Azərbaycana 1,2 milyon "sovet ermənisini" qaytarmaq iddiası absurddur...
“Süni şəkildə şişirdilərək təqdim edilən 1 milyon 200 min rəqəmi Qərbi azərbaycanlıların geri qayıdışına qarşı təbliğat kampaniyasının tərkib hissəsidir”
Ermənistanda müəyyən qüvvələr əsassız iddalar irəli sürməkdən usanmaq bilmirlər. Azərbaycanla Ermənistan arasında sülhün əldə olunmasının qarşısını almaq üçün bütün güclərini səfərbər edən revanşistlər vaxtaşırı olaraq həqiqətə uyğun olmayan fikirlər tirajlayırlar.
İndi də özünü “Birgə” alternativ ictimai-siyasi hərəkatının Koordinasiya Şurası adlandıran bir təşkilat meydana çıxıb və “erməni xalqının qanuni hüquqlarının pozulmasından” dəm vurur. Guya ki, ermənilərin hüquqları pozulub və onların hüquqları (?) bərpa olunmadan bölgədə əsl sülh bərqərar oluna bilməz.
Uydurma məlumatlar əsasında hazırlanan bəyanatla gündəmə gəlməyə çalışan Koordinasiya Şurası iddia edir ki, guya 36 il əvvəl Azərbaycan SSR-dən 1,2 milyon erməni “məcburi köçkün” düşüb, onlar da o ermənilərin “sağ-salamat vətənə qayıtması məsələsinin ölkənin diplomatik gündəliyinə salınmasını” tələb edirlər.
İddia edirlər ki, otuz altı ildən artıqdır, “Azərbaycan SSR-dən məcburi köçkün düşmüş 1 milyon 200 mindən çox erməninin problemi həll olunmamış qalır”.
Bəyanatda Ermənistan hakimiyyəti Azərbaycandan getmiş ermənilərin sayını rəsmi məlumatlarda və ictimai çıxışlarda “təhrif eütməkdə” ittiham olunur, qeyd edilir ki, hakimiyyət Azərbaycanın dediklərinə boyun əyərək ermənilərin sayı ilə bağlı “etibarsız” rəqəmlər səsləndirib: “600-700 min. Görünür, yalnız Ermənistana köçmüş ermənilərin sayını əsas götürüb. Nə qədər erməninin Ermənistandan yan keçərək dünyanın başqa ölkələrinə getməsi heç bir yerdə aydın qeydə alınmayıb”.
Birliyin iddiasına görə, onlar Azərbaycanın keçmiş prezidenti Ayaz Mütəllibovun bəyanatına da “istinad edirlər”. Guya A.Mütəllibov nə vaxtsa deyib ki, 1988-ci ildə təkcə Bakıda 500 minə yaxın erməni yaşayıb. “Ermənilər Qarabağda (96%), Naxçıvanda (60%-dən çox), Gəncədə (50%) və digər bölgələrdə əhalinin əhəmiyyətli hissəsini təşkil edirdi”-iddasını irəli sürürlər.
Yenə də qondarma “Arsax”dan, yenə də “etnik təmizləmədən” danışıblar.
300 mindən çox Qərbi azərbaycanlının indiki Ermənistan ərazisinə, öz dədə-baba torpaqlarına qayıtması ilə bağlı Azərbaycanın beynəlxalq hüquqa uyğun irəli sürdüyü tələblərə bu qüvvələr qıcıqla yanaşıb, özlərinə məxsus hədyanlar söyləyiblər.
Guya Azərbaycan ermənilərin “min illik beşiyidir”. Bəyanatda qeyd edilir ki, “beynəlxalq danışıqlar gündəliyinə” Azərbaycandan “qovulmuş” 1 milyon 200 minə (?) yaxın erməni nümayəndələri “sağ-salamat qayıtmaları və ermənilərin min illik beşiyi olan bugünkü Azərbaycan ərazisində yaşamaq hüququ məsələsi də daxil edilsin”. Bu, Ermənistanda fəaliyyət göstərən “Birgə” alternativ ictimai-siyasi hərəkatının Koordinasiya Şurası adlı qondarma təşkilatının absurd bəyanatında yer alan fikirlərdir.
