Rusiya hədələdi - ABŞ Finlandiyada baza qursun və cavabını alsın...
Ramil Məmmədli: “ABŞ bazaları ora yerləşsə, Rusiyanın təhlükəsizliyi üçün müəyyən təhdidlər yaranır”
“Rusiya bununla bağlı ölkənin milli təhlükəsizliyinə təhdidlərin qarşısını almaq üçün həm hərbi-texniki, həm də digər xarakterli cavab tədbirləri görməyə məcbur olacaq”. Rusiya Xarici İşlər Nazirliyinin sözçüsü Mariya Zaxarova Finlandiyanın ABŞ-la müdafiə sazişi imzalamağa hazır olması ilə bağlı açıqlamasını şərh edərkən belə deyib.
Daha sonra Zaxarova bunları qeyd edib: “Mən təsdiq edə bilərəm ki, bununla bağlı Rusiyanın milli təhlükəsizliyinə təhdidlərin qarşısını almaq üçün həm hərbi-texniki, həm də digər xarakterli cavab tədbirləri görməyə məcbur olacağıq. Ölkəmizin konkret addımları qeyd olunan sazişin həyata keçirilməsi üçün konkret addımlardan və əməli fəaliyyətlərdən, o cümlədən Amerika kontingentinin Finlandiya hərbi bazasında yerləşdirilməsindən asılı olacaq”.
“Zaxarovanın hədələyici tonda danışması Rusiyanın Finlandiya ilə uzun sərhədə malik olması ilə bağlıdır”
Sözügedən məsələni “Bakı-Xəbər”ə şərh edən hərbi ekspert Ramil Məmmədli Zaxarovanın Fillandiya ilə bağlı belə sərt mövqe sərgiləməsini müəyyən amillərlə əlaqələndirdi: “Məsələ ondadır ki, Finlandiyanın NATO-ya üzv olması Rusiya üçün çox gözlənilməz oldu. Onlar Finlandiyanın belə bir addım atacağını düşünmürdülər. Ancaq Rusiya-Ukrayna müharibəsi Finlandiyanın NATO-ya daxil olması üçün sanki bir bəhanə oldu. O cümlədən, NATO öz sıralarını genişləndirmək üçün bundan bir vasitə kimi istifadə etdi. Xüsusən də bunun arxasında Birləşmiş Ştatların dayanması istisna deyil. ABŞ-ın marağı olmasaydı Finlandiya qısa müddətdə alyansa daxil olmazdı. Zaxarovanın hərbi bazalarla bağlı hədələyici tonda danışması Rusiyanın Finlandiya ilə uzun sərhəddə malik olması ilə bağlıdır. Məsələ ondadır ki, Finlandiya Rusiya ilə 1340 kilometr quru sərhəddə malikdir. Faktiki olaraq Rusiyanın NATO ilə olan sərhədi xeyli uzandı. Halbuki, Rusiyanın Ukraynaya hücum etməkdə məqsədi həm də o idi ki, NATO-nun şərqə doğru genişlənməsinin qarşısını alsın. Ancaq bunun tam tərsi oldu. Finlandiya məsafə baxımından Sankt-Peterburq şəhərinə çox yaxındır. Bu amil Moskvanı çox narahat edir. Çünki ABŞ bazaları Finlandiyaya yerləşsə, o zaman Rusiyanın təhlükəsizliyi üçün müəyyən təhdidlər yaranır. Ona görə də Zaxarova hədələcəyici tonda danışır ki, ABŞ bu addımı atmaqdan çəkinsin. Eyni zamanda Finlandiya buna razılıq verməsin. Bunun nə dərəcədə mümkün olub-olmayacağını proqnozlaşdırmaq çətindir. Hesab edirəm ki, Ukrayna ilə gedən müharibənin nəticələri bu yöndə gedən proseslərə və hərbi baza ilə bağlı gözləntilərə öz təsirini göstərəcək”.
Vidadi ORDAHALLI
