Qars-Gümrü dəmiryolu Türkiyənin Orta Asiya qapısıdır? - Erməni fantaziyaları bitmir...
Məhəmməd Əsədullazadə: “Gümrü-Qars dəmiryolu o zaman açılacaq ki, Zəngəzur dəhlizi işə düşsün”
“Bilirik ki, hazırda bir çox tədarük zəncirləri bağlanıb və ya düzgün işləmir və Qars-Gümrü dəmir yolu Ermənistan üçün Avropaya, Türkiyə üçün Mərkəzi Asiyaya və Çinə açılan yeni qapı ola bilər”.
Bunu Türkiyənin “Anadolu” agentliyinə müsahibəsində Ermənistan xarici işlər nazirinin müavini Vahan Kostanyan deyib. Onun fikrincə, bu dəmir yolu marşrutunun bərpası, təkcə Ermənistan və Türkiyəyə deyil, bütün regiona iqtisadi fayda gətirəcək.
“Bir çox logistika zəncirləri hazırda bağlanıb və ya səmərəsiz işləyir” – deyə Kostanyan qeyd edib.
O, həmçinin, üçüncü dövlətlərin vətəndaşları və diplomatları üçün Marqarada sərhədin açılması ilə bağlı hələ reallaşdırılmamış razılaşmaya diqqət çəkib.
“Biz bir daha təsdiqlədik ki, Ermənistan tərəfi sazişin icrasına başlamağa hazırdır”, - deyə Kostanyan bildirib. O, erməni tərəfinin müxtəlif türk tərəfdaşlarına çatdırmağa çalışdığı mesajı təkrarlayıb: “Hərəkət etmək vaxtı çatıb. Biz vaxt itirməməliyik”.
Göründüyü kimi, Ermənistan rəsmisi böyük iddialardan dəm vurur. Sanki erməni rəsmilər öz aləmlərində Zəngəzur dəhlizini silib atıblar bir qırağa. Guya Türkiyə Zəngəzur dəhlizi ilə Mərkəzi Asiyaya çıxmayacaq. Belə çıxır ki, güya Türkiyə Azərbaycan kimi ölkəni kənara qoyub Ermənistan vasitəsi ilə Mərkəzi Asiyaya gediş-gəlişi təmin edəcək. Məgər, praktiki olaraq bu realdırmı?
“Ona görə də Kostanyanın bu xüsusda verdiyi açıqlamalar sadəcə gülüş doğurur”
Sözügedən məsələni “Bakı-Xəbər”ə şərh edən politoloq Məhəmməd Əsədullanın fikrincə, Zəngəzur dəhlizi olmadan bunu reallaşdırmaq illüziyadır: “Bəli, erməni rəsmisi müsahibəsində, ümumiyyətlə Zəngəzur dəhlizinin adını çəkmir. Ancaq ermənilərin nə deməsindən asılı olmayaraq, Zəngəzur dəhlizi Orta Dəhlizin bir seqmentidir. Ən başlıcası isə, dünyanın əsas arteriyasıdır, Qərblə Şərqi birləşdirən əsas nəqliyyat qovşağıdır. O cümlədən, Türkiyənin də iqtisadi maraqlarına cavab verir. Həqiqətən də Türkiyə ilə Ermənistan arasında müəyyən razılaşmalar əldə edilib, amma İrəvanın qeyri-konstruktivliyi üzündən bu razılaşmalar yerinə yetirilmir. Çünki Türkiyənin şərti var. Azərbaycanla münasibətlər normallaşdırılmalıdır və Zəngəzur dəhlizi açılmalıdır. Vahan Kostanyanın nə xəyal etməsinin praktiki baxımdan heç bir mənası yoxdur. Bu gün Gürcüstanda gedən siyasi proseslər bu ölkə üzərindən keçəcək Orta Dəhlizə risq yaradır. Ona görə də Qərb artıq Zəngəzur dəhlizinin açılmasında maraqlıdır. Həmin dəhliz Ermənistanın da iqtisadi maraqlarına cavab verir. İndi Ermənistan Zəngəzur dəhlizini gündəmdən çıxarmağa çalışsa da, buna nail ola bilməyəcək. Türkiyə bu məsələdə israrlıdır. O baxımdan hesab edirəm ki, Zəngəzur dəhlizi açılacaq və Türkiyədən yüklər bu dəhliz vasitəsilə Orta Asiyaya daşınacaq. Ona görə də Ermənistan bu meqa layihəni əngəlləyə bilməyəcək. Gümrü-Qars dəmiryolu o zaman açılacaq ki, Zəngəzur dəhlizi işə düşsün. Ona görə də Kostanyanın bu xüsusda verdiyi açıqlamalar sadəcə gülüş doğurur. Azərbaycansız bunların heç biri olmayacaq”.
Vidadi ORDAHALLI
