İran gizli şəkildə ilk nüvə sınağını keçirib - Simnandakı zəlzələ ilə başlı şok iddia...
Ötən şənbə İranın Simnan əyalətinin Aradan şəhərində baş verən 4,4 bal gücündə zəlzələnin ilk nüvə sınağından qaynaqlandığı iddia edilir. Belə ki, Tehran rejiminin İsrailin öz ərazisinə hücumlarına qarşı çəkindirici tədbir olaraq ilk yeraltı nüvə sınağını həyata keçirməsi ilə bağlı iddialar ortaya atılıb.
Nüvə sınaqları ilə bağlı iddialar onlarla iranlı millət vəkilinin ölkənin Ali Təhlükəsizlik Şurasına məktub yazaraq nüvə silahı əldə etməyə çağırdığı bir vaxta təsadüf edir.
İran xəbər agentliyinin nüvə sınağı iddialarının “şayiə” olduğunu bildirməsinə baxmayaraq, sosial şəbəkələrdə İranın ilk nüvə sınağını keçirməsi xəbərləri geniş yayılıb. Hətta bununla bağlı iddialar Qərb mediasında da yer alıb.
Vaşinqtonda yerləşən Demokratiyaların Müdafiəsi Fondu (FDD) 2019-cu ildə İranın “Sahə Layihəsi” kimi tanınan yeraltı nüvə sınaqları meydançalarının tikintisi proqramına start verdiyi barədə hesabat dərc edib. Ehtimal edilir ki, Simnanda zəlzələyə səbəb olan nüvə sınağı da məhz burada keçirilib.
Qeyd edək ki, bir neçə gün əvvəl İran parlamentinin 39 deputatı nüvə silahını qadağan edən fətvanın dəyişdirilməsini tələb edib. Məsələ ilə bağlı Məşhəddə millət vəkili seçilən Həsən Ali Ahlaki, İranın müdafiə doktrinasının nəzərdən keçirilməsini ehtiva edən məktubu 39 deputatın imzası ilə İran Parlamentinin Milli Təhlükəsizlik Ali Şurasına təqdim etdiklərini deyib.
TAHİR