“Bu iddia erməni fırıldağından, saxtakarlığından başqa bir şey deyil”
Bakı Dövlət Universitetinin Erməni Araşdırmaları və Təlim Mərkəzinin direktoru, ermənişünas İsmayıl Tanrıverdi “Bakı-Xəbər”ə şərhində bildirdi ki, sözügedən təşkilatın bəyanatında əks olunan fikirlər tamamilə reallıqdan uzaqdır, həqiqəti əks etdirmir. “Erməni xislətinə yaxşı bələdsiniz. Onlar həmişə rəqəmləri saxtalaşdırırlar, özlərinə dəyən zərəri bir neçə qatına hesablayırlar. Osmanlının 1915-ci ildə guya bir milyon yarım erməni “qətlə yetirib” deyə qondarma “soyqırım” iddiası qaldırdıqları kimi, indi də Azərbaycanı əsassız olaraq ittiham etməyə başlayıblar. Guya ki, Sovet dövründə Azərbaycanda 1 milyon 200 min erməni varmış. Onların Azərbaycandan 1 milyon 200 min nəfər erməni köçdüyünü iddia etməkdə məqsədləri aydındır. Süni şəkildə şişirdilərək təqdim edilən 1 milyon 200 min rəqəmi Qərbi azərbaycanlıların geri qayıdışına qarşı təbliğat kampaniyasının tərkib hissəsidir. Ermənilər 300 mindən çox Qərbi azərbaycanlının beynəlxalq hüququn prinsipinə uyğun olaraq öz tarixi Vətənlərinə qayıtmaqlarını qətiyyən istəmirlər. Halbuki, Qərbi azərbaycanlıların təhlükəsiz şəkildə indiki Ermənistan ərazisinə qayıtması onların haqqıdır. Ermənilər də çalışırlar ki, belə absurd məsələlərlə həm onların qayıdışına, həm də sülhə mane olsunlar. Ona görə də, özlərinin qondarma qayıdış “hüquqlarını” ortaya atırlar. Əsl erməni xisləti buna deyərlər. Ermənilər bütün faktları, sənədləri, rəqəmləri, statistik məlumatları saxtalaşdırıblar. Belə absurd iddialar hələ davam edəcək”.
Çar Rusiyası tərəfindən bizim bölgəyə köçürülən və torpaqlarımızda məskunlaşdırılan ermənilərin Qafqazın “qara yarası” olduğunu deyən İ.Tanrıverdi bildirdi ki, indi erməni terrorundan, erməni uydurmalarından biz əziyyət çəkirik.
“Ermənilər hara düşürlərsə orada mütləq saxtalaşdırma işləri aparırlar. Yeri gəlmişkən, məndə bir cədvəl var, arxiv sənədidir. 1914-cü ildə Türkiyədə siyahıyaalma keçirilib və sənəddən məlum olur ki, həmin dövrdə bu ölkə ərazisində yaşayan ermənilərin sayı 1 milyon 200 min olub. 1 milyon 200 min ermənin də hansı yerlərdə yaşadığı aydın şəkildə qeyd edilib. Amma sonradan iddia qaldırdılar ki, 1915-ci ildə 1 milyon 500 min erməni “soyqırıma” məruz qalıb. Bu fakt sizə erməni xislətini açıq şəkildə göstərir. Ermənilərə qarşı soyqırım baş vermədiyini, bunun iddia olduğunu tarixçi Filipp Ekozyants da qeyd edib. Erməni atleti Yuri Vartanyan Ermənistanın Gürcüstandakı səfiri idi. Mən onunla 1978-ci ildə İrəvanda Komsomolun 28-ci qurultayında birlikdə iştirak etmişik, o zaman tanış olmuşduq. Əslən Gümrüdən idi. O vaxt Ermənistan qondarma soyqırımın 100 illiyinin keçirilməsi məsələsini qaldıranda Yuri Vartanyan bunu gülünc bir hadisə kimi qarşıladı və dedi ki, soyqırım olubsa bəs biz hardan əmələ gəlmişik? O, “soyqırım” iddiasını qəbul etmirdi. Onun bu açıqlamaları Serj Sarkisyan tərəfindən çox sərt qarşılandı, səfir vəzifəsindən çıxarıldı, hətta oğlunun cibinə narkotik ataraq həbs etdirdilər. Bu faktı niyə deyirəm? Çünki ermənilərin içində də az-çox bu saxtakarlığa qarşı çıxanlar var. Təəssüf ki, onların sayı çox azdır”.
Ermənilərin son vaxtlar Azərbaycana qarşı daha da aqressivləşdiyini, revanşist fikirlərə düşdüklərini deyən İ.Tanrıverdi hesab edir ki, onlar bu iddialarla özlərini gülünc vəziyyətə slaırlar, etdiklərinin cəzalarını çəkəcəklər. “1 milyon 200 min rəqəmi absurddur, bu iddia erməni fırıldağından, saxtakarlığından başqa bir şey deyil. Onlar etdikləri belə saxtakarlıqlarla özlərini ifşa edirlər”-deyə İ.Tanrıverdi qeyd etdi.
İradə SARIYEVA
