Son dünya turnirlərində gənc idmançılarımızın möhtəşəm nəticələri...
Gənc nəsli elə tərbiyə etmək lazımdır ki, yaxşıları özlərinə nümunə götürsünlər. Uşaq və gənclərdə mənəvi və fiziki tərbiyənin yüksək səviyyədə inkişaf etməsi üçün onların idmanla məşğul olmasını təmin etmək lazımdır.
Sözsüz ki, Azərbaycan dövləti uşaq və gənclərin idmanla məşğul olması üçün əlçatan şərait yaradıb, idmana, idmançılara böyük diqqət qayğı göstərir. Dövlətin idman siyasəti olduqca mükəmməldir və bunu idmanla bağlı biz bütün istiqamətlərdə müşahidə edirik. Gizlin deyil ki, həyatda hər bir insanın formalaşmasında idman, bədən tərbiyəsi müstəsna önəm kəsb edir. İdman insanın çoxşaxəli təhsilinin əsas növlərindən biridir, ümumi tərbiyə sisteminin praktiki olaraq ayrılmaz hissəsidir. Təhsilin müxtəlif aspektlərinin qarşılıqlı əlaqəsinin təbii ilkin şərti isə insanın fiziki və mənəvi inkişafının uğurlu vəhdətinin yaradılmasıdır. Azərbaycanın bir dövlət kimi gələcəyinin müəyyən edilməsi gənc nəslin hansı ruhda, hansı formada yetişdirilməsindən bilavasitə asılıdır. Qeyd edilənlər fonunda təsadüfi deyil ki, cəmiyyətin, xüsusən də onun gənclər təbəqəsinin fiziki və mənəvi inkişafında idmanın rolu daim yüksək qiymətləndirilir. Qeyd ediliyi kimi, Azərbaycanda bu müstəvidə genişmiqyaslı işlər görülür. Ölkə əhalisinin müxtəlif kateqoriyalarının və qruplarının, ilk növbədə uşaqların və gənclərin fiziki hazırlığının yüksəldilməsində bu mənada ciddi nailiyyətlər qeydə alınır. Sağlam həyat tərzi formalaşdırmaq məqsədilə müxtəlif proqramlar tətbiq olunur. Hazırda bu, Azərbaycanın sosial-iqtisadi inkişafının prioritetləri və məqsədlərindən biri kimi təsbit edilir. Burada məqsəd həm də gənclərin vətənpərvər ruhda yetişməsinə nail olmaqdır.
Uşaq və gənclərin yalnız fiziki deyil, eyni zamanda mənəvi inkişafında da bədən tərbiyəsinin, idmanın ayrıca yeri var. İdmanla məşğul olan gənclərə, uşaqlara fikir versək görərik ki, idman onların əxlaqının, mənəviyyatının formalaşmasında, vətənpərvərlik ruhunda tərbiyə olunmasında xüsusi rol oynayır. Belə uşaqlar adətən pis vərdişlərdən uzaq olur, onlarda nizam-intizam, dürüstlük, məsuliyyət kimi ali keyfiyyətlər üstünlük təşkil edir.
Uşaqlıqdan idmana meyl edən və böyüyəndə idmanın müxtəlif sahələri ilə peşəkar səviyyədə məşğul olan, yerli və beynəlxalq turnirlərdə yüksək nəticələr əldə edən gənclərin fəaliyyətlərinin uşaqlara və gənc nəsilə yaxşı bir örnək olduğu danılmazdır.
Çempion Azərbaycan idmançıları uşaq və gənclərə nümunədir...
Əlbəttə, gənc nəslin vətənpərvərlik ruhunda tərbiyəsi üçün Azərbaycan dövləti bütün imkanlarını səfərbər edib.
Azərbaycan idmançılarının Avropa və dünya çempionatlarında, Paris-2024Yay Paralimpiya Oyunlarında qazandığı yüksək nəticələrin gənclərin və uşaqların idmana marağının artmasına necə kömək edir, onlara stimul verirmi? Onların fiziki və mənəvi tərbiyəsində necə rol oynayır?
