Vətən sevgisinin şəhidlik zirvəsi... - FOTO
Sentyabrın 27-də 44 günlük haqq savaşımız başlayanda bir çox igid, qeyrətli Vətən övladları kimi 1981-ci ildə Astara şəhərində anadan olan, Azərbaycan Ordusunun kiçik çavuşu Nurlan Rəhimov da ön cəbhənin ən qaynar nöqtələrinə yollanıb. Amalı tezliklə Qarabağı mənfur düşmən tapdağından azad görmək olan cəsur döyüşçü odun-alovun içində böyük şücaət göstərərək, əzmlə vuruşaraq mənfur düşmənin kabusuna çevrilib. Həmçinin şəxsi şücaəti onunla çıyin-çiyinə vuruşan əsgərləri ruhlandırıb, qələbə üçün böyük təminatlar yaradıb.
30 sentyabrda Xocavənd rayonunun Üçtəpə adlanan ərazisində Vətənin və torpaq uğrunda şəhidlik olmaqla özünə milyonların ürəyində əbədi yurd-yuva qurub. Örnək olacaq bir tarix yazan şəhid Nurlan Rəhimov həm də ölümündən sonra dövlət tərəfindən “Vətən uğrunda”, “Döyüşlərdə fərqlənməyə görə” və digər medallara layiq görülüb.
Bütün bunlarla bərabər 2008-ci ildə Səbinə xanımla ailə həyat quran Nurlan yaxşı ailə başçısı, valideyn kimi cəmiyyətdə sayılıb-seçilib. Vətənə əmanət qoyduğu Əlövsət və Səidə adlı övladlar vardır. Həyat yoldaşı Səbinə xanım ləyaqətlə, şərəflə yaşamağı bacarır. Nurlan haqqında haçan onu dindirsən bunları deyir: ” Hə kəsin öz həyatı, sevgi hekayəsi, nağıl dünyası var. Mənim həyatımın, sevgimin, bütün nağıllarımın qəhrəmanı Nurlan olub. Əvəzsiz həyat yoldaşı, ən qayğıkeş ata idi. Son dəfə döyüşdən əvvəl danışdıq... Səngərdə şəkil çəkdirib göndərmişdi. Sən demə bu, onun son şəklidir... İndi bütün Azərbaycan xalqının qürur yeridir mənim Nurlanım. Hər dəfə onun adı çəkiləndə fəxr edirəm... Həyat onsuz çətin olsa da, çalışıram ki, Vətənə yadigar qoyduğu övladlarını Nurlanın adına layiq böyüdüm”.
Səbinə xanım ali təhsilli müəllimdir. Hazırda Astara Pedaqoji Kollecində kitabxanaçı işləyir. Kollecin direktoru və bir qrup əməkdaşı Səbinə Rəhimovanın ömür-gün yoldaşı Nurlan Rəhimovun halal ailə ocağına baş çəkib, həmçinin şəhidin ev muzeyi ilə ətraflı tanış olublar . Onu da deyiblər ki, Nurlan kimi qəhrəman oğulların qanı hesabına 30 il düşmənə əsir düşən torpaqlarımz Vətən oldu. Bu yolda can qoyanlar isə heç vaxt unudulmazlar.
Zəfər ORUCOĞLU
Azərbaycan Jurnalistlər Birliyinin üzvü
