13 yaşlı məktəbli Yusif beynəlxalq müsabiqə laureatı oldu... - FOTO
Yusif Sadıxov: "Müsabiqələrdə qazandığım uğurlar məni muğama daha da həvəsləndirdi"
Beynəlxalq müsabiqələr laureatı olan gənc musiqiçilərimiz, ifaçılarımız barədə "Bakı-Xəbər" olaraq müxtəlif yazılar hazırlayırıq. Ümumiyyətlə, musiqi, idman, təhsil və sair sahələrdə uğur qazanan uşaq, yeniyetmə və gənclərin uğurlu həyat hekayəsi başqalarına da böyük örnəkdir.
Bu dəfə sizə beynəlxalq və respublika müsabiqələri laureatı, XIII Beynəlxalq Uşaq Muğam Festivalının qalibi, Azərbaycan Milli Konservatoriyası tərkibində İncəsənət Gimnaziyasının şagirdi, 13 yaşlı muğam ifaçısı Yusif Sadıxovun uğur hekayəsini təqdim edirik.
Muğama qanı-canı ilə bağlı olan Yusif "Bayatı-Şiraz"ı hər dəfə ifa edəndə qəhər məni boğur" deyir. Bu onun muğamı iliyinə qədər hiss etdiyini göstərir.
"İstedadımı, musiqi duyumumu ilk dəfə nənəm kəşf edib"
Respublika və beynəlxalq müsabiqələrdə qalib olan Yusif Sadıxovun musiqiyə həvəsi üç yaşında özünü göstərməyə başlayıb. "İstedadımı, musiqi duyumumu ilk dəfə nənəm kəşf edib. Mənim musiqiyə marağım nənəmin diqqətindən yayınmayıb.
Nənəm məni nağara ixtisasına yazdırmaq istəyirdi. Amma bu zaman maraqlı bir hadisə baş verib. Səsimi yoxlayan müəllim mənim çox yaxşı musiqi duyumum olduğunu deyib. Bildirib ki, Yusif bu səslə gələcəkdə istedadlı xanəndə ola bilər" - deyir Yusif.
İstedadı nənəsi, səsi isə müəllim tərəfindən kəşf edilən Yusif 8 yaşında Müslüm Maqomayev adına 26 nömrəli onbirillik musiqi məktəbində təhsil almağa başlayıb. Hazırda o, 2022-ci ildən təhsilini Milli Konservatoriyanın tərkibində fəaliyyət göstərən İncəsənət Gimnaziyasında tanınmış ifaçı Aytən Məhərrəmovanın sinfində xanəndə ixtisası üzrə davam etdirir.
XIII beynəlxalq usaq muğam müsabiqəsinin qalibi olan Yusif eyni zamanda Heydər Əliyevin 100 illiyinə həsr olunmus Gənclər və İdman Nazirliyinin təşkilatçılığı ilə keçirilən müsabiqənin Qran Pri mükafatçısıdır. O, həmçinin Bülbül adına IV Respublika İncəsənət müsabiqəsinin qalibi olub, Elm və Təhsil Nazirliyinin "Şuşa" İli çərçivəsində təşkil etdiyi "Könlüm keçir Qarabağdan" müsabiqəsində də III yer tutub, nazirlik tərəfindən Fəxri fərmanla təltif olunub. " Nazirliyin keçirdiyi bu müsabiqə çox yaddaqalan oldu. Bundan sonra "Milli dəyərlərimiz muğam" məktəblilərin gözü ilə" müsabiqəsində I yeri qazandım. Müsabiqələrdə qazandığım uğurlar məni muğama daha da həvəsləndirdi. Mən muğamı çox sevirəm və daim öz üzərimdə işləyirəm. Əlbəttə, müəlliməm Aytən Məhərrəmovanın üzərimdə çox böyük əməyi var.
Ən böyük arzum Qarabağın işğaldan azad olunmuş bütün rayonlarında "Qarabağ şikəstəsi"ni canlı ifa etməkdir. Gələcəkdə peşəkar və sevilən xanəndələrdən olmaq istəyirəm. Dövlətin, cəmiyyətin mugamımıza göstərdiyi diqqət məni daha da həvəsləndirir.
Qeyd etdiyim kimi, ustadım tanınmış xanəndə Aytən Məhərrəmovadır və mən bütün uğurlarımı ustadıma borcluyam. Onun mənim üzərimdə zəhməti sonsuzdur".
Baki şəhərində doğulan 13 yaşlı xanəndənin musiqiyə həvəsinin hələ uşaq yaşlarından hiss olunması onun musiqici ailəsində doğulması ilə bağlıdır. "Mugam mənim ən çox sevdiyim musiqidir. Bir sıra dövlət tədbirlərində, şəhid və qazı ailələri üçün təşkil olunmuş tədbirlərdə iştirak etmişəm. Respublika İncəsənət Gimnaziyasının direktoru Aytən xanım Əhmədovaya və ustadım, "Tərəqqi" medallı, dəyərli sənətkar Aytən Məhərrəmova ya sonsuz təşəkkür edirəm ki, hər zaman mənə dəstəkdilər. Valideyinlerim mənə bu sənətdə hər zaman dəstək olub. Dediyim kimi, elə ilk dəfə istedadımı da nənəm kəşf edib".
Muğam yollarında kövrək addımlarını atan və qısa müddət ərzində böyük uğurlara, nailiyyətlərə imza atan 13 yaşlı Yusif Sadıxov gələcəkdə təhsilini Azərbaycan Milli Konservatoriyasında davam etdirmək istəyir. Yusifin ən böyük arzularından biri Azərbaycan muğamını ölkəmizdə və dünyada təbliğ etməkdir.
Yusif uğur hekayəsini öz istedadı, gözəl səsi, muğama həvəsi ilə yazmağa başlayıb. Ailəsinin, ustadının yaxından göstərdiyi dəstəyi, ona bəslədikləri inamı, etimadı o öz zəhməti ilə doğruldur.
Yusifin uğur cilalı həyat hekayəsinin başqa uşaqlar, yeniyetmələr üçün böyük örnək olacağı qənaətindəyik. Öz üzərində daim çalışmaq, səsinin üzərində işləmək, muğamın, musqinin sirlərinə vaqif olmaq üçün bütün enerjisini xərcləyən Yusifin gələcəyinin parlaq olacağına qətiyyən şübhəmiz yoxdur. Biz gələcəkdə onun səsini daha böyük səhnələrdən eşidəcəyik, Yusifi dünyanın ayrı-ayrı ölkələrində Azərbaycan muğamını təmsil edən xanəndə kimi görəcəyik.
Uğurlar, Yusif!
İradə SARIYEVA
