Hikmət Babaoğlu: "Qərbi Azərbaycana qayıdış üçün səslənən sözlər həm mənəvi, həm də siyasi kompas rolunu oynayacaq"
Qərbi Azərbaycana qayıdış xalqımızın mənəvi və tarixi haqqıdır. Qərbi Azərbaycan, indiki Ermənistan ərazisi azərbaycanlıların minilliklər boyu yaşadıqları torpaqlardır. Xatırladaq ki, XX əsrdə baş verən faciəli hadisələr nəticəsində, xüsusilə 1948-1953-cü illərdə və 1988-ci ildə Ermənistan tərəfindən azərbaycanlılar öz tarixi yurdlarından kütləvi surətdə deportasiya ediliblər.
Bu deportasiyalar və etnik təmizləmə aktları xalqımızın haqqını və mənəvi hüququnu pozub. Azərbaycan xalqı Qərbi Azərbaycana dinc qayıdışı tələb edir.
Prezident İlham Əliyev dəfələrlə Qərbi azərbaycanlıların öz doğma torpaqlarına geri qayıdacağını bəyan edib. Bakıda Azərbaycan aşıq yaradıcılığının görkəmli nümayəndəsi, böyük el sənətkarı Aşıq Ələsgərin abidəsinin açılışında iştirak edərkən də dövlət başçısı qərbi azərbaycanlıların öz dədə-baba torpaqlarına qayıdacağını dilə gətirib: "Əlbəttə ki, Vətən sevgisi, o torpaqlar unudulmayıb və unudulmayacaq, o torpaqları görməyən Qərbi azərbaycanlıların sonrakı nəsilləri Vətən həsrəti ilə yaşayırlar".
"İlham Əliyev əminliklə bildirdi ki, azərbaycanlılar yenidən öz tarixi torpaqlarına geri qayıdacaq, bu, milli iradəmizin ardıcıllığı və əzminin göstəricisi kimi qəbul edilməlidir"
Məsələ barədə fikir bildirən Qərbi Azərbaycan İcmasının İdarə Heyətinin sədr müavini, millət vəkili, professor Hikmət Babaoğlu "Bakı-Xəbər"ə şərhində bildirdi ki, Aşıq Ələsgərin abidəsinin açılışında iştirak edən Prezident İlham Əliyev Qərbi Azərbaycana geri qayıdışla bağlı mühum mesajlar verdi və çox tarixi fikirlər səsləndirdi: "İlham Əliyev çıxışında qeyd etdi ki, Aşıq Ələsgər də 1918-ci ildə öz torpaqlarını tərk etmək məcburiyyətində qalıb, ermənilərin etnik təmizlənmə siyasətinə məruz qalıb. 1948-1953-cu illərdə də azərbaycanlılar öz torpaqlarından deportasiya edilib. Həmçinin, 1988-1991-ci illərdə də vətəndaşlarımız öz yurdlarından tamamilə çıxarıldılır. İlham Əliyev əminliklə bildirdi ki, azərbaycanlılar yenidən öz tarixi torpaqlarına geri qayıdacaq. Bu, milli iradəmizin ardıcıllığı və əzminin göstəricisi kimi qəbul edilməlidir. Cənab Prezident onu da bildirdi ki, Aşıq Ələsgər Kəlbəcərdə yaşayıb. O, 97 yaşında Kəlbəcərə gəlib və 100 yaşında yenidən öz torpağına geri qayıdıb. 100 yaşında olan bir ahıl öz yurduna geri qayıdırsa yeni nəsil o torpaqlara sevə-sevə qayıdacaq. Hesab edirəm ki, bu, xalqımızın mübarizə əzminin göstəricisi olmaqla bərabər, milli vəzifələrimizdən biridir. Qərbi Azərbaycana qayıdış üçün səslənən sözlər həm mənəvi, həm də siyasi kompas rolunu oynayacaq".
Günel CƏLİLOVA
