Şəhidlərimizi “Vikipedia”dan silənlərə qarşı ən güclü tədbiri Heydər Əliyev illər öncə görüb - Xatirə Kitabı...
Nəzakət Məmmədova: “Xatirə Kitabının yaradılması Heydər Əliyevin uzaqgörənliyinin çox böyük təzahürüdür”
“Ulu öndər Heydər Əliyev Xatirə Kitabının yaradıcısıdır. Xatirə Kitabının yaradılması Heydər Əliyevin uzaqgörənliyinin çox böyük təzahürüdür. Bu gün Vikipediyada baş verənlər Ulu Öndərin Xatirə Kitabını yaratmaqda nə qədər haqlı olduğunu bir daha sübut etdi. “Heç kəs unudulmasın, heç kəs yaddan çıxmasın". Ulu öndərimiz Heydər Əliyevin bu sözləri Xatirə Kitabının yaradılması haqda Qanunda ayrıca bir bənd kimi göstərilib”.
Bunu “Bakı-Xəbər”ə açıqlamasında Mədəniyyət Nazirliyi Respublika Xatirə Kitabının baş redaktoru Nəzakət Məmmədova deyib.
N.Məmmədova bildirdi ki, Heydər Əliyevin 1997-ci il 23 dekabr tarixli fərmanı ilə “Vətən uğrunda həlak olanların xatirəsinin əbədiləşdirilməsi haqqında” Azərbaycan Respublikasının Qanunu imzalanıb.
“Sanki Heydər Əliyev bu günləri görürdü və bu kitabı yaratmaqla şəhidlərimizin adlarının, qəhrəmanlıqlarının yaddaşlara, tarixə həkk olunmasını əbədiləşdirdi”
“Biz bu gün bunun nə qədər aktual olduğunu yaxından hiss edirik.
Ulu öndər İkinci Dünya müharibəsindən üzü bəri bütün şəhidlərin, Vətən uğrunda həlak olanların adlarının əbədiləşdirilməsinin vacibliyini vurğuladı və bu redaksiyanı yaratdı. Bizim redaksiyanın yaradılması məhz Heydər Əliyevin adı ilə bağlıdır. Ulu öndər Xatirə Kitabının yaradıcısıdır. Respublikanın hər bir yerində, hər bir sahədə həyata keçirilən işlərin təməli onun tərəfindən qoyulub. Müstəqilliyimizin möhkəmlənməsi, nəticədə bu gün güclü dövlətə çevrilməyimiz də ulu öndərin zamanında gördüyü möhtəşəm işlərin nəticəsidir.
Bilirsiz ki, 1993-cü ildə Heydər Əliyev xalqın təkidli tələbi ilə hakimiyyətə qayıtdığı dövrdə ölkəmizdə vəziyyət çox acınacaqlı idi. Ölkə bütün sahələrdə böhran yaşayırdı, İqtisadiyyatımız ağır vəziyyətə düşmüşdü, ciddi maliyyə çətinlikləri vardı. Heydər Əliyev ölkəni yenidən qururdu, müxtəlif sahələri dirçəltdi, iqtisadiyyatımız düzəlməyə başladı, belə bir dövrdə Heydər Əliyev Xatirə Kitabı Redaksiyasının yaradılması təşəbbüsünü irəli sürdü. Bu kitabın yaradılmasını Heydər Əliyev çox mühüm məsələ hesab edirdi. Xatirə Kitabı bu gün aktuallığını tapdı ki, bu kitab şəhidlərimizin adlarının əbədiləşdirilməsi üçün olduqca vacibdir, gərəklidir, labüddür. Xatirə Kitabının çap versiyasının mövcudluğunun əhəmiyəti çox böyükdür. Düşünürəm ki, kitabların çap versiyası, bütövlükdə çap mətbuatı vacib və labüddür. Kitab qədər uzunömürlü, kitab qədər qalıcı, kitab qədər tarixə çevrilən ikinci bir nümunə yoxdur. Təbii, çap mətbuatı, qəzet, jurnal da bura daxildi. Yəni istər kitab, istər qəzet, istərsə də jurnal olsun, bunların virtual variantı o qədər də etibarlı görsənmir. Düzdür, hər bir nəşrin elektron variantının olması günün tələbidir və bütün dünya virtual platformadan istifadə edir. Bu gün müxtəlif qəzetlərin, jurnalların saytları da var, internet portalları da fəaliyyət göstərir, kitabxanalar da, kitablar da elektronlaşır. Bunlar hamısı yaxşıdır, oxuculara əlçatandır və sair. Amma son dövrlər saytlara haker hücumlarının şahidi oluruq. Belə hadisələr çox yaşanır. Baş verənlər bir daha sübut etdi ki, istənilən vaxt elektron variantlara müdaxilə etmək mümkündür. Yəni istənilən şəxs girib saytlarda hansısa bir məqalədə dəyişiklik edə, istədiyini silə, istədiyini ora əlavə edə bilər. Məsələn, tariximizlə bağlı faktları silə, onun yerinə qondarma, saxta məlumatlar yükləyə bilərlər. Ziyanımıza məqalələr yazıb, mətnlər hazırlayıb saytlarda yerləşdirmək belələrinin əlində məncə çətin olmaz. Yəni baş verənlərdən belə nəticəyə gəlmək olar”.
