AYNA Bakıda yeni layihə hazırlayır...
Aslan Əsədov: “Taksi duracaqlarının olması o ərazidə nəqliyyat sıxlığının qarşısını ala bilər”
Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyi (AYNA) taksi duracaqlarının təşkil edilməsi ilə bağlı layihə hazırlayıb. Bu barədə agentliyin açıqlamasında bildirilir.
Məlumatda deyilir ki, Bakının bir sıra küçə və prospektlərində 130-dan artıq taksi duracağı mövcuddur. Onların əksəriyyəti cəlbetmə məntəqələrində təşkil edilmədiyindən bəzən nəqliyyatın hərəkətinə maneə yaradır. Buna görə də AYNA məsələyə kompleks yanaşma tətbiq edir.
Məlumat üçün bildirək ki, əksər xarici ölkələrdə, elə qonşu Türkiyədə belə taksi dayanacaqları var. Türkiyədə taksilərin hamısı, demək olar ki, taksi dayanacaqlarında dayanır və müştəri gözləyir. Müştəri də taksi lazım olanda hara müraciət edəcəyini yaxşı bilir. Ekspertlər hesab edir ki, Bakıda da taksilər üçün dayanacaq yaradılmalıdır.
Maraqlıdır, taksi duracaqlarının yaradılması Bakıda nəyi dəyişəcək?
Rauf Ağamirzəyev: “Taksi dayanacağı olmalıdır”
Nəqliyyat eksperti Aslan Əsədov “Bakı-Xəbər”ə şərhində bildirdi ki, şəhər nəqliyyatın aparıcı qüvvələrindən biri də taksi xidmətidir: “Taksi xidməti fərdi iş kimi görünə bilər. Ancaq belə deyil. Hazırki şəraitdə Bakı şəhərində taksi duracağının olması hava-su kimi lazımdır. Çünki taksi duracaqları paytaxt ərazisində barmaqla sayılacaq səviyyədədir. Taksi duracaqalarının yetərli sayda olmaması insanlar arasında narahatlığa səbəb olur. Məlumdur ki, dayanacaqda duran şəxs marşrutun gəlməsini gözləyir. Marşrut olmadıqda şəxs taksi xidmətindən istifadə etməli olur”.
Ekspert hesab edir ki, taksi duracaqlarının olması o ərazidə nəqliyyat sıxlığının qarşısını ala bilər.
Nəqliyyat eksperti Rauf Ağamirzəyev də hesab edir ki, taksi dayanacağı olmalıdır: “Sadəcə nəzərə alaq ki, paytaxtda əsaslı təmir gedən küçələr yenidən transformasiya olunur və ola bilər ki, taksi dayanacaqlarının yerləri dəyişsin. Bu, mütləq olmalıdır. Hazırda “taksi” ilə bağlı müəyyən islahatlar gedir”.
Günel CƏLİLOVA
