Bu xəstəxanalarda direktor müavini işləmək istəyənlər yoxdur?..
Rasif Bağırov: “Qeyd edilən xəstəxanalarda direktor müavini vəzifəsinin boş qalmasının səbəbi insanların bu tip elanlara inanmamasıdır”
Tibbi Ərazi Bölmələrini İdarəetmə Birliyi (TƏBİB) tabeliyində olan tibb müəssisələrinə direktorun inzibati məsələlər üzrə müavini vəzifəsinə vakant yerlər elan edir:
- Bərdə Rayon Mərkəzi Xəstəxanası
- Xocalı Rayon Mərkəzi Xəstəxanası
- Şuşa Rayon Mərkəzi Xəstəxanası
- Zəngilan Rayon Mərkəzi Xəstəxanası
- Goranboy Rayon Mərkəzi Xəstəxanası
- Göyçay Rayon Mərkəzi Xəstəxanası
- Cəbrayıl Rayon Mərkəzi Xəstəxanası
- Qubadlı Rayon Mərkəzi Xəstəxanası
- Naftalan Şəhər Mərkəzi Xəstəxanası
- Ağsu Rayon Mərkəzi Xəstəxanası
- İsmayıllı Rayon Mərkəzi Xəstəxanası
- Masallı Rayon Mərkəzi Xəstəxanası
- Bakı üzrə tabeli müəssisələr
Maraqlı məqam ondan ibarətdir ki, qeyd edilən xəstəxanalarda direktor müavini kimi çalışmaq istəyənlər yoxdur. Görəsən, adıçəkilən dövlət xəstəxanalarında niyə direktor müavini işləmək istəmirlər?
“Vakant yerə işə düzəlmək istəyən şəxs tələb olunan sənədləri toplayır, nəticədə müraciət edən şəxsin sənəd toplamaq əziyyəti ona qalır və o yerə başqa adam götürülür, bu səbəbdən də…”
Tibb eksperti Rasif Bağırov “Bakı-Xəbər”ə açıqlamasında bildirdi ki, Azərbaycan kimi yerdə xəstəxanalarda direktor müavini vəzifəsinin boş qalması maraq doğurur: “Kim istəməz ki, direktor müavini vəzifəsində işləsin? Adətən idarənin öz işçiləri bu kimi vakant yerlərə can atır. Yaxşı olar ki, klinika və ya hansısa idarədə rəhbər şəxs bu vəzifəni işçilərin rəğbət bəslədiyi şəxsə həvalə etsin”.
Ekspert hesab edir ki, qeyd edilən xəstəxanalarda direktor müavini vəzifəsinin boş qalmasının səbəbi insanların bu tip elanlara inanmamasıdır. Hamı bilir ki, vakant yerə işə düzəlmək istəyən şəxs tələb olunan sənədləri, ərizələri toplayır: “Nəticədə müraciət edən şəxsin sənəd toplamaq əziyyəti ona qalır və o yerə başqa adam götürülür. Bu səbəbdən də vakansiya elanlarını insanlar ciddi qəbul etmir”.
Həmsöhbətimiz onu da əlavə etdi ki, adıçəkilən xəstəxanaların özündə direktor köməkçisi vəzifəsində çalışmaq istəyən şəxslər var. Sadəcə, müəyyən səbəblərdən də insanlar bu tip vəzifələrdə çalışmaq istəmir.
Günel CƏLİLOVA