N.Məmmədova qeyd etdi ki, belələri saxta məlumatlar əsasında "Vikipediya" məqalələri də hazırlayıb yerləşdirə bilərlər. “Elektron versiyalara hər cür müdaxilələr etmək olur. Amma çapa müdaxilə etmək olmur, çünki o çap olunur gedir. "Vikipedia"dan 3 mindən çox şəhidimiz barədə məqalələrin silinməsi təəssüf doğurur, ürəklərimizi ağrıdır. Amma baş verən hadisə kitabın və qəzetin aktuallığını bir daha sübut etdi. Kitab və qəzet bir tarixdir”.
“Vikipedia”dan şəhidlərimizlə bağlı məlumatların silinməsini təəssüflə qarşılayan N.Məmmədova bildirdi ki, bizi istəməyən qüvvələr bu xoşagəlməz, mənfi addımı atsalar da, hər bir şəhidimiz barədə məlumat Xatirə Kitabının çap etdiyi kitablarda mövcuddur və bu məlumatlar onlar haqda baza rolunu oynayır. “Xatirə Kitabı şəhidlərimizin xatirəsini əbədiləşdirir. Düşünürəm ki, Xatirə Kitabının yaradılması Heydər Əliyevin uzaqgörənliyinin böyük və uğurlu nəticəsidir. Sanki Heydər Əliyev bu günləri görürdü və bu kitabı yaratmaqla şəhidlərimizin adlarının, qəhrəmanlıqlarının yaddaşlara, tarixə həkk olunmasını əbədiləşdirdi”.
N.Məmmədova bildirdi ki, Mədəniyyət Nazirliyi qarşısında yeni ideya və təkliflə çıxış edib: “Təklif etmişəm ki, Birinci Qarabağ müharibəsində şəhid olanlar barədə də ayrıca cildlər hazırlayıb nəşr edək. Bilmirəm, necə cild olacaq, amma bu işi görmək lazımdır. Düzdür, İkinci Dünya müharibəsinə həsr olunan 16 cildliyin içərisində Birinci Qarabağ müharibəsi şəhidlərinin adları da gedib. Ancaq Birinci Qarabağ müharibəsi şəhidləri ilə bağlı ayrıca cildlər hazırlamaq niyyətindəyik.
Ümid edirəm ki, nazirlik mənim bu ideyamı bəyəndi və bunu da gerçəkləşdirməyi planlaşdırırıq. Yəni "44 Günlük-Tarixi zəfər" 4 cildliyinin 2 cildi çap olunub və 3-cü cildi hazırda mətbəədədir. Yəqin ki, dördüncü cild gələn il hazır olacaq. Ondan sonra biz Birinci Qarabağ müharibəsi şəhidləri ilə bağlı araşdırma aparacağıq, onlar haqda məlumatlar toplayacağıq, onlarla bağlı məlumatları da ayrıca cildlərdə çap edəcəyik. Necə ki, Dövlət Təhlükəsizlik Xidməti nəzdində fəaliyyət göstərən Əsir, itkin düşmüş, girov götürülmüş vətəndaşlarla əlaqədar Dövlət Komissiyasının İşçi qrupu ilə birgə Azərbaycanın ərazi bütövlüyünə təcavüz edən Ermənistanın Dağlıq Qarabağ və ətraf rayonlara hücumu, torpaqlarımızın işğalı zamanı əsir və girov götürülmüş, həmçinin naməlum şəraitdə itkin düşmüş hərbçi və mülki şəxslərin sonrakı taleləri araşdırılıb və dörd cilddən ibarət iki dildə kitab hazırladıq, burada 3888 nəfərin dəqiq məlumatları öz əksini tapdı, eləcə də Birinci Qarabağ müharibəsi şəhidləri barədə ayrıca cildlər hazırlamaq istəyirik.
Bir də ki, tariximizi özümüz yazmasaq, özümüz qoruyub gələcək nəsillərə ötürməsək bunu heç kəs bizim yerimizə etməyəcək”-deyə N.Məmmədova bildirdi.
İradə SARIYEVA