Paris-2024 Yay Olimpiya Oyunlarında, Paris-2024 Yay Paralimpiya Oyunlarında Azərbaycan idmançılarının göstərdiklər nəticələr sözün həqiqi mənasında tarixə yazıldı. Düzdür, müəyyən narazılıqlar oldu, “daha çox medal qazana bilərdik”, “qızıl medallarımızın sayı daha çox ola bilərdi” deyənlər və yazanlar da çox oldu. Amma bunu deyənlər onun fərqinə varmadılar ki, Azərbaycan idmançıları bu nəticəni bizə qarşı həmişə qərəzli siyasət yürüdən Fransada əldə edib və bir qızıl medal belə qazanılsaydı bu bizim üçün az nəticə deyildi. Əsas o idi ki, Parisdə bayrağımız ucaldıldı, himnimiz səsləndirildi. İdmanın çoxdan bəridir ki, siyasi alətə çevrildiyi gün kimi aydındır.
İdmançılara dövlət dəstəyi...
Olimpiyaçılarımızın uğurlarına ən böyük qiyməti Prezident İlham Əliyev verdi və onları təbrik və təltif etdi, barələrində xoş sözlər dedi, tövsiyyələr, tapşırıqlar verdi, gözləntilərini dilə gətirdi.
Milli Olimpiya Komitəsinin Prezidenti İlham Əliyev avqustun 14-də XXXIII Paris Yay Olimpiya Oyunlarında medal qazanmış Azərbaycan idmançılarını və onların məşqçilərini qəbul edərkən bildirirdi: “...Olimpiya Oyunları bütün digər idman yarışları arasında xüsusi yer tutan bir yarışdır, dörd ildən bir keçirilən idman bayramıdır və əlbəttə ki, hər bir idmançı, hər bir ölkə bu Oyunlara xüsusilə hazırlaşır. Bizim Olimpiya Oyunlarındakı uğurlarımız əvvəlki illərdə də, son Oyunlarda da göstərir ki, Azərbaycan güclü idman dövlətidir. Təsadüfi deyil ki, biz bu Oyunlarda dünyanın ən güclü 30 ölkəsinin arasında yer almışıq - 2 qızıl, 2 gümüş və 3 bürünc medal, hesab edirəm ki, çox yaxşı nəticədir. İdmançıları, onların məşqçilərini bu gözəl hadisə münasibətilə bir daha təbrik etmək istəyirəm.
Onu da bildirmək istəyirəm ki, müsəlman ölkələri arasında Azərbaycan üçüncü yerdə qərarlaşıb. Nəzərə alsaq ki, İslam Əməkdaşlıq Təşkilatında 57 üzv mövcuddur, hesab edirəm, bu, çox gözəl və tarixi nəticədir. Bütövlükdə komandamızın çıxışına qiymət verərək mən hesab edirəm ki, bizim idmançılarımız ən yüksək qiymətə layiq olmalıdır”.
Məlum olduğu kimi, XXXIII Yay Olimpiya Oyunlarında - Paris-2024-də 15 idman növü üzrə 17 proqramda 48 idmançı ilə təmsil olunan Azərbaycan millisinin qazancı 7 medal (2 qızıl, 2 gümüş, 3 bürünc) oldu. Cüdoçulardan Hidayət Heydərovla (73 kq) Zelim Kotsoyev (100 kq) fəxri kürsünün ən yüksək pilləsinə yüksəlməklə Fransa paytaxtında Azərbaycanın Dövlət Himninin səsləndirilməsinə nail oldular. Taekvondoçu Qaşım Maqomedovla (58 kq) boksçu Alfonso Dominqes (92 kq) yalnız final görüşündə uduzmaqla gümüş medal qazandılar. Millimizin hesabına 3 bürünc medalı isə yunan-Roma güləşçisi Həsrət Cəfərov (67 kq), sərbəst güləşçilər Maqomedxan Maqomedov (97 kq) və Giorgi Meşvildişvili (125 kq) yazdırdılar.
