Paşinyanın arvadından sonra bu hadisə də Rusiyanı qıcıqlandırır...
Ceyhun Məmmədov: “Bütün bunlar getdikcə münasibətlərin daha da gərginləşəcəyindən xəbər verir”
Moskva Ermənistanın Maltada keçirilən Ukrayna üzrə konfransda iştirakını nümayişkaranə anti-Rusiya jesti hesab edir. Bunu Rusiya Xarici İşlər Nazirliyinin (XİN) mətbuat xidmətinin rəhbəri Mariya Zaxarova həftəlik brifinqdə deyib.
"Maltada "Kopenhagen formatında" görüşdən bəhs edirsinizsə, bunu rəsmi İrəvanın nümayişkaranə anti-Rusiya jesti hesab edirik", - deyə Zaxarova jurnalistin sualına cavab olaraq bildirib.
"Ermənistan hazırki rəhbərliyinin məqsədyönlü şəkildə və inadla müttəfiqlik əlaqələrimizi pozduğunu görmək təəssüf doğurur", - Rusiya XİN nümayəndəsi deyib.
Belə görünür ki, Rusiya açıq formada Ermənistanı bu ölkə ilə körpüləri yandırmaqda ittiham edir. Proseslərin bu yöndə gedişi perspektivdə iki ölkə arasında münasibətlər üçün nə vəd edir?
“Zaxarovanın bu açıqlaması onu göstərir ki, Rusiya sonsuza qədər Paşinyanın kaprizləri ilə oynamaq istəmir”
Məsələ ilə bağlı “Bakı-Xəbər”ə açıqlama verən millət vəkili Ceyhun Məmmədovun sözlərinə görə, bu gün Ermənistanın regionda sərgilədiyi mövqe və anti-Rusiya siyasəti Moskva tərəfindn birmənalı qarşılanmır: “Bu da təbiidir. Bu siyasət də bölgəmiz üçün heç də yaxşı gələcək vəd etmir. Təəssüf ki, Ermənistan Qərb ölkələrindən aldığı təlimata əsasən bu gün Rusiya ilə münasibətləri sanki pozmaq üçün bütün pozucu hərəkətlərə gedir. Hər vasitə ilə Rusiya hakimiyyətini qıcıqlandırmağa çalışır. Rusiya-Ukrayna müharibəsinin getdiyi bir vaxtda Ermənistanın açıq-aydın belə addımlar atması təbii olaraq Moskva tərəfindən birmənalı qarşılanmır. Ən azından ona görə ki, Rusiya ilə Ermənistan eyni hərbi, iqtisadi bloklarda təmsil olunurlar. Görünən odur ki, Ermənistan siyasətində vahid istiqamət yoxdur. Bu da getdikcə münasibətlərin daha da gərginləşəcəyindən xəbər verir. Çünki ard-arda bütün bunlar baş verir. Əvvəl Paşinyanın arvadı Kiyevə səfər etdi. Daha sonra erməni rəsmiləri bu kimi tədbirlərə qatılaraq Rusiyanı qıcıqlandırmaq yolunu tutdular. Zaxarovanın bu açıqlaması onu göstərir ki, Rusiya sonsuza qədər Paşinyanın kaprizləri ilə oynamaq istəmir. Düzdür, Rusiya hələlik daha çox prosesləri seyr edir və bir sıra məsələləri görməzdən gəlir. Həm də prosesin hansı həddə qədər inkişaf edəcəyini təhlil edir. Ancaq belə görünür ki, güzəşt limiti artıq tükənir. Ona görə də ola bilsin ki, növbəti günlərdə qarşıdurmanın daha da ağırlaşacağını və dərinləşəcəyini müşahidə edək. Bu baxımdan hesab edirəm ki, proseslər bölgəyə təsirsiz ötüşməyəcək. Çünki məlum qarşıdurma həm də geosiyasi mübarizənin tərkib hissəsidir. Məsələ ondadır ki, Qərb Rusiyanı Ermənistandan çıxarmağı hədəfləyib. Ona görə də bir növ tərəflər arasında əsəb müharibəsi gedir”.
Vidadi ORDAHALLI
