Dövlət qulluğuna qəbul müsahibələrində subyektivlik ciddi problemə çevrilib...
Kamran Əsədov: “Müsahibə mərhələsində dövlət qurumları öz adamları olmayan şəxslərin işə qəbul prosesinə müsbət yanaşmır”
Uzun müddətdir, dövlət qulluğuna qəbul imtahanlarının müsahibə mərhəsi ilə bağlı narazılıqlar səslənir. Bu məsələ Milli Məclisdə də müzakirə olunub.
Qeyd edilir ki, dövlət qulluğunun müsabiqə mərhələsindən yüksək bal toplayanlar müsahibə mərhələsindən keçə bilmirlər. İddia olunur ki, müsahibə mərhələsində subyektiv amillər rol oynayır.
Maraqlıdır, dövlət qulluğunun müsahibə mərhələsinin keçirilməsində keyfiyyətli sistem formalaşıbmı?
“Dövlət qulluğunun test mərhələsi kifayət qədər şəffaf və əlçatandır, ancaq müsahibə mərhələsində bu hal müşahidə olunmur”
Təhsil eksperti Kamran Əsədov “Bakı-Xəbər”ə açıqlamasında qetd etdi ki, 2006-cı ildən etibarən Azərbaycanda dövlət qulluğuna imtahan mərkəzləşmiş test qaydasında həyata keçirilir. 2016-cı ildən bu proses Dövlət İmtahan Mərkəzinə verilib: “Test mərhələsindən keçənlərin sayı çox olsa da, müsahibə mərhələsində fərqli mənzərə müşahidə olunur. Belə ki, müsahibə mərhələsində dövlət qurumları öz adamları olmayan şəxslərin işə qəbul prosesinə müsbət yanaşmır. Ümumiyyətlə, bir neçə dövlət qurumu var ki, kənar şəxslərin işləməsinə mane olur”.
Ekspert hesab edir ki, dövlət qulluğunun müsabiqə mərhələsində 90-dan yuxarı bal toplayanlar müsahibə mərhələsindən azad olmalıdır. Belə olarsa heç bir dövlət qurumu işə qəbula təsir göstərə bilməz: “Qeyd etdiyim kimi, müsahibə mərhələsində ciddi subyektiv təsirlər olur. Bununla bağlı çoxlu sayda şikayətlər var. Dövlət qulluğunun test mərhələsi kifayət qədər şəffaf və əlçatandır. Ancaq müsahibə mərhələsində bu hal müşahidə olunmur. Bu problemin həll olunması üçün yeniliklər etmək lazımdır”.
K.Əsədov onu da əlavə etdi ki, dövlət qulluğuna bacarıqlı şəxslərin cəlb olunması üçün bu məsələ nəzarətə götürülməlidir. Bütün hallarda, DİM sadələşdirmə rejiminə keçməlidir. Çünki bu gedişlə dövlət orqanlarında işləməyə gənc kadrlar meyl etməyəcək.
Günel CƏLİLOVA
