MSK-ya 2 dəfə çox pul ayrıldı - 2024-də seçki ehtimalı yenidən gündəmdə...
Məhərrəm Zülfüqarlı: “Qarşıdan gələn iki il Azərbaycanda seçki ili olacaq, çoxlu yeniliklər gözlənilir”
2024-cü ilin dövlət büdcəsində Mərkəzi Seçki Komissiyasına (MSK) seçkilərin keçirilməsi və statistika tədbirləri üçün 110 milyon 935 min manat ayrılması nəzərdə tutulub.
Bu, 2023-cü ilin dövlət büdcəsindən eyni istiqamətə ayrılan vəsaitlə müqayisədə 2.3 dəfə çox vəsait deməkdir.
Deməli, hansısa əlavə növbədənkənar seçki və ya referendum keçirilməsi ehtimalı var. Seçki ilə bağlı yeni nə gözlənir?
Seçki proseslərində ciddi təcrübəsi olan professor Məhərrəm Zülfüqarlı “Bakı-Xəbər”ə açıqlamasında bildirdi ki, gələn ilin dekabrında növbəti bələdiyyə seçkiləri keçiriləcək: “2025 - ci il həm prezident, həm də parlament seçkilərinə düşür. Əvvəlki referenduma görə, prezident seçkiləri 7 ildən bir, parlament seçkiləri isə 5 ildən bir keçirilir. Ona görə də, üst - üstə düşür. Mətbuatdan da bildiyimiz kimi, bir sıra islahatlar həyata keçirilməlidir. Ölkənin inzibati strukturunda iqtisadi rayonlarların olması, icra hakimiyyətləri, Naxçıvanla bağlı islahatların keçirilməsi nəzərdə tutulur. Bundan başqa, bir sıra siyasilərin dediyi kimi, parlament seçkilərində proporsional seçkinin bərpa olunması məsələsi də gündəmdə ola bilər. Ona görə də, referendumun keçirilməsinə ehtiyac olacaq. Parlament seçkiləri ilə prezident seçkiləri üst - üstə düşdüyünə görə, ola bilsin ki, yerləri dəyişdirilsin. Parlament seçkiləri nisbətən önə çəkilə bilər. Prezident seçkiləri isə öz zamanında keçirilə bilər. Bütün bunlar onu göstərir ki, qarşıdan gələn iki il Azərbaycanda seçki ili olacaq, çoxlu yeniliklər gözlənilir. Yeni parlament, yeni bələdiyyə və bələdiyyələrin statusunun artırılması məsələsi nəzərdə tutulur. Buna görə də, büdcənin artırılması təbiidir. Çünki adi illərdə seçki komissiyaları dinc şəraitdə fəaliyyət göstərirlər. Ancaq indi birbaşa seçkidə əmək haqqı nisbətən artırıla bilər, yeni işçilərin cəlb olunması məsələsi, MSK - nın tərkibinin dəyişilməsi məsələsi də ola bilər. MSK köhnədir və artıq insanların onlara inamları da azalır. Yeni simaların MSK - da, məntəqələrdə olmasına ehtiyac var. Bütün bunlar onu göstərir ki, iki il Azərbaycanda fəal siyasi proseslərin cərəyan edəcəyi dövr olacaq və büdcənin də artırılması təbiidir. Xalqımız üçün stabil, sakit, dövlətçiliyimiz üçün xeyirli ola biləcək ilin olacağına ümid edirəm. Başqa ölkələrdən fərqli olaraq, qarşıdurmasız, dövlətçiliyimizə xidmət edən hadisələrin olacağına inanırıq. Yəqin ki, belə də olacaq. Azərbaycan dövlətinin hazırda tutduğu mövqe vacibdir. Çünki Azərbaycan qazandığı qələbələrlə, uğurlarla, işğaldan azad edilmiş torpaqlarımızın bərpası ilə dünyada imicini daha da artırdı. Ona görə də, bu iki ili də elə keçirməliyik ki, beynəlxalq aləmdə imicimiz daha da yüksəlsin, nüfuzumuz daha da artsın”.
Məhəmmədəli QƏRİBLİ
