Xarici tələbələr üçün Azərbaycan dili bilgisi niyə məcburi deyil?..
Məlum olduğu kimi, xarici ölkələrdə təhsil almaq istəyərkən əsas tələblərdən biri də dil bilgisi olur. Bir çox ölkələrdə ana dilini bilməyəndə bir il əlavə oxuyub öyrənmək məcburidir. Danılmaz faktdır ki, Azərbaycanda da təhsil alan bir çox əcnəbilər var.
Maraqlıdır, ölkəmizdə təhsil almaq istəyən əcnəbi tələbələrə tələb kimi azərbaycan dili bilmək şərti qoyulurmu? Onlardan dil sertifikatı tələb olunurmu?
İlham Əhmədov: “Dil bilmə sertifikatı tələb olunmur, çünki onsuz da əcnəbi tələbələrimiz azdır, sertifikat tələbi qoyulsa, gələnlər lap azalar”
Təhsil eksperti İlham Əhmədov “Bakı-Xəbər”ə şərhində bildirdi ki, Azərbaycan universitetlərində əcnəbi tələbələrin sayı çox azdır: “Türkiyə Cumhiyyətində 300 min əcnəbi tələbə olduğu halda (onun 30 mini bizim gənclərimizdir), bizdə bu tələbələrin sayı 10 minə yaxındır. Əhalinin hər 10 min nəfərinə düşən əcnəbi tələbələrin sayı Türkiyədə bizdən 3,2 dəfə çoxdur. Bizdəki əcnəbi tələbələrin çoxu Türkiyə və İran vətəndaşlarıdır. Onların əksəriyyəti azərbaycan dilini anlayır. Yəni bu tələbələr üçün dil problemi olmur. Çox az sayda digər ölkələrdən tələbələr olur, onlar da əsasən ingilis dilində təhsil alırlar. Dil bilmə sertifikatı tələb olunmur, çünki onsuz da əcnəbi tələbələrimiz azdır, sertifikat tələbi qoyulsa, gələnlər lap azalar. Təhsil məmurları bildirir ki, bizim əhalinin 60 faizi oxuduğunu anlamır, qoy bir az da oxuduğunu anlamayan əcnəbiləri oxudaq. 150 balla universitetə qəbul olunan tələbələr də oxuduğunu anlamaqda çətinlik çəkir”.
Ekspert bildirdi ki, əcnəbilərin Azərbaycanda təhsil alması prosesi Nazirlər Kabinetinin müəyyən etdiyi və 2015-ci ildən qüvvədə olan qaydalarla tənzimlənir. Həmin qaydalar imkan verir ki, başqa ölkələrin vətəndaşı olan gənclər Azərbaycan universitetlərində təhsil alsınlar. Bunun üçün mövcud yollardan biri universitetlərin elan etdiyi qəbula qatılmaqdır. Bu zaman xarici ölkə vətəndaşı olan şəxs təhsil almaq istədiyi ixtisasa uyğun universitetin müəyyən etdiyi fənn və ya fənlər üzrə müsahibədən keçir. Yəni imtahan fənninə də, keçid üçün qoyulan tələblərə də hər universitet özü qərar verir.
Elçin Əfəndi: “Azərbaycan ali təhsil müəssisələrində təhsil almaq istəyən əcnəbi tələbələr müvafiq qaydada azərbaycan dilində imtahan verir”
Təhsil eksperti Elçin Əfəndi “Bakı-Xəbər”ə açıqlamasında bildirdi ki, Azərbaycan ali təhsil müəssisələrində təhsil almaq istəyən əcnəbi tələbələr müvafiq qaydada azərbaycan dilində imtahan verirlər: “Rus bölməsində təhsil alan Azərbaycan vətəndaşları belə ali təhsil müəssisələrinə qəbul imtahanında iştirak etmək üçün mütləq azərbaycan dilində imtahan verməlidir. Bu xarici ölkə vətəndaşları üçün də keçərlidir. Əcnəbi tələbələr azərbaycan dilində imtahan verir və ya tədris dövründə dilimiz onlara öyrədilir”.
Həmsöhbətimiz onu da əlavə etdi ki, xarici ölkələrdə təhsil almaq istəyən azərbaycanlılar xarici dil üzrə beynəlxalq dil sertifikatına sahib olmalıdır. Bura ingilis, fransız, alman dili daxildir.
Günel CƏLİLOVA