Paris Yay Olimpiya Oyunlarında komandamız 7 medal qazanaraq Azərbaycanın tarixində ilk dəfə ümumi hesabda 30-cu yeri tutmuşdusa, paralimpiyaçılarımız 11 medalla 28-ci nəticəni göstərdi. Ekspertlər hesab edir ki, ötən paralimpiadalara nəzər salsaq, budəfəki yarışlarda paralimpiyaçılarımızın xüsusilə fərqləndiyini vurğulaya bilərik.
Paralimpiyaçılarımızın uğurları böyük örnəkdir
Paraatletikadan Parisdə ən yaxşı nəticə göstərildi.
5 idmançı ilə çıxış edən paraatletika millimizin heyətində Səid Nəcəfzadə (T12, uzunluğa tullanma), Orxan Aslanov (T13, uzunluğa tullanma) və Lamiyə Vəliyeva (T13, 100 metr qaçış) fəxri kürsünün ən yüksək pilləsində yer aldılar. “Tokio-2020”də 1 qızıl və 1 gümüş medal qazanan Lamiyə Vəliyeva mötəbər yarışın favoritləri arasında idi. 22 yaşlı atlet builki dünya çempionatında iştirak etdiyi 100 və 400 metr məsafələrə qaçışda qızıl medal qazanmışdı. O, Paris Paralimpiadasında qızıl medalla yanaşı, 400 məsafə üzrə qaçışda da uğurla çıxış edərək gümüş medala sahib oldu. 151 ölkə təmsilçilərinin mübarizə apardığı paratletika yarışlarında komandamız yekun sıralamada 19-cu yeri tutdu.
Paraüzgüçülərimiz də yaxşı nəticə təqdim etdilər. Belə ki, paralimpiadada paraüzgüçülük üzrə komandamız da fərqləndi. Üzgüçü Raman Salei bundan əvvəl sahib olduğu 4 paralimpiya medalına daha 3-nü (1 gümüş və 2 bürünc) əlavə etdi. Tokio Paralimpiadasının qalibi Vəli İsrafilov (100 metr, brass, SB13) isə bu dəfə bürünc medal qazandı. Deməli, paralimpiadada 11 medaldan 8-i bu idman növlərinin payına düşür. Ötən paralimpiadalarda da atletika və üzgüçülük üzrə yaxşı nəticələr qazanılıb.
İlk parataekvondo medallarımızı onlar qazandı
Məlum olduğu kimi, Paris Paralimpiadasında parataekvondoda Azərbaycan ilk medallarını qazandı. Bu növdə qızıl medala sahib olan İmaməddin Xəlilov (70 kq, K44) idman tariximizə ilk Paralimpiya çempionu kimi düşdü. Yığmamızın digər üzvü Sabir Zeynalov (58 kq, K44) isə 3-cü yeri tutdu.
Yığmamızın üzvü “Afina-2004”də ilk medalını qazanan əfsanəvi idmançı İlham Zəkiyevin nailiyyətini yaddan çıxarmamalıyıq. Afina və Pekin paralimpiadalarının qalibi, London, eləcə də Rio oyunlarında 3-cü yeri tutan 44 yaşlı cüdoçu bu dəfə xalqımızı bürünc medalla sevindirdi.
Bu idmançılarımızın göstərdikləri yüksək nəticələr, onların gənclərə örnək olan idman mücadiləsi tərbiyəvi əhəmiyyətə malikdir. Əlbəttə, gənclərimiz bu parlaq isimlərdən, mübariz Vətən övladlarından nümunə götürüb öz həyatlarını sağlam təməllər üzərində qurmalıdırlar.
İradə SARIYEVA
Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
