“Formula 1”ə hazırlıq işlərinin mühüm hissəsi polisin üzərinə düşdü...
Şəmsəddin Əliyev: “Bu yarışın təhlükəsiz şəkildə keçirilməsində polisin rolu əvəzsizdir”
8 ildir Bakıda keçirilən "Formula 1" yarışları artıq başlayıb. Dünyanın dörd bir yanından Azərbaycana gələn turistlər və paytaxt küçələrində şütüyən yarış maşınları artıq bir neçə ildir ki, küləklər şəhərini bəzəyir.
“Formula 1” yarışlarına hazırlıq mərhələsində ictimai asayişin təmin olunması xüsusilə vacib və əhəmiyyətli bir fəaliyyət istiqaməti kimi görünür. DİN əməkdaşlarının bu istiqamətdə fəaliyyəti, təbii ki, fasiləsiz xarakteri ilə seçilir və hər hansı tədbirin olub-olmamasından asılı olmayaraq davam etdirilir. Lakin “Formula 1” yarışlarının hazırlıq mərhələsində və keçirildiyi günlərdə asayişin qorunması səylərinin bir neçə dəfə artırılması olduqca vacibdir. Çünki burada mövzu ölkəmizin növbəti kütləvi tədbiri də uğurlu və təhlükəsiz keçirməsidir. Eyni zamanda, xaricdən minlərlə qonağın şəhərdə olması, otellərdə qeyri- adi canlanma, minlərlə könüllü və tamaşaçılar ordusu, turistlərin rahatlığının təmin olunması polis qüvvələrinin fəaliyyətinin ictimai və dövlət əhəmiyyətini daha da artırır. Bütün DİN heyətinin, sıravi polislərin bu günlərdə daha intensiv fəaliyyət göstərməsi sübut edir ki, ictimai asayişin qorunması missiyası DİN rəhbərliyi tərəfindən lazımınca dəyərləndirilir.
“Formula 1" yarışına hazırlıq dönəmində və keçirildiyi günlərdə əsas yük Daxili İşlər Nazirliyinin əməkdaşlarının üzərinə düşür”
“Formula1” hazırlıqları ilə bağlı polis orqanlarının fəaliyyəti barədə “Polisə Dəstək” İctimai Birliyinin sədri, sabiq polis rəisi, hüquqşünas ekspert Şəmsəddin Əliyev “Bakı-Xəbər”ə şərhində bildirdi ki, Bakı vaxtaşırı beynəlxalq tədbirlərə ev sahibliyi edir. Bu cür tədbirlərin keçirilməsi, təşkilatı işlərin yüksək səviyyədə icra olunması, hazırlıq işlərinin görülməsi, həyata keçirilməsi prosesinə nəzarətdə polisin işi danılmazdır. "Formula 1" yarışına hazırlıq dönəmində və keçirildiyi günlərdə əsas yük Daxili İşlər Nazirliyinin əməkdaşlarının üzərinə düşür. Məlumdur ki, artıq 8 ildir ölkəmizdə bu yarış keçirilir. Bu yarışın təhlükəsiz şəkildə keçirilməsində polisin rolu əvəzsizdir. Məlumdur ki, yarışla bağlı bəzi yollar müvəqqəti olaraq bağlanıb. Nəqliyyatın hərəkətinin təmin edilməsi, qəza hallarının baş verməməsində polis əməkdaşlarının xüsusi rolu var”.
Günel CƏLİLOVA
