasətdir və uzun çəkə bilməz. Çunki Ermənistanı hazırda yedirdən Rusiya olsa da, İrəvan siyasi baxımdan Qərbin sifarişlərini yerinə yetirir.

Başıbəlalı 10 noyabr Üçtərəfli Bəyanatın 9-cu maddəsi isə Paşinyanın üz qarasına çevrilib. İndiyə qədər Pasinyan "at kimi" Rusiyanın üzünə dururdu ki, sözügedən maddədə ümumiyyətlə Rusiyanın adı yoxdur. Baş nazir həmin maddəni şərh edəndə dəhlizin təhlükəsizliyinə zəmanət verdiklərini deyir, maddənin digər müddəasını isə sadəcə oxumurdu. İndi isə Nikol yeni versiya uydurub.

Ermənistanın rəhbəri regional blokadanın açılması ilə bağlı 10 noyabr tarixli sənədin 9-cu bəndi ilə bağlı müəyyən “aydınlaşdırmalar” verib ki, bu da onun əvvəlki şərhlərinə zidd olmaqla yanaşı, həm də bilərəkdən yalan ifadələri özündə ehtiva edir”, bunu Ermənistan Milli Assambleyasının “Mənim şərəfim var” fraksiyasının katibi Tiqran Abramyan deyib.

Fraksiya katibi əlavə edir ki, birincisi, indiki məqamda 3 il ərzində Rusiya Federasiyasının mövcudluğunu ümumiyyətlə görməyən və açıq-aşkar manipulyasiyalar aparan Paşinyan birdən-birə bu məqamda Rusiya Federasiyasına verilmiş funksiyanın olduğunu "xatırladı” və bunu belə formalaşdırdı: “Rusiya nümayəndələrinə nəzarət funksiyası təyin oluna bilər – görək Ermənistan öz öhdəliklərini nə dərəcədə yerinə yetirir? Amma burada da Rusiya prezidentinin fərmanına istinad edərək, rusların Ermənistan ərazisindən keçən dəhlizlə bağlı səlahiyyətlərini (Sünik istiqamətində - Zəngəzur dəhlizi) yalnız monitorinq funksiyası kimi təqdim edildiyini bildirəndə daha bir yalan önə çəkilir: "Ona görə ki, bu razılaşma Rusiya Sərhəd Xidmətinin funksiyasını monitorinq kimi deyil, nəzarət kimi müəyyən edir.

Doğrudanmı Paşinyan monitorinq və nəzarət sözlərinin fərqini və ya izahını bilmir? Əminəm ki, o, hər şeyi yaxşı bilir, amma yenə də yalan danışır.

Nəzarət daha geniş anlayışdır, həm də monitorinqi nəzərdə tutur. Lakin “nəzarət” termini həm də vəziyyətə nəzarəti nəzərdə tutur ki, bu da kommunikasiyaların təmin edilməsi baxımından daha böyük səlahiyyəti özündə ehtiva edə bilər.

Burada problem nədir? Nikol Paşinyan sənədi 2020-ci il noyabrın 9-da imzalayıb, lakin onun komanda yoldaşları, təbliğat vasitələri bu sənədi elə təqdim edirlər ki, sanki bu hadisə Kral Papın dövründə baş verib”.

Sözügedən bəyanatın 9-cu bəndi köhnə və yeni redaksiyada eyni məzmuna malikdir, yeni redaksiyada onun nömrəsi dəyişərək 10 olub: "Bölgədəki bütün iqtisadi və nəqliyyat əlaqələri blokdan çıxarılır. Ermənistan Azərbaycanın qərb bölgələri ilə Naxçıvan Muxtar Respublikası arasında nəqliyyat əlaqəsinə zəmanət verir. Nəqliyyat nəzarəti Rusiya Federasiyası Federal Təhlükəsizlik Xidmətinin Sərhəd Xidmətinin orqanları tərəfindən həyata keçirilir".

Yəni bəyanatın bu bəndində mübahisə doğuracaq, qaranlıq qalib, izaha ehtiyacı olan heç bir müddəa yoxdur. Sadəcə olaraq, bu bəyanat imzalanan ərəfədə Azərbaycan Ordusu surətlə irəliləyirdi. Razilaşma bir necə gün ləngisəydi Ermənistan ordusunun 24 mindən cox səxsi heyəti və Qarabağdakı əhali mühasirəyə düşə bilərdi. Ona gorə də Paşinyan Kremldə yazılan və Azərbaycanla razılaşdırılan bəyanata imza atdı. Bəlkə də o vaxt Paşinyan daha ağır şərtlərə razılaşardi, təki Azərbaycan Ordusu dayansın, atəşkəs elan edilsin. Çunki vəziyyət Ermənistan üçün olduqca gərgin idi. Daha sonra sulh danışıqlarının uzanmasında Rusiya maraqlı oldu. Çunki Rusiya sülhməramlı kontingenti ilə Qarabağda mövcud idi, düşünürdü ki, belə vəziyyət uzun müddət davam edə və yeni status-kvo yarana bilər. Lakin daha sonra vəziyyət dəyişdi, Azərbaycan ərazi bütövlüyünü bərpa etdi və Rusiya sülhməramlı kontingenti ilə vidalaşdı. Bu zaman kəsiyində isə Ermənistan-Qərb münasibətləti inkişaf etdi, Ermənistan özünə gəldi və nəinki Zəngəzur dəhlizinə nəzarəti Rusiyaya vermək fikrindən döndü, hətta Rusiyanın hərbi varlığına son qoymaq fikrinə düşdü. Ona görə də Paşinyan gah sözügedən sənədin 9-cu maddəsində Rusiyanın adını inkar edir, gah da deyir ki, Rusiya dəhlizdə nəzarətçi deyil, monitorinq funksiyasına malikdir.Tiqran Abramyan isə vəziyyətdən istifadə edərək, bir müxalifətçi kimi Paşinyani ifşa edir.

Akif NƏSİRLİ